E FAI O LENEI AE O LENA

 O LE TAUMAFATAGA TELE A UROSA

Sa iai se toeaina sa nofo i se nu’u mamao lava.  Ma sa va’aia e lenei toeaina le ta’itasi ma tu’ua e tagata o lona nu’u ia le nu’u, ma faimalaga atu i isi nu’u tuaoi ma nonofo ai.  Sa o’o lava i lona aiga, ua faapea foi ona malaga ese atu, ae ua tu’ua ai na’o ia.

Ua a’e se manatu i le toeaina o le a alu foi ma ia.  Ae ia toe mafaufau ifo, afai ae alu ‘ese atu ae vaai mai tagata o le nu’u lea o le a ou alu ai, na’o a’u lea alu atu, e latou te manatu nei, o lea ou te sola mai i sa’u mea sese na fai.

Ona toe oso a’e lea o se manatu faapea a le toeaina, “Leai, lea o le a ou alu i le vaomatua, ou te nofo toatasi ai na’o a’u.”

Sa alu ma le fa’anoanoa le faigamalaga a si nei toeaina na’o ia.  Ua oso ane ni ona manatu e faapea, sa sili ai ona alu i le ‘a’ai lata mai lea o lo’o nonofo ai ni Urosa, ina ia fasiotia o ia e Urosa ma ia le toe tau popole ai i lenei olaga.

Ua savali nei le toeaina i le auala e agai atu i le ‘a’ai e nonofo ai Urosa ma ia ta’oto loa i lalo, ma lona manatu, a maua mai o ia iina e Urosa, o le a mafai ona i’u ai iina lona ola.

E le’i umi lava ae fa’alogoina e le toeaina le ga se mai o la’au ma ia tilotilo atu, ua agai mai se Urosa lapo’a toe maualuga.  Ua oso le fefe o le toeaina ma ia manatu ifo faapea, “Ou te le o fia oti.”

Ua te’i le Urosa i le tu fa’afuase’i i luga o le toeaina ma faapea leotele atu, “Na ou sau e valaaulia outou i sa’u aiga tele o lo’o tapena.”

Ua le iloa e Urosa pe feita pe talie, i le toeaina ma lana faamatalaga.  Ona toe faapea atu lea o le toeaina, “Na ou sau e valaaulia atu outou i se aiga tele, ae a faapea o le a outou fasiotia a’u, ia ua sili ai foi lena.  Ua leai nisi o lo’u aiga, ua leai foi ni a’u uo, ua toe na’o a’u.”

Ua liliu atu nei le Urosa pito sili ona lapo’a ma maualuga ma ‘e’e atu i isi urosa, ona o latou toe liliu uma lea ma toe fo’i atu i le mea na o mai ai.

Sa le’i toe faatali le toeaina ae ua pefu agai i lona fale.

Na taunuu’ le toeaina ma to lona sela ma ia mafaufau faapea, afai o le a o mai Urosa on aua ou valaaulia e o mai, e tatau ona ou sauni se mea’ai.  Ua pisi nei le toeaina i le faamamaina ma le kukaina o mea’ai eseese.

Ai ona o le manogi o le kuka a le toeaina, sa fa’ate’ia ai o ia ina ua tu’itu’i atu lona fale ma ia tatalaina mai, ma ia va’aia ai nisi o tagata o lona nu’u, o tu tu atu i fafo o le faitoto’a.

Ae ina ua faamatala iai e le toeaina le mafuaaga o lo’o pisi ai, na tete’i tagata o le nu’u ma lau lona lavea ma le tatalaina o lona fale e o mai ai Urosa.

Ua alu loa le toeaina ma tatala ese lona mitiafu sa ofu ai, ae valu lona fatafata lanu mumu.

O le afiafi lava lea, na o mai ai loa Urosa i le fale o le toeaina.  Ua toe sosola ese uma tagata o le nu’u ae na o le toeaina sa tu i luma o le faitoto’a o lona fale, e faatali ana malo fa’aaloalogia.

Na fa’aulufale atu e le toeaina ia nei manu i totonu o lona fale, ma ia faanofo le taitai o manu i le nofoa i le ulu o le laulau.  

O se aiga maoa’e le taumafataga sa laulauina e le toeaina mo ana malo fa’aaloalogia.

Ina ua mae’a loa, ona ta’itasi ma tu tu i luga Urosa ma savavali mai i le toeaina ma saeto lona fatafata, le mea lea sa vali e le toeaina i le vali la lanu mumu.

Na lagona e le toeaina, e pei ua alu ese atu ai ma lona loto faanoanoa i le gaioiga a nei Urosa o lo’o faia.

Ona malaga ese atu loa lea o Urosa.

O le aso na soso’o ai ae alu atu le urosa pito laititi lava ma ina ua taunu’u tonu lava i luma o le fale o le toeaina, sa fa’ate’ia le toeaina ina ua vaai mai, ua liu le urosa i se tamaititi ma ia faamatalaina i le toeaina o ia, sa fanau mai i nim atua ae peitai, sa aveina o ia e Urosa nei i lona laititi.

Ma sa faamatala foi e le tamaititi, ina ua mae’a le taumafataga anapo, sa e faalogoina le talanoa o le Urosa pito sili ona matua o i matou.  O lea sa fai atu o ia i le toeaina, e tutusa la’ua, o ia foi ua matua ma ua leai foi ni ana uo.  Ma e na te malamalama lelei i lagona o le toeaina.  Ma sa mana’o i le toeaina, o so’o se taimi lava e na te lagonaina ai le agaga fa’anoanoa, ia ona mafaufau atu ia te ia – le taitai o Urosa.

Sa amata mai lava i lena aso, so’o se taimi lava e fai ai se aiga tele a le nu’u, e latou te valaaulia ai Urosa mai i le vaomatua ma amata ai ona faia se faigauo mafana i le va o le nu’u ma Urosa o le vaomatua.

[IA MANUIA TOE FUAFUAGA O LENEI VAIASO]