E FAI O LENEI AE O LENA

O LE MASIOFO MA LE ISUMU

I aso a la ua leva, na osofa’ia ai e se tupu leaga se malo tuaoi, ma ia ave fa’atagaotaua ai le Masiofo o lea malo, ma lana pepe po o se Purinisese, ma loka i la’ua i se potu pito i maualuga i totonu o lona maota.

I totonu o le potu sa lokaina ai le Masiofo ma lana pepe, sa na’o le tasi lava le laulau sa iai ma se moega e fau i laupapa.

Ona a’ami lea e le tupu ia se fa’ataulaitu e nofo i se togavao lata ane i lona maota ma ave i luga o le potu o lo’o loka ai le Masiofo ma lana pepe.

Na va’ai alofa le fa’ataulaitu i le Masiofo i le tulaga pagatia ua o’o iai, ma ina ua punou ifo le faataulaitu e kisi i le lima o le Masiofo, e pei o tu ma aga i ia nu’u ma malo, sa ia musumusu atu i le Masiofo, “Ia e lototele, pei uma lava ua ou iloa le auala e mafai ona fesoasoani ai ia te oe.”

Ua faapea atu le tupu leaga i le fa’ataulaitu, “E tasi lava le mea na ou aumaia ai oe i luga i’i.  Ou te mana’o e te ta’u mai pe agava’a lenei pepe, e faaipoipo atu i lou atalii, le Perenise, pe a matua o ia.”

Sa lue le ulu o le fa’ataulaitu ma faapea atu i le tupu leaga, “Ioe, lau afioga i le tupu.  O lenei Purinisese o le a ola ma tuputupu a’e o se tamaitai amio tausa’afia ma le aulelei ma o le a agavaa o ia e nofoia le nofoalii.”

Ua faapea mai le tupu leaga i le masiofo, “Ua e laki semanu e fasioti lava lau pepe i le po lenei.”

E le’i umi ae o latou faalogoina le ‘e’e mai o le Perenise i lona fa’atonutonuina o auauna o le maota o le tupu.  Ua faapea ona alu ese atu le tupu e tali mafatiaga a lona atalii, ae ua tu’u ai nei na’o le Masiofo ma lana pepe.

Ua tagi le Masiofo ma faapea, “E mafai faapefea ona ou tu’u atu si a’u tama e faaipoipo i le atalii o lenei Tupu le alofa?  Ou te mana’o e ave o ia e fa’alafi i se mea.”

Ae ua fiu le Masiofo e tau autilo se mea e nana ai si ana pepe, ae e fai o le laititi o le potu, ae pa sima uma ona itu e fa.

Ua alu aso, sau aso.  Ua tuputupu a’e lava le Purinisese.  Oka se pae’e aua e na’o le pau lava mea’ai e fafaga ai la’au ma le Masiofo, o sina fasi falaoa uliuli ma pinati e tolu. 

Ua o’o i se tasi afiafi a’o nofonofo le Masiofo i lana masini lea e faafaigaluega ai o ia e le tupu leaga, i le gaosia o vulu e fai ai lavalava, sa va’aia e le Masiofo ia se isumu, o oso mai i se pu i se tulimanu o le potu.

Na umi se taimi o mata’i e le Masiofo ia le isumu ona ia faapea atu lea iai, ‘E Talofa e, e matua’i sese lava le potu lea e te sau e te su’e meaai mai ai.  Ona e leai lava se meaai i totonu o lenei potu.”

Ae peitai, ua tamo’e atu le isumu i leisi tulimanu o le potu, ona toe tamo’e mai lea i leisi tulimanu.  Ona fa’ata’amilomilo lea o le isumu e pei o lo’o siva mai i le Masiofo.  Ua ata leotele le masiofo ma patipati ona lima, ona ia tago lea ua tu’u atu i le isumu lana pinati mulimuli lava.

Ae e le’i umi ona tu’u atu e le Masiofo le pinati i le isumu, ae tutu mai ni ipu polesi se lua ma ni ipu fualaau e pei o apu, pea, fa’i pula, i luga o le laulau.  Ua ofo tele le masiofo ma ia tago atu i le tofo le polesi ma fualaau, oka se manogi ma le manaia.  

Ua tago atu nei le Masiofo i le palu faatasi ia nisi o fualaau ma le polesi ma fafaga ai le Purinisese.  O mea na totoe, sa ia toe tu’uina atu i le isumu e ai ai le isumu.

O le taeao na soso’o ai, na toe momoli mai ai foi e auauna a le tupu leaga ia le meaai a le masiofo ma le purinisese, ia a la pinati ma falaoa lanu uli.

E le’i umi lava ona alu ese atu le auauna a le tupu leaga, ae liua ia nei meaai i mea’ai manogi ma le eseese.  Sa faapea ona a’ai fiafia le masiofo, le purinisese ma le isumu.  

I se tasi o po, a’o nofonofo le masiofo i le masini e gaosi ai vulu mo le maota o le tupu leaga, sa ia manatunatu i le tulaga o lo’o la iai ma si ona alo tamaitai, ona tagi lea o le masiofi ma faapea ifo, “Maimau pe ana iai se auala e mafai ai ona ma sosola ese ma si a’u tama.”

Na fa’ateia le masiofo ina ua va’ai atu i le tulimanu o le potu, o lo’o ta’alo mai ai le isumu i ni vao malo.  Ua savali atu nei le masiofo ma ua tago u’u faatasi ia vao nei, ma fili pei o le filiina o se lauulu.

Ua faapea ifo le masiofo, a tele ni vao e mafai ona ou maua, e mafai ona ou filiina se ato e mafai ona tu’u iai le purinisese ma tu’u i lalo i fafo o le faamalama, atonu o le a maua e se tagata alofa ma fa’asaoina o ia.

E le’i uma lelei atu mafaufauga a le masiofo, ae ona vaaia le toe sau o le isumu ma toso mai nisi vao.  Sa faapea loa ona galue le masiofo i le po atoa i le gaosia o se ato vao.

Ina ua mae’a, sa tilotilo ifo le Masiofo i lalo o le faamalama ma ia tu’uina loa le purinisese i totonu o le ato ma tu’utu’u lemu ifo loa i lalo.  Ae o le taimi lea, na savali ifo ai loa se fafine i lalo tonu lava o le faamalama ma ia iloa atu le ato lea o lo’o tu’utu’u lemu ifo i lalo e le masiofo.

Na valaau lemu mai lava le masiofo i le fafine, “Faamolemole, se’i e lavea’i i si a’u tama.”

[IA MANUIA FUAFUAGA O LENEI VAIASO]