E FAI O LENEI AE O LENA

O SE FAIGA UO A NI ALII SE TO’AONO

I aso a la ua leva, na iai ni alii talavou se to’aono, e mafana lelei le latou mafutaga.  O se tasi o nei alii, o se atalii a se taulasea, o leisi o le atalii a se faiaoga, o leisi o se atalaii a se faatauoloa, o leisi e iai le kamupani fau ta’avale a lona tama, o leisi e iai le kamupani fau mea fale a lona aiga, o le lona ono, o le atalii a se tamaloa vali fale ma le lona ono, o le aloalii a se tupu.

O nei alii na fananau uma lava i le aso e tasi, ma na tutupu faatasi uma a’e i le nu’u e tasi.  Ma ua matutua nei, ua o’o i le taimi e tatau ai ona fai ni o latou lava aiga.

Ae sa fai se latou tonu, o le a se’i o tasi lava e faimalaga atu i le lalolagi, atonu e iai se mea manaia e mafai ona o latou maua o le a mafai ona fa’aleleia atili ai o latou olaga.  A leai, e mafai lava ona toe fo’i mai aua e mau’oa uma o latou aiga.

Ua o’o i se tasi taeao, ua alu le faigamalaga a nei alii, ma sa o latou malaga faatasi, seia o latou taunu’u i se vai ta’ele tele lava.  Ma o lenei vaita’ele, o se vaita’ele e tau mai iai ni vaitafe se ono.  Ma ua tonu i nei alii, o le a tofu i latou ma le vaitafe, o le a latou mulimuli iai, po o fea e tau iai ma po o le a foi so latou taunu’uga e maua mai ai.

Sa faapea le manatu a le atalii o le taulasea, “O mai tatou te tofu ma toto ni la’au i autafa o vaitafe i le ‘auvai o le vai ta’ele.  Ma o le a ou faia se vaila’au e faatulutulu i luga o nei la’au, o ai lava e fetaui ma puapuaga i lana faigamalaga, o le a faapea ona pe lana la’au.  Ae o ai lava o i tatou e toe fo’i mai iinei ma vaai ua pe se la’au, e mafai ona alu atu pe o atu foi i latou, e fesoasoani.

Ua oso mai le atalii o le fomai ma faapea mai, “Ae a pe afai tatou te malilie uma, ina ia o tatou toe fo’i mai iinei pe a mavae se tausaga ma se aso e tasi.  Afai e tatou te vaai ua pe se la’au a seisi, e mafai ona o tatou o atu uma e fesoasoani i lea tagata.”

Ua malilie uma nei alii e to’aono i ia tonu ma ua faapena loa ona fai.

Ua mae’a ona toto la’au e ono, ua mae’a foi ona faia le vailaau e mafai ai ona iloa ai po o ai e ono manaomia se fesoasoani.

Ua lulu lima ma fefa’amanuiaa’i nei alii e to’aono ma ua o latou mavaevae ai loa, o le tagata ma lana vaitafe, e saili sona lumanai manuia.

O le a tatou mulimuli la i le aloalii o le malo.  Lea e mulimuli atu i se auvai e fai lava sina togavaoa o le mea e tafe aga’i iai.  Sa mulimuli ai lava lenei aloalii ma lona faamaoni, ma ia tau atu ai i se vai ‘eli ma ia saofa’i loa i autafa e to lona sela.  

E le’i umi ona saofa’i le aloalii i tafatafa o le vai ‘eli, ae ona vaaia se tamaitai lalelei tele o savali atu aga’i i le vai ‘eli ma sana fagu, o lo’o amo atu i lona tau’au.  O le lauulu a lenei tamaitai, e fai o le umi sa’o i lalo, ae uliuli pei o le pogisa o le po.  Ae o ona la’ei e lanu pa’epa’e ma o so’o se mea lava e tu ai ona vae, e tupu ma ola mai ai ni fugala’au lanu ‘ese’ese.

Ua ofo le aloalii i lenei tulaga ua ia vaaia ma ina ua taunuu lenei tamaitai i le vai ‘eli, ua tula’i le aloali’i ma tu’u mai lona lima ma ia fai atu i le tamaitai, e ave atu lana fagu, e tago e utu mai ai ana vai.  E leai se upu na gagana ai le tamaitai, ae ua na’o na ata atu i le aloalii ma tu’u mai iai lana fagu vai.  Ua mae’a lea ona liliu lea o le tamaitai o le a alu, ae sa ia toe tilotilo mai i le aloalii, e foliga o lo’o faapea mai, “mulimuli mai ia te a’u”.  Sa faapena loa mulimuli atu iai le aloalii.

E le’i umi ona alu le savaliga a le aloalii ma lenei tamaitai, ae o la taunu’u i se fale o lo’o ola mai ai se moliga’o ma sa tatalaina mai le faitoto’a e se toeaina ma lona lauulu sina, ma se loomatua i ona autafa.

Ua faaulufaleina e le toeaina ma le loomatua le teine ma le aloalii.  Ae o le mea na ofo ai le aloalii ona sa iloa lelei e le toeaina ma le loomatua, o ia o le alo o le tupu.

