E FAI O LENEI AE O LENA

O LE LO’OMATUA O FA’AMANU

I aso a la ua leva, na iai se loomatua e igoa ia Fa’amanu, ma sa o la nonofo ma sana tama teine i se tama’i faleo’o i le tau fa’asi’usi’uga o le a’ai.

Ma sa masani lava ona avatu e tagata o le nu’u ia mea’ai ma mea’alofa e tausi ai le loomatua lenei o Fa’amanu ma lana tama teine.  Ae peitai, ua amata ona le toe amana’ia e tagata o le nu’u ia le loomatua ma lana tama.  Ua pisi lava le tagata ia i le tausiga o lona aiga, o galuega faalelotu aemaise o tiute faalenu’u, ua amata ona fa’agalo ai le loomatua ma lana tama teine, e tagata o le nu’u.

Ua avea lea tulaga ma mafua’aga ua amata ona tupu ai le ita i le loto o le loomatua o Fa’amanu ma ua amata ona ia mafaufau i se auala e taui ma sui atu ai i tagata o le nu’u.

O lenei loomatua o Fa’amanu, e leai seisi e na te iloa, e iai sona mana faapitoa.  

O le tasi aso, sa faapea ona fa’aloloa atu ai lima o le loomatua i le la ma ia valaau leotele atu i le la, ina ia ‘aua nei toe susulu ma ia ‘aua ne’i toe pa’u mai se timu, ina ia pe pe uma fa’atoaga ma la’au o le nu’u.

E le’i umi ona faia e le loomatua o Fa’amanu lenei tatalo, ae va’aia le pogisa o le lagi, ua punitia e ao ia le la.  Ma ua amata ona ma’alilili ia fa’atoaga ma la’au a le nu’u.  Ma e o’o lava i se timu e fa’asu su ai la’au, ua leai.  

Ua savali i le lua vaiaso o faapea lava le tala o le tau ma ua va’aia le pe pe o fa’atoaga ma la’au a le nu’u.  

E o’o lava fo’i i tuli manu o le nu’u sa o atu e saili mai ni manu e fafaga ai o latou tagata, ua toe fo’i mai ua leai ma se mea’ai.

Ua amata ona alaga atu ma loimata ia tagata o le nu’u i o latou taitai po o matai ma sa faapea ona sulufa’i atu nisi i o latou tuaoi, mo se fesoasoani, ona ua o’o mai le galala i le fia a’ai.

Ae i se nu’u e fai sina mamao mai i le nu’u lea o lo’o tupu ai lenei mea, sa nonofo ai se au uso, o Feleti ma Falani.  Ma na o’o atu ia i la’ua ia tala e uiga i lenei nu’u o lo’o manaomia se fesoasoani.

Ua manatu i le auuso lenei, o le a o e fesoasoani ma sa fautuaina i la’ua e lo la tama, ina ia fa’aeteete ona e foliga mai o lo’o iai se mana i totonu o lenei nu’u, ua faapea ona fa’asalaina ai i latou.

Ma sa fa’atonuina e le tama o nei alii, ia o la o muamua e va’ai se toeaina atamai e igoa ia Sama ina ia mafai ona maua mai ai se fesoasoani mo la’ua.

Ua faapea ona faia e Feleti ma Falani, e pei ona sa fautuaina ai i la’ua e lo la tama.  Ma ina feiloai lenei auuso ma le toeaina o Sama, sa lapata’iina i la’ua e le toeaina i le auala e mafai ai ona manuia a la taumafaiga.

Sa fa’atonuina lenei auuso e le toeaina o Sama, e na o le pau lava le auala e mafai ai ona o fa’amanuiaina a la taumafaiga, pe afai e la te fa’aalia lo la agaga alofa ma le loto fa’aaloalo i so’o se tasi e latou te fetaui.

[IA MANUIA FUAFUAGA O TOTOE O LENEI VAIASO]