E FAI O LENEI AE O LENA

O LE TUA’OI AMIO LEAGA

Sa iai se tamaloa na alu e su’e galuega.  Ae ina ua ia pasi atu ma le fale a lona tua’oi, sa faapea ona pa’u mai totonu o le taga o lona ofu, ia se fasi pepa taua lava, e aunoa ma sona iloa.

O le taimi lena, o lo’o tilotilo mai le tuaoi a lenei tamaloa, mai totonu o lona fale.  Ma ia iloa mai le pa’u o le fasi pepa mai i le taga o le ofu a le tamaloa.  Ua oso le manatu a le tuaoi e faapea, “Matua’i fai lapisi tele le alii lea.  Ua le tago e u’u lana fasi pepa e ave e togi i se lapisi, ae fa’atali lava se’i o’o mai i luma o lo’u fale, ona ia tago lea i le togi i lalo.”

Ae ua le alu atu le tuaoi i le taimi lena e fai atu se tala i le tamaloa, ae ua amata ona ia mafaufau i se auala e taui ma sui atu ai i le tamaloa.

Ina ua o’o i le po, sa faapea ona alu atu le tuaoi ma sana ato lapisi o lo’o tumu i pepa, ma sasa’a i luma o le fale o si tamaloa lea na ui atu i luma o lona fale.  Ae o le taimi lea, o lo’o tilotilo mai foi le tamaloa mai totonu o lona fale, ma ona iloa mai le mea lea ua fai e lona tuaoi.

Ae peitai, e le’i faia e le tamaloa ia se faamatalaga, pe faamisa atu i lona tuaoi.  Ae ua sau i le amata ona ta’alao le lapisi a lona tuaoi lea ua sasa’a i luma o lona fale.  A’o faia le galuega a le tamaloa, sa ia maua ai i totonu o le lapisi a lona tuaoi, ia le fasi pepa taua lava lea na pa’u mai i lana taga, i luma o le fale o lana tuaoi.  Ae o le mea ua faia e le tuaoi i le fasi pepa lea, ua le gata ina ona lafoina i le lapisi, ae ua nofo ma saesae fa’anini’I le pepa a le tamaloa.

O le ita tele o le tamaloa, sa ia mafaufauina ai foi se auala e taui ma sui atu ai i lona tuaoi.  O le po lava lea e tasi, na valaau ai le tamaloa i se faifa’ato’aga ma oka mai ai ni ana fagafao se sefulu ma ni pato se 100.  Ma fai atu iai le tamaloa i le faifa’ato’aga, ina ia momoli mai nei manu i le fale o lona tuaoi i le taeao e soso’o ai.

O se va’aiga tulaga ‘ese na molimauina e tagata i lea nu’u, i le alu o le taeao na soso’o ai, o taumafai le tuaoi a le tamaloa, e tutuli ‘ese ia pua’a ma pato mai luma, tua ma autafa o lona fale.

Ma na atili ai ona ita le tuaoi, ina ua va’ai mai, o tu atu le tamaloa ma ‘ata atu i le latou tuliga o lo’o fai ma manu.  Na mate’ia lelei e le tuaoi le tagata sa ona faia le mea lea ia te ia.  I aua amata foi ona tau mafaufau le tuaoi i sana auala e taui ma sui mai ai i le tamaloa.

Ma ua faapena ai lava ona taui ma sui atu leisi, i leisi.  Ae na mafua uma nei mea, ona o se fasi pepa sa pa’u mai i le taga o le tamaloa, e aunoa ma osna iloa.  Ae o lea, ua o’o atu lava i le tau’ai o fa’amalama o fale ma fa’ai’u i le pomuina e le tamaloa o le fale a lona tuaoi ma faapea ona pomu mai e le tuaoi ia le fale a le tuaoi.

O le tulaga malie, na ave uma le tamaloa ma lona tua’oi i le falemai ma taofia ai, i le potu falema’i e tasi.  Ae ua fai nei le sa o a le aualii lea, i le le fia talanoa o leisi i leisi.  Alu ai lava aso ma atonu ai ua levava nei alii i le leai o seisi e pisa i totonu o le la potu, na i’u ai lava ina amata ona o la talanoa, e uiga i le mea sa tupu.  Ma o la malamalama ifo ai, na mafua nei mea uma ona o le le talanoa.  

Ana talanoa leisi i leisi, ae le oso muamua i le taui ma sui, semanu e leai lava se mea e tupu ma mafai ona fa’asaoina mai o la fale.

Ina ua tete’a uma mai nei alii mai i le falemai, sa faapea ona o la galulue faatasi i le toe tau fausia o ni o la fale fou ma avea ai i la’ua o se uo lelei ma le mafana.

[IA MANUIA FUAFUAGA O TOTOE O LENEI VAIASO]