Ua fai nei le taumafataga o le afiafi a le to’afa lenei ma ina ua mae’a lea, sa faapea atu loa le toeaina i le aloalii, “Atonu o lo’o tele ni fesili o lo’o i lou mafaufau e uiga ia i matou, ae maise le tamaitai lea na e mulimuli mai ai.  O le tala moni, e ma te le iloa foi po o fea e sau ai si tamaitai sia.  Sa ma mauaina lenei tamaitai i luma o le ma fale, a’o pepe o ia.  Ma e o’o mai i le aso, e ma te le iloa po o fea e sau ai.”

“Ma ua pei lava o ia, o se ma tama moni.  Ma e na’o le tasi lava o la mana’o, ina ia faaipoipo atu i se aloalii o se nu’u.”

Ua oso atu le aloalii ma faapea atu, “E mafai ona ou faaipoipo atu i si o oulua alo.  Ma e mafai foi ona ma nonofo lava iinei i le tou fale,”

Ua fiafia le ulugalii.  Ma ua faapena loa ona faaipoipo atu le aloalii i lenei tamaitai.  Ma sa nonofo faatali ma le toeaina ma le loomatua i le togavao ma le fiafia, mo sina taimi umi lava.

O se tasi aso, a’o tafafao le ulugalii fou i autafa o se vaitafe, sa a’apa atu le tamaitai lenei i totonu o le vaitafe, ae pa’u atu ai ma lana mama.  Ua oso atu le tamaitai ma taumafai e saili lana mama, ae paga lea ua le toe maua.  Ma sa umi se taimi o tagi lenei tamaitai i lana mama.

Ae na faapea atu iai le aloalii, “Aua e te tagi, a ta o i lo’u malo, e tele ni mama e mafai ona ou faatauina mo oe.”

Ae ua tali mai si ona to’alua ma faapea mai, “O le mama lea, o se mama faapitoa ma afai ae leiloa, o le a tele ni puapuaga e o’o mai.”

O le taimi lea, ua tafea atu ai le mama ma taia i totonu o le vaitafe i tafatafa o se fale o se alii mau’oa fa’asaua.  Ma sa mauaina e se tasi o ana auauna le mama ma ia aveina i lona matai.  Na mate’ia lelei e lenei alii saua le taua o lenei mama, ma ina ua ia tu’uina i lona lima sa fa’afuase’i ona ia tu i luma o le fale o le toeaina ma le loomatua i le togavao ma ia va’aia ai le to’alua o le aloalii, ma ua mo’omo’o ai lona loto.

Ina ua tago lenei alii ma se’i ese le mama mai lona lima, sa fa’afuase’i ona ia toe fo’i mai i lona maota.  Ua ata nei lenei alii ma ia valaau i ana fitafita.  Ma sa ia toe faamaulu le mama, ma na fa’afuase’i ona ia tu ma ana fitafita i luma o le fale o le toeaina ma le loomatua.  Ina ua oso mai le aloalii e tatala le faitoto’a, sa feosofi atu auauna a lenei alii ma toso mai i fafo le tamaitai po o le to’alua a le aloalii, ma sa faapea ona toe ave’ese e le alii leaga le mama, ma toe mou atu ai i latou ma ana auauna ma le to’alua a le aloalii i lona maota.

Na fiu le to’alua a le aloalii e augani ma tauanau lenei alii amio leaga, ae peitai, sa le’i fia faalogo lea alii.  Ua atoa le vaiaso, ua vaai atu lenei alii leaga, ua le ‘ai le toalua a le aloalii ma ua ma’i foi.  Ua oso ai lona ita ma faapea mai, “Ua lelei, afai e le suia ou lagona, o le a e vaai ai i le mea o le a fai i lou to’alua.”  Ma ia faatonuina ai ana auauna, e o e saisai mai le aloali’i ma togi i totonu o le vai ‘eli.  Ma sa faapena loa ona faia e auauna a lenei alii amio leaga.

O le aso na soso’o ai, o le aso tonu lava lea na atoa ai le tausaga ma le aso, talu ona fai le mavaega a alii e to’aono lea e iai ma le perenise ma le latou tu’ugatala, o le a o latou toe potopoto uma i le vaita’ele na o latou amata mai ai.

Ma o le aso lea, e to’alima i latou na toe fo’i atu i le vaita’ele ma o se feiloaiga fiafia ma le loimata maligi sa faia e nei alii ua atoa le tausaga o nonofo eseese.  Ma sa alu le taimi o faamatala a latou tala e uiga i o latou olaga ma o latou taunu’uga lelei.  Ae peitai, na fiu nei alii e faatali le taunu’u atu o le perenise, ae ua taliga lona toe fo’i atu.  

Ua o latou va’aia foi le amata ona pe le la’au lea sa toto e le perenise.  “O lo’o tupu se faalavelave i si a tatou uo lea,” o le tala lea a le atalii o le taulasea.  E mafai ona ou faia se vailaau e mafai ona tatou iloa po o fea o iai.  Sa faapena ona fai ma o latou faatopetope atu ai i le vai ‘eli lea ua tu’u iai e auauna a le alii leaga ia si a latou uo.

“Oka o lena e loka i se ma’a tele le gutu o le vai ‘eli.  E mafai ona o tatou sailia se u’amea tele lava e mafai ona vane ese mai ai le ma’a,” o le tala lea a le atalii a le faiaoga.

Ina ua mae’a lea gaioiga ma ua matala le gutu o le vai ‘eli, sa muamua lava i lalo le atalii a le foma’i e su’esu’e po o a togafitiga e manaomia ona faia i le perenise e faasao ai lona ola.

[IA MANUIA TOE FUAFUAGA O LENEI VAIASO]