E FAI O LENEI AE O LENA

O LE ISU LAPO’A

I aso a la ua leva, sa iai se faataulaitu ma sona isu lapo’a lava.  O se tasi aso, ona o le fia malie o le tupu, na ula ai i le isu a le fa’ataulaitu.

O le ita tele o le faataulaitu, na tu ai i luma o le tupu ma tusi atu lona lima tusi ma ia faapea atu i le tupu, “O le a iai se aso o le a fanau mai ai se Perenise ia te oe ma lou masiofo.  Ma o le a fanau mai lenei Perenise ma isu lapo’a foi, o le a sili atu lona lapo’a i lo lou gutu lapo’a.  Ma o le a tumau ai le isu lapo’a a le Perenise se’ia ona iloa le mataga o lona usi.”

Ua nofo nei le tupu ma mafaufau faapea, “Ou te iloa e vave lava ona mou ese le isu lapo’a a lo’u atalii aua lea e fai mai le fa’ataulaitu e na te iloa loa le mataga o lona uso, alu ese loa.  O lona uiga, afai e lapo’a faapea le isu a le Perenise, o le a mafai ona ia va’ai iai i taimi uma ma o le a mafai foi ona ia tago iai i ona lima.”

Ma ua o’o loa i le tasi aso, ua fanauina ai e le Masiofo ia se Perenise aulelei tele.  O ona mata e lanumoana pei o le moana o le sami.  Ae paga lea, e ui i le aulelei o si perenise, ae peitai, na tagi aueue le masiofo ina ua na vaai i le isu a si ana tama.  

Na taumafai auauna a le masiofo e fa’amafanfana i le masiofo ma o latou faapea atu ai, e foliga le isu o le perenise, o se isu o se fitafita Roma ma o lo’o tumu tusi o talafaasolopito i ata o fitafita Roma ma isu faapea.

Ua tuputupu a’e nei le Perenise ma ua fa’asa so’o se tasi e laititi lona isu, ona latalata pe va’ai iai le perenise.  O auauna uma e galulue i totonu o le maota o le tupu, ua fai a latou isu faapipi’i tetele ina ia le iloa ai le eseesega o latou isu ma le isu a le perenise.

Na o’o lava i ata o tagata sa tautau solo i totonu o le maota o le tupu ma le masiofo, ua vali uma o latou isu ina ia tutusa ma le isu a le perenise.  A’o tuputupu a’e le perenise, sa ia a’oa’o i tala faasolopito o malo tuaoi ma o so’o se taimi lava e talanoaina ai perenise ma purinisese o malo tuaoi, e manatua lava e le faiaoga a le perenise ona ta’u i le perenise, e tofu uma latou ma isu lapopo’a.

Ma ua avea lenei tulaga ma mafuaaga na ola a’e ai le perenise ma ia manatu e leai se mea o leaga i lona isu.

Ua o’o ina aulia le 20 tausaga o le perenise ma ua manatu le masiofo, ua tatau ona fai sona toalua.  Ma ia faatonuina ai ana auauna ina ia ave atu uma ata o purinisese o malo eseese, se’i va’ava’ai ai le perenise ma filifili ai sona to’alua.

Na faapea ona fai ma o se tasi o ata na ave atu i luma o le masiofo, o le ata o le Purinisese o Rosa.  Ma ina ua vaai le perenise i le ata a Rosa sa faapea ona gagau atu iai lona loto.  Ae peitai, o le purinisese o Rosa, e fai lava sina laititi o lona isu.  Ae peitai, sa le’i amanaia e le perenise lea tulaga, ae ua ia aveina atu loa le fe’au i le tama o Rosa, ua ia fia faaipoipo atu i lona afafine, le purinisese o Rosa.

Ua talia e le tupu, le tama a Rosa ia le fanoga a le perenise ma ua tapena nei le perenise e alu malaga i le malo o iai Purinisese Rosa.  Ina ua taunu’u le perenise sa faapea ona tamo’e mai le purinisese o Rosa e fa’afeiloa’i o ia, ae peitai na faafuasei ona ‘emo le uila ma tum ai ai i le va o le perenise ma Purinisese Rosa ia le fa’ataulaitu lea sa fetu’uina le isu o le perenise.

Na o le tasi lava o le gaioi a le faataulaitu, ma nimo ai loa le purinisese.  Ma ua folafola nei le perenise, e le toe fo’i atu i lona malo se’ia toe maua mai Purinisese Rosa.

Ma o lea na toe oso ai i lana solofanua ma agai atu loa na o ia e saili mai Purinisese Rosa.  E tele ni nu’u ma malo na afea e le perenise i le sailiga o purinisese Rosa ma i nu’u ma malo uma sa ia afea, sa ia maitauina ai lava le fe’atai ma tusitusi lima mai tagata i lona isu.  Ae peitai, i le loto faamaualuga a le perenise sa ia manatu ai, o le lotoleaga o nei tagata i lona isu lapo’a ma le aulelei, pe a faatusatusa i o latou isu laiti, le mafuaaga o le latou amio.

O se tasi aso na tau atu ai le perenise i se fale maualuga lava.  Ma ina ua a’ea e le perenise sitepu o le fale e tau lava i le potu maualuga, sa ia maua atu ai lana purinisese, o loka mai i se potu e puipuia i le aisa.  Na fiu le perenise e tata’e le aisa, ae peitai, sa le mafai ona o le malo o le aisa.

Ua taumafai nei le purinisese e falo mai ona lima e opo atu ia le perenise, ae peitai, sa le au mai i fafo ona lima.  Ona taumafai lea o le perenise e tu’u atu lona laugutu e sogi atu i le purinisese ae peitai, e na o le taia o lona isu i le pa aisa.

Ona faapea lea o le perenise, ‘se lenei isu matua’i tele tele!”   Ma o le taimi lava na fai ai le tala lea a le perenise, na mou fa’afuase’i atu loa ma le pa aisa sa lokaina ai purinisese Rosa.

[IA MANUIA TOE FUAFUAGA O LE VAIASO]