E FAI O LENEI AE O LENA

O LE MAUKENI I TOTONU O LE FAGU TIOATA

I aso a la ua leva, na alu ai se tuliga manu a se Tupu ma ana auauna ma na faafuase’i ona o eseese ia le tupu ma ana auauna.

A’o savalivali solo le tupu e tau saili le auala e toe fo’i mai ai i lona maota, na tau atu i se fale e si’omia i se togalaau ma o lo o galue mai ai se tamaitai lalelei.

Na fesili atu le tupu i lenei tamaitai, po o a ana la’au ia o lo o toto.

Sa tali lenei tamaitai, o lea e toto ana maukeni ma meleni.

Ua lagona e le tupu lona galala i le fia inu ma ia talosagaina le tamaitai pe mafai ona maua mai se ipu vai.

Na tali mai le tamaitai, “Lau afioga i le tupu, o lo o iai le vai ae paga lea, e leai se ipu e mafai ona asu mai ai le vai mo lau afioga.  Ae ua na o se atigi fagu palapala o lo o iai, ae e le mafai ona asu mai ai se vai taumafa a lau afioga i le tupu.  Ana iai se atigi fagu auro semanu e mafai ona asu mai ai sau vai taumafa i le tanoa vai.”

Ua faapea atu nei le tupu i le tamaitai, “Ou te le kea pe palapala le ipu, alu e asu mai sa’u vai, ua ou fia inu.”

Ua faatopetope atu nei le tamaitai ma aumai le atigi fagu mai totonu o le fale, ona tamo’e atu lea ua asu mai le vai ma momoli atu i le tupu.

Ina ua uma ona taumafa le tupu, na faate’ia o ia ina ua tago atu le tamaitai lea ma togi le atigi fagu ma nuti lili’i.

Ua fa’alogo ifo le tupu, ua oso ifo se mea pei o se ita.  “O le a le uiga o lau mea lea na fai?  Aisea ua e tata’eina ai le atigi fagu?”

Na tali atu le tamaitai, “Lau afioga le tupu, na ou tata’eina le atigi fagu ona ou te le mana’o e fa’aaoga e seisi le fagu sa taumafa ai lau vai.”

Ua tau toe sau I lalo le fiva faiai o le tupu ina ua faalogo atu i le faamatalaga a le tamaitai ma na toe suia ai le manatu o le tupu e uiga i lenei tamaitai.  Sa faapea ifo le tupu i ona manatu, o se tamaitai lelei ma le alofa lenei tamaitai.  Ae na fia iloa e le tupu, pe atamai o ia.

Ina ua toe fo’i le tupu i lona maota, sa ia faatonuina sana auauna e alu e ave se fagu tioata i lenei tamaitai.   O lenei fagu e lapo’a le tino, ae pe a ma le inisi le gutu.  Ma na faatonu e le tupu ia lana auauna, ina ia fai i le tamaitai lea ina ia taumafai e tu’u se maukeni atoa i totonu o le fagu, e aunoa ma le ta’e o le fagu, pe malepe foi le maukeni.

Na toe foi mai le auauna a le tupu ma le faamatalaga mai i le tamaitai, o le a faia e pei ona finagalo ai le tupu, ae ia tu’u atu sina taimi ona e fai sina faigata o lona manaoga.

I ni nai masina na soso’o ai, ae taunu’u mai lenei tamaitai i le maota o le tupu, ma le fagu ua iai i totonu o le maukeni.

Na fa’aalia le fiafia o le tupu ina ua ia va’ai mai o lo o u’u atu e le tamaitai le fagu ma le maukeni i totonu, e aunoa ma se leaga o le fagu po o le maukeni.

[IA MANUIA TOE FUAFUAGA O LENEI VAIASO]