E FAI O LENEI AE O LENA

O LE LOSA MIMITA

I aso la ua leva, na iai se losa matagofie na ola lau usiusi i totonu o se fa’ato’aga.  O le mimita ia o lenei losa, i lona lalelei.  Ae e tasi lava le mea na le fiafia ai le losa, ona sa tupu i tafatafa o se la’au matuitui.

Ma sa fai ma masani a lenei losa mimita, o le faifai ma tauemu i si la’au matuitui lea o lo’o tu i ona tafatafa.  Ae e le taitai ona tali mai iai le la’au matuitui.

Ua fiu foi isi la’au o le togala’au e fautua i le Losa, ae le tu’u ai lava lana amio, o le fai o tala a si la’au matuitui, ona o lona faamaualuga i lona aulelei.

I se tasi aso, na mo’omo’o ai se laau paina sa ola foi i tafatafa o le mea o lo’o iai le Losa, ia pei o ia o le Losa le aulelei.  Ae peitai, sa fautua atu iai se la’au i ona tafatafa, e aua le manatu faapea, ona e leai se mea e toe mafai, o lea ua ola lava le la’au ia i lona fausaga.

Na lagona mai e le Losa le talanoaga a nei la’au e lua, ma faapea mai ai le Losa, e foliga mai o ia le la’au pito sili ona aulelei i totonu o le vaomatua.

O le taimi lea na tu ai i luga ia le la’au lea e ta’u o le “Fualaau o le La” ona o le lanu samasama ma lapotopoto, ma ia fesili atu i le Losa pe aisea ua saunoa ai faapea, ae o lo’o tele foi isi fugala’au matagofie, i totonu o le vaomatua.

Sa tali le Losa, e mafua ona ia faia lea faamatalaga, ona o lea e tilotilo atu uma la’au ma tagata ia te ia, ma talanoa i lona aulelei.

Ona toe liliu foi lea o le Losa ma fa’atusatusa o ia i si la’au matuitui lea o lo’o tu i ona autafa, ma lau le auleaga ma le tumu i mea matuituia.

Ae otegia mai e seisi la’au ia le Losa i lona faamaualuga tele, ma e iai foi vao matuitui i ona lala.

E ui i lea, na tali filemu mai le la’au matuitui, e iai lava le mafuaaga na fau ai faapea i latou e le Atua.

Ua alu aso, sau aso ma ua o’o i vaitaimi o le tau vevela, ua a’asa le vevela o le la ma ua leai se timu e toe to’ulu.

Ua va’aia le amata ona magumagu le tele o la’au.  Ua faapena foi la ma le Losa.

Ma na va’aia e le Losa se tulaga uiga ese, ina ua felelei atu le tele o manulele ma tutu i luga o le la’au matuitui ma tu’u o latou gutu i totonu o le la’au matuitui, ona toe felelei ese lea ma le fiafia.

Na fesili le Losa, po o le a le mea a manu felelei ia o lo’o fai i le la’au matuitui.

Sa faamatala e se tasi o la’au, o le la’au matuitui e maua ai le vai i totonu o ia ma o lea e o atu manu felelei ma tatui le la’au I o latou gutu ma’ai ona feinu ai lea i le vai.  Ma e ui la i le tiga o le la’au matuitui, ae peitai, o lo’o ia fesoasoani i manu felelei.

Sa lagona e le Losa lona matamuli e aisi i le la’au matuitui mo se suavai, ae na i’u lava ina ia aisi atu i le la’au matuitui ma sa le’i fa’atuai le ioe mai a le la’au matuitui ma na faapea ona felelei mai manulele ma fa’asusu ia a’a o le Losa.

IA MANUIA TOE FUAFUAGA O LENEI VAIASO