E FAI O LENEI AE O LENA

“O PURINISESE MA LE LAUMEI ”

I aso lava la ua leva, na iai se Tupu ma se Masiofo ma ni o la alo tamaitai se to’alua.  O nei Purinisese, sa a’ave tala i le lalelei o nei tamaitai.  Ma e le gata i le lalelei ae o le atamamai, toe talenia.  O siufofoga o nei Purinisese, e tosina mai ai manu felelei o le lagi ma manu uma o le togavao e lata ifo i le maota o le tupu.

O se fiafiaga tele i le Tupu ma le Masiofo le vaavaai i le tuputupu ifo o si a la fanau.

 Ua o’o i tausaga faatulagaina ua manaomia ai ona saili ni taitoalua o nei Purinisese, e pei o tu ma aga o malo i na ona po.  Ua va’aia uiga faanoanoa o le Tupu ona ua ia iloa, ua leva ona tatau ona faaipoipo ona afafine.  Ae peitai, sa ia va’aia uiga faasausili o nei tamaitai.  Ua tele ni aloalii na afea le malo o le Tupu e fia faaipoipo atu i nei Purinisese, ae peitai, na toe foi ma le faanoanoa i latou uma ona o le maualuga o agavaa faatulaga e nei tamaitai, o lo o tau saili ai o la taitoalua.  Ae faaopoopo atu ai lava ma le Masiofo.

Fai mai le manatu o leisi Purinisese, “Ou te fia faaipoipo i se alii pito sili ona aulelei.  E leai se ma’ila po o se pona i ona foliga.”  Ae fai mai leisi Purinisese, “Ou te fia nofo i se aloalii e sili sili ona mau’oa.  Ia sili atu lona mau’oa i lo tama, ina ia mafai ona ia faatau so’o se mea ou te mana’o iai.”

Ua fiu lava la le tupu e faatalitali i le Masiofo e fai se faaiuga i le sailiga o ni taitoalua a lana fanau, ae peitai, ua malosi tele le fai manatu o nei tamaitai i aloalii ma perenise eseese sa o’o mai e fia faaipoipo atu iai i a la’ua.  Ia ae ioe lava le masiofo i manaoga o lana fanau.

Ua o’o i se tasi aso, ua le lava e le Tupu i le onosa’i ma ua fai loa lana faaiuga.  Ua faapea atu i le Masiofo, “O le a ou le toe faatali, o lea o le a faia se fa’asalalauga e saili ai ni taitoalua o le ta fanau.  O le a loomatutua ane lava, ae le toe maua ni a la taitoalua e tausi i la’ua pe a ta maliliu.”  Ae tali mai le Masiofo, “Ua lelei, ae e na o le pau le tagata e mafai ona faaipoipo i Purinisese, na o le tagata e mafai ona mateine o la igoa.”

O nei Purinisese, e talu lava ona soifua mai, e leai ma seisi o le malo e silafia suafa o nei tamaitai.  E o’o lava foi i auauna i totonu o le maota o le Tupu ma le Masiofo, e le iloa.  Ona e na o le pau lava le auala e valaau ai nei tamaitai, “O lau afioga,” po o “Purinisese.”

Ua salalau le tala, o lea o le alii e mafai ona ia mateine igoa o nei Purinisese, o ia lea o le a faaipoipo uma atu iai ia nei Purinisese.

Ua faatumulia le maota o le Tupu i alii talavou uma o le malo, ua lolofi mai e saili so latou ‘ai i alo tamaitai o le Tupu ma le Masiofo.  Ae ua fiu nai ali’I e tau mate igoa o nei teineiti.  Ua uma igoa uma o le tusi, o igoa fatu, o igoa mai anamua.  E leai lava.

O se tasi aso, na sau ai se Laumei i le maota o le Tupu ma le Masiofo.  Sa mana’o foi le Laumei e mate igoa o nei tamaitai ina ia maua ai sona toalua.  Ae sa tonu i le laumei, o le a se’i alu muamua e tau faalogologo pe na te lagonaina seisi i totonu o le maota o le tupu ma le masiofo, o ta’uina le igoa o nei Purinisese.

Ua le agai atu le laumei i le mea o iai le Tupu ma le Masiofo, ae ua oso atu i tua i le togalaau o lo o ta’aalo mai ai Purinisese nei e toalua.  Sa faamaualuga lava nei tamaitai, e leai ma seisi e na te mafai ona mateina o la igoa.

Ua alu le aso atoa o ta’a’alo ma fetamoea’i solo Purinisese i totonu o le togala’au, ae o lo o mulimuli solo ai lava le laumei lenei, ma lo la leiloa.

Ua amata ona le lava le laumei ma ua tonu ia te ia o le a toe fo’i, ae va’aia loa e nei Purinises ia se uila vilivae o tu mai i leisi itu o le lotoa.  Ua patipati Purinisese ma osooso i luga, ona fa’ato’a o la va’ai lava lea i se uila vili vae.  Ua tamo’e atu le tamaitai matua i le uila vili vae ma ia vala’au mai i lona uso laititi e tamo’e atu.  Ma o le valaau mai o le tamaitai matua, sa ia ta’uina ai le igoa o lona uso laititi.  Ua ataata le laumei.

A’o faagasolo pea ta’aloga a nei Purinisese i le la uila vili vae, ma ona ua ova tele lo la fiafia i le la taaloga ua fai, na valaau atu ai le Purinisese laititi i lona uso matua, ma ta’u lona igoa.

Ua faatopetope atu nei le savalivali a le laumei i le Tupu ma le Masiofo ma ia fa’ailoa atu iai, o lo o ia mana’o e faaipoipo atu i le la fanau teine.  Ua ata faamaela le Masiofo ma faapea mai, “Ua siliga ma aloalii popoto, atamamai ma le mau’oa ona mateina igoa o le ma fanau, ou te iloa foi e leai se avanoa e mafai ona e mateia o la igoa.”

Na faapea mai le Tupu, “Afai e mafai ona e mateiaina igoa o Purinisese e toalua, o le a tu’uina atu i  la’ua ia te oe.”  Na matapogia le Masiofo ina ua ta’u atu e le laumei suafa o nei Purinisese.  Ma e ui i le taufai tagi aue o le Masiofo ma Purinisese e toalua, ae sa savali pea le tupu i lana upu.

Ma na tu’ua e le Laumei ma Purinisese e toalua ia le malo o le Tupu ma le Masiofo, ma e le i toe faalogo seisi i se tala e uiga i nei Purinisese.

IA MANUIA TOE FUAFUAGA O LENEI VAIASO!