E FAI O LENEI AE O LENA

O FUAMOA AURO E ONO

Sa fesili le teine o Fala i si ona tama matua, po o le a se mea e mafai ona ia a’oa’oina atu ia te ia, e aoga mo lona tuputupu a’e.

Na umi se taimi o taumafaufau le toeaina o Petelo ma ia faapea atu loa i le teine o Fala, ae na te le’i ta’uina atu se mea aoga mo lona tuputupu a’e, e tatau i le teine ona ia faia se mea e mafai ona mata’i mai ai o ia e tagata uma.

Na ata le teine o Fala ma fesili atu i si ona tama matua, po o le a le mea o lo’o mana’o e na te faia.

Na toe nofo le toeaina ma toe mafaufau ona ia faapea atu lea, “Alu e ta’u uma i a tatou tuaoi o lea ua tu’ufua la’u pato sinasina, ma e ono ana fuamoa auro.  Ona fai lea iai, e ta’i miliona le tau o le fuamoa e tasi ma a mae’a ona ou fa’atauina uma nei fuamoa, o le a avea a’u ma milionea.”

E ui ina le malamalama le teine o Fala i le misiona ua tuli ai o ia e lona tama matua, ae ua usita’i lava ma alu e fa’asalalau le tala e uiga i fuamoa auro a si ona tama matua.

Ina ua mae’a le galuega a le teine o Fala, na toe fo’i mai i le fale ma o la fa’atalitali ma lona tama matua, ae na alu lena aso ma le po, e leai ma seisi o a latou tuaoi na o’o atu e fa’amalo i le toeaina, pe fai se fiafia ona o le manuia ua maua e le toeaina.

O le taeao na soso’o ai, sa toe faatonu ai loa e le toeaina si ona afafine laititi, e alu e fa’asalalau le tala i ona tuaoi, ua pe le pato, ona o se gaoi na osofa’ia le latou fale i le po, ma ua gaoia uma fuamoa auro.

Na faapea foi ona fai e le teine o Fala.

Ma e le’i umi ona toe fo’i mai Fala i le fale ua mae’a lana talaiga, ae fa’ate’ia i la’ua ma lona tama matua, i le lolofi atu o a latou tuaoi.

Ua fesili le teine i si ona tama matua, pe aisea a’o lea e leai ma nisi na o atu ananafi.

Na ata le toeaina ma faapea atu i le teine o Fala, “A faalogo tagata i ni tala fiafia e uiga ia te oe, ona o latou fifilemu lea, ma le amana’iaina.  Ae a latou faalogoina ua tupu se mea leaga ia te oe, ona latou lolofi mai lea e vaai pe moni.  E faafaigata i tagata ona fiafia i lou alualu i luma po o lou manuia, ae fiafia e o mai e va’ai pe a tutupu ni ou mafatiaga.”

Ona tago atu lea o le toeaina ma opo mai si ona afafine ma faapea atu iai, “O le lesona lea ua ou fia a’oa’oina atu ia te oe.  E toatele ni tagata e le fia va’ai o e manuia po o e alualu i luma.  Ae e taua ona e manatua, e le mafai ona e pulea uiga po o manatu a tagata.  Ae ia aua ne’i avea lea ma tulaga e taofia ai lou ola lelei pea o oe ia.  Aua e te popole tele i mea a tagata o fai.  Faatu au oe sini ma e galue malosi ina ia ausia. “

[IA MANUIA TOE FUAFUAGA O LE VAIASO]