E FAI O LENEI AE O LENA

O LE ASINI NA AVE I LE MAKETI

I aso a la ua leva, sa iai se faifa’ato’aga ma sona atalii ma se la Asini pepe.  Ma sa tausi faapelepele e le faifa’ato’aga ma lona atalii ia lenei asini se’ia o’o lava ina matua ma peti le asini.

O se tasi o aso, na faapea atu ai le faifa’atoaga i lona atalii, “Ua o’o i le taimi e tatau ona ta o ai e ave le ta asini i le maketi.”

Na ioe le atalii, o le a o e ave le la asini e faatau i le maketi.  Ae o le faafitauli, e fai lava sina mamao o le maketi.

Na fai sina umi o talatalanoa le faifaatoaga ma lona atalii, i se la fuafuaga aua le la faigamalaga.  Aua sa o la ioe faatasi, i le mamao o le maketi, e o’o atu iai, ua lelava le asini.

O lea na fai ai le la tonu, o le a fai se amo e tautau ai le asini, ae o la tofu ma le pito o le amo, e amo le asini i le maketi.  Ona le lelava ai lea o le asini.

Ua faapea loa ona fai ma ua alu nei le faigamalaga a le faifa’ato’aga ma lona atalii, ma le asini lea e amo atu.

E le’i umi na alu le savaliga a le faifaatoaga ma lona atalii ae o le va’aia le tutu o tagata i luga o le auala ma talie mai ia la’ua.

Na vala’au mai se toeaina, “Sole, o le a le lua mea na e fai?  O lena ua lua tauaveina le asini, ae o le galuega lena a le asini, e tatau ona tauave oulua.”

Ua tutu nei le faifaatoaga ma lona atalii ma tatala le asini.  Ona faapea atu lea o le faifaatoaga i lona atalii, “E le mafai ona ta tietie toalua i luga o le asini, leaga e tigaina ai le asini.  Ae sili lou sau e tietie i luga o le asini, ae o lea o le a ou savali atu i autafa.”

Ua faapena ona fai.  Ua tietie nei le atalii i luga o le asini ae savalivali atu le faifaatoaga i ona autafa.

E le’i umi foi ona alu le savaliga a le to’alua lea, ae o la tau atu foi i tagata i autafa o le auala.  O lo’o talie foi ma faasinosino lima mai ia la’ua.

“Sole!” o le valaau mai lea a se loomatua i le atalii a le faifaatoaga.  "E iai sou faiai?  E faafefea ga e ki’eki’e i le asigi ae faasavali lou kama?  Oi kafefe, se’i vaai lou kalavou ma lou malosi, ae e ke ki’eki’e i le asigi, ae ke le vaai alofa i lou kama ua makua!”

Na vave ona toe oso i lalo le atalii ma faapea atu i le faifa’atoaga, “Tama, sau oe e ti’eti’e atu i le asini ae o lea o le a ou savali.  E sa’o le loomatua, e lelei a’u ou te laititi ma lava lo’u malosi, ou te savali ai.”

Ia ua fesuia’i loa le faifaatoaga ma lona atalii.  Ua ti’eti’e nei le faifa’atoaga i le asini, ae savalivali atu ai i tua ia le atalii.

E le’i umi foi na alu le faigamalaga a le to’alua lea, ae pasi atu se vaitafe, o nofonofo ai ni tamaitai.

Na lagona lelei atu lava e le faifa’atoaga ia tala a le au tamaitai ia, o fai mai ia te ia.  “E ofo i le la toeaina ma lona le alofa i si ona atalii.  Faasavali i lenei mugala, ae faamaepaepa o ia i luga o le asini.  E le o se matua alofa lea tagata.”

Ua tutu nei le faifaatoaga ma lona atalii ma la faapea ifo.  “E le o sa’o lava le ta mea lea o lo’o fai.  O le tonu, ta tau fai ti’eti’e uma i luga o le asini.”

Ona faia foi lea o lena tonu.  Ua feosofi uma le faifaatoaga ma lona atalii i luga o le asini ma alu le la tietiega agai i le maketi.

Ae e le’i umi foi, ae o la tau atu i se tamaloa, ua fesili mai.  “O fea a lua agai iai ma le lua asini?

Na tali le faifa’ato’aga, “O lea ma te o atu e ave le ma asini e faatau i le maketi.”

Ua ‘ata le tamaloa ma faapea, “Ia ailoga a maua se tupe tele i le lua asini, o lena o le a pe i lo lua mamafa.  Ae a pe a lua feosofi mai i lalo ae faasavali le asini, atonu e tele se lua tupe e maua mai ai.”

Ua tutu nei le faifa’atoaga ma lona atalii ma la talatalanoa ma sa faapea mai le faifa’ato’aga, “Po o le a lava le ta gaioiga e fai, e iai lava le tagata a faitio.”  Ua oso atu lona atalii ma faapea atu, “E moni lava oe, tama.  E sili ai lava ona fai le mea e ta te malilie ai, ae ‘aua nei o ta toe faalogo i seisi.”

Na malilie loa le faifaatoaga ma lona atalii, o le a la savavali ae ta’ita’i le la asini i le maketi.

[IA MANUIA FUAFUAGA UMA O LENEI VAIASO]