E FAI O LENEI AE O LENA

O SE’EVAE MUMU

I aso a la ua leva, na iai se teineititi aulelei lava, e nofo i se a’ai mamao lava.  O si nei teineititi, a o’o i le tau vevela ona fealua’i lea e leai ni se’evae.  Ae a o’o i le tau malulu, ona se’e lea e ia ni se’evae lapopo’a  lava.  Ma na avea lea ma tulaga na mumu ai le pito i lalo o ona vae.

Sa taumafai se tasi o tina matua o le nu’u, e gaosi se se’evae lanu mumu mo le teineititi.

Ma o le aso lava na mae’a ai ona gaosia e lenei tina matua ia se’evae mumu mo le teineititi, o le aso lava fo’i lea, na maliu ai le tina o si nei teineititi.

E ui lava la i le mumu sesega o se’evae a le teineititi, ae sa ia fa’amaulu lava mo le maliu o si ona tina ma mulimuli atu i le pusa maliu a si ona tina. 

A’o aga’i atu le savaliga a le nu’u mo le lagomauina o le tina a le teineititi, sa fa’ate’ia i latou ina ua fetaui ma se ta’avale tele lava, o toso mai e ni solofanua lapopo’a lava.

O totonu o le ta’avale, sa nofo mai ai se loomatua ma sa momomo lona loto i le vaai alofa atu i si nei teineititi ma on seevae mumu, o lo’o mulimuli atu i le pusa maliu a lona tina.

“Aumai le teine lena e fai ma a’u tama,” o le faatonuga lea a lenei loomatua.

Sa manatu le teineititi, ua mafua ona ia maua lea faamanuiaga ona o ona seevae fou lanu mumu.

Ae peitai, sa le’i fiafia iai le loomatua i seevae ia a si teineititi, ma ia faatonuina ana auauna, e susunu seevae ia a le teineititi.  Ae ua fa’aofu nei le teineititi i la’ei mama.  Ma a’oa’o ina ia iloa faitau ma su’isu’i.  Fai mai tagata, e ese ma le lelei o si nei teineititi.  Ae fai mai le fa’ata a le teineititi, e sili atu lona aulelei.

O se tasi aso, na malaga atu ai le loomatua lenei ma le teineititi, e asiasi le maota o le tupu.  Ma o iina na vaaia ai e le teineititi ia le purinisese, i ona la’ei papa’e ma ona se’evae mumu.  Na sili atu ona aulelei atu seevae mumu a le Purinisese, i lo se’evae a le teineititi lea ua susunuina.

Ina ua mae’a ona asiasi atu le loomatua ma le teineititi i le maota o le Tupu, sa o la o loa e fua vae o le teineititi mo ni ona seevae fou.  Ma o iina na vaai ai le teineititi i se pea seevae lanu mumu manaia tele lava.

Ua mana’o le teineititi e fa’aofi ia seevae mumu, ae peitai, e le’i iloa atu e le loomatua e mumu le lanu o le seevae, semanu e na te le faatauina.

Ua o’o i le aso Sa, ua sikaili atu nei le teineititi i le falesa ma ona seevae mumu.  Ae tu’ua mai le lotu, ae otegia o ia e le loomatua.

“E le talafeagai le faia o ni seevae mumu i le lotu i aso Sa.  Amata atu nei, ia e fa’aaoga ou seevae uliuli i le falesa,” o le faatonuga lea a le loomatua.

Ua o’o i le aso Sa na soso’o ai, ua tu nei le teineititi i luma o ona seevae ma faasolo lana vaai.  A uma ona tilotilo i ona seevae uli ona toe tepa mai lea i ona seevae mumu.

Ma i’u ai lava ina ona ia toe tui ona seevae mumu ma agai atu loa i le lotu.

Sa matuai mimita lava le teineititi i le iila o ona seevae mumu, a’o la agai atu ma le loomatua i le falesa.

Ina ua toeititi lava o la taunuu i le faitotoa o le falesa, ae ‘etu’etu atu se toeina ma ifo atu ia I la’ua ma faapea atu i le loomatua, “E mafai ona ou fufuluina lua seevae, ona ua pefua uma i le auala.”

Ua oso atu le teineititi ma faaali atu ona seevae i le toeaina ma faapea atu, “Vaai i le manaia o o’u seevae.”

Ae faapea mai le toeaina, “Fa’aeteete ina ne’i le mafai ona taofia le siva o ou seevae.”

Ua ata le teineititi i lenei tala uiga ese mai i le toeaina.

Ina ua mae’a le galuega a le toeaina, sa faapea ona tu’uina iai e le loomatua se tupe, ma fa’aauau le la savaliga i totonu o le falesa.

Ua mata uma mai tagata i le loomatua ma le teineititi, aemaise lava seevae mumu a le teineititi.

Ina ua mae’a le lotu, ua savavali atu nei le loomatua ma le teineititi o le a feosofi i totonu o le la taavale, ae toe fetaui ma le toeaina lea sa soloa a la seevae.  Ma na toe si’i atu e le teineititi lona vae ma valaau atu i le toeaina, “Vaai i le manaia o o’u seevae siva!”

Ma sa faapea loa ona amata ona siva le teineititi, ua fiu e taumafai e taofi, ae ua le mafai.  Ua siva faata’amilo i le falesa ma i’u ai ina tamo’e atu le auauna a le loomatua e si’i mai i le taavale.  Ae ua le mafai lava ona taofi le siva o vae o le teineititi, na i’u ai lava ina ona solia vae o le loomatua.

[IA MANUIA LENEI VAIASO MA ONA FUAFUAGA]