E FAI O LENEI AE O LENA

O LE AIGA TELE

Na asiasi atu le tamaitai o Anela i totonu o le potu o lo’o tausi ai le fanau iti, ma e to’afa i latou o lo’o saofafa’i mai faatali’oli’o i luga o le foloa, ma mata fa’anoanoa ma le popole.

“O le a le mea ua tupu?” o le fesili atu lea a Anela.

“O lea matou te manana’o e fai se matou aiga tele,” o le tali mai lea a le tamaititi e ana le potu moe lea o lo’o latou faapotopoto ai.

“Oka se manaia o lena manatu,” o le oso fiafia atu lea a Anela ma patipati ona lima.

“Ae paga lea, e na o le tasi le matou kuki lea e matou te faatali’oli’o ai,” o le toe tali mai lea a le tamaititi e ana le potu.

Ae oso mai lona tausoga ma faapea mai, “Ae o le laititi ia o lea kuki.”

Ae o leisi to’alua, o lo’o le nofonofo lava ma mata’i le kuki lea e i luga o le ipu, i le ogatotonu o le latou li’o.

“E mafai ona fai pea le tatou aiga,” o le tala fiafia lea a Anela.

Ma ia tago atu ma u’u mai le kuki, ma tofitofi ona tofu lea o le tamaititi ma le fasi kuki.

 Ona ia faapea atu lea i tamaiti nei e to’afa, “Vaai, o le fasi moa lena e tou te u’uina i tou lima, ua uma ona falai faalelei.  Ma le mauga a pateta e ina’i ai.  O e iloa atu?” ona ata leotele lea o Anela.

“Oi ioe, lea ua ou vaai atu iai,” o le oso fiafia mai lea o le ui’i o le to’afa lea.

Ua liliu atu Anela i leisi alii na i ona tafatafa ma faapea atu, “O le mea na e te u’uina, o se fasi pai.  Se’i vaai i le manaia o lona enaena, ae o le ogatotonu o lo’o iai se moa, pua’a ma se sosi manaia ma ni fuamoa.  E a? Ua e tofo la i se pai faapena?”

“E leai,” o le tali lea a le tamaititi.

“Ia tago loa e tofo,” o le faapea atu lea a Anela.

O le lona tolu sa fai atu iai Anela, “O se keke lapotopoto le mea na e te u’u i lou lima.  Oka se manaia o le kulimi lena e faapata ai.  Ae o totonu, o lo’o iai ni pinati.  Oka se manaia.”

Ona liliu atu lea o Anela i le lona fa ma faapea atu, “Ae o oe, o se aisikulimi lapiti lena e te ‘aia.  O e iloa atu le lapiti lanu paepae ma ona mata suamalie?”

“A ou fai atu loa, tasi lua tolu, ona ‘ai loa lea o le tatou aiga tele,” o le tala lea a Anela ma amata ona pati pati ona lima ma faitau.

“Tasi! Lua! Tolu!” ona a’ai loa lea o le vaega lea.

“Oka se manaia!” o le fe’ei fiafia lea a nei tamaiti e to’afa.

[IA MANUIA TOE FUAFUAGA O LENEI VAIASO]