E FAI O LENEI AE O LENA

O LE TIENE E FEFE I SE TAIFAU

“Ua toe amata ona tu’ufua ia tatou moa,” o le tali lea a le tina a Line ma tilotilo atu i le tamaitai 10 tausaga.  “Ua mafai ona e alu e ave nisi fuamoa mo si aiga o Mataio.”  Ua tilotilo mai le tamaitai o Line i lona tina, a’o fa’aauau le faamatalaga a lona tina.  “Oka se fiafia o Mataio ma si ona tuafafine laititi pe a avatu ni a la fuamoa e a’ai ai taeao.”  E fai lava le tala a le tina a Line ma ata. 

Ae leai lava se tali mai a Line ua na o le u’umau o lana pepe meata’alo ma tilotilo mai i lona tina.

“O le a mafai foi ona fa’atau nisi fuamoa e maua ai se tupe e fa’atau ai nisi mea manaomia o le tatou aiga,” o le tala lea a le tina a Line.

Ua tilotilo nei i fafo ia Line ma faapea mai i lona tina, i se leo filemu, “Ua lelei”.  

O le aiga a Mataio e nonofo i le tau fa’asi’usi’uga o le auala.  Ma e iai le latou tama’i ta’ifau.  E ui i le laititi o lenei maile, ae a uou nei, oka, pei o se taifau lapo’a ma lana uou.  

Ma o le matua’i pala’ai lava o Line i le ta’ifau a le aiga a Mataio.  O so’o se taimi lava e savali atu ai ia Line, e oso mai lava ma sogisogi solo i vae o Line ma uou leotele.

Ua talotalo nei Line ina ia aua ne’i vave o’o mai le aso e sos’o ai, ona o lona fa’atu tele e alu i le fale a Mataio ona o le latou ta’ifau.  

Ua avea le mamafa o le mafaufau a Line i le ta’ifau a le aiga a Mataio na le manogi ai sana ‘ai i lena po.  Ma fesiligia loa o ia e lona tina po o iai se mea o tupu.  Ae peitai, sa tali atu Line, “e leai”.

O lena po sa le lelei se moe a Line, ua na o le feliuliua’i i luga o lona moega talu ai lava le alu o lona mafaufau i lana auaunaga lea o le a faia i le aso e soso’o ai.  

A o’o ina tautulemoe Line, ae ua miti i le ta’ifau a le aiga o Mataio.  Sa miti ua tamo’e mai le maile ia te ia, ae ua fiu e taumafai e valaau atu i lona tina, ae ua leai sona leo.  

Atonu na iai se vaega o le po na moemiti ai Line ua ‘ai o ia e le ta’ifau a Mataio, na nofo ta ta a’e ai i luga ma tagi leotele.  Ua tamo’e atu lona tina ma fesili pe iai se me aua tupu.  Ae na tali mai iai Line, o lana miti sa fai.  Ua tago atu lona tina ma milimili lona ulu ma taumafai e toe fa’amoe Line. 

E ta le fa i le vaveao o le aso na soso’o ai, ae ua leva ona tu i luga Line mai lona moega.  Ua lagona Line, ua pei o ia o se pagota o le a alu atu i lona oti, i lana gaioi lemu i lea taeao ma talotalo ia le o’o mai le taimi e alu ai e ave fuamoa i le aiga o Mataio.

Na iloa mai e lona tina le savalivali atu o Line ma totoso atu ona vae ma ia faapea mai, “E manaia foi lou savalivali i le fale o Mataio, e maua ai sau fa’amalositino i lenei taeao.  E felesi ai foi ou foliga i le malu o le sau o lenei taeao.”

Ua tu’u mai nei e le tina a Line ia le ato o lo o iai fuamoa ma ua tago atu Line ma u’u mai le ato fuamoa ma savali atu loa agai i le auala.

“Vave i le fale a le aiga o Mataio, tu’u fuamoa ona e toe fo’i vave mai lea, Line” o le fa’atonuga lea a lona tina.  “Aua ne’i e afe i le fale a seisi.  Faