E FAI O LENEI AE O LENA

“O LE TEINEITITI FAATAU AFITUSI ”

Ua amata ona tagi alisi o le afiafi.  Ua lagona foi le malulu o le agi mai o le savili.  Ua toe manava galuega ma ua toe foi tagata i o latou fale aua se taumafataga mafanafana ma se malologa i lalo o ie’afu mafanafana.  Ua tapuni uma faleoloa ma pisinisi mo le po.

Ae na vaaia le savalivali lemu a se teineititi, e i le va o le 8 ma le 10 tausaga le matua.  E fai o le leai o se pulou e faamafanafana ai lona ulu, ae ua leai foi ni seevae i ona vae.  E le iloa po o ai le maula na sola ma seevae a si nei alualutoto.  

Ua savalivali atu lenei teineititi e saili se faapaologa mafanafana e nofonofo ai.  Ua fefe e toe fo’i i lona aiga, ona o lea ua po le mea ae e le’i taulia lava sana afitusi na sau e faatau atu i tagata.

Ua nofonofo lenei teineititi ua mole i le fia ai.  Ua na ona tu’u i luga o lona isu ma sogisogi i le manogi eseese o meaai a aiga lata ane, ua sasala mai.  Ua faapupu’u i le malulu ma taumafai e ufiufi ona vae i le malulu.

Ua ia tago i totonu o le taga o lona ofu talaloa ma to mai i fafo se pepa afitusi ma sei mai i fafo se afitusi.  Ma ua tosi le afitusi ma mumu.  Ua pulato’a le teineititi i le susulu ma le mafanafana o le afi.  O lenei tama’i afi, ae i le malulu tele o le teineititi, na pei lava o lo o saofa’i i luma o se afi tele, lona mafanafana.

E amata loa ona lagona e le teineititi le mafanafana o ona vae, ae pe loa le afitusi.  Ua amata ona toe malulu mai lona tino.

Ua toe tago le teineititi i leisi afitusi ma toe kosi ma ua amata ona faasolo mafaufauga o le teineititi ina ua ola le afi o le afitusi.  Ua ia vaaia se laulau ‘ai, ma le tele o mea’ai eseese i luga o lea laulau ‘ai.  Ae toe pe loa le afitusi.

Ua toe kosi leisi afitusi ma vaaia e le teineititi, la’au kerisimasi i le ola o le afitusi lona tolu.  O le fe’emo’emoa’i o moli lanu eseese o le la’au kerisimasi. Ma o le a’apa atu o le teineititi e tago i se tasi o moli felanulanua’i, ae toe pe le laau afitusi.

O le toe ola o leisi la’au afitusi, na vaaia e le teineititi le tupu maualuga o le la’au kerisimasi, seia o’o lava ina tau le tumutumua’i i luga o le lagi, i le mea o fepulafi mai ai le anoanoa’i o fetu eseese.  Na pa’u mai se tasi o fetu ma mumu atoa ai le mea o tu ai lenei teineititi.

“Ai ua maliu se tasi,” o le manatu lea a le teinetiti.  Aua sa faamatala atu e lona tina matua ia te ia, a pa’u mai se fetu mai le lagi, o lona uiga, ua aga’i atu se agaga i le lagi e fetaiai ma le Atua.

Na toe faamumu e le teineititi seisi la’au afitusi ma ia vaaia ai lona tina matua ma ia tagi atu ia te ia, e alu ma ave o ia.  Ua tagi le teineititi ma faapea atu i lona tina matua, “E te nimo foi pe a pe le laau afitusi, e pei lava o meaai, ma le laau kerisimasi ma le mafanafana, e mou ese atu pe a pe le afitusi.”

Ua tago le teineititi ua faamumu uma afitusi ona o lona naunau ia le nimo ese atu lona tina matua.  Ma ona o le tele o la’au afitusi ua faamumu e le teineititi, sa maualuga le mumu o le afi ma sa vaaia e le teineititi le liua o lona tina matua i se tamaitai lalelei tele ma ua tago mai lenei tamaitai lalelei ua u’u atu lona lima, ma na lagona e le teineititi lona fiafia tele, ua le toe maalili, ua le toe fia ‘ai, ua le toe fefe, aua o lea ua o la agai atu e faatasi ma le Atua.

Ae ina ua vivini toa o le taeao, ua alu a’e i luga le mata o le la.  Na maua atu ai lenei teineititi e tagata o le nu’u, ua maliu o ia, ae o lo o faalagolago i le pa o le fale sa nofonofo ai ma ona foliga o lo o ata.

IA MANUIA TOE FUAFUA O LENEI VAIASO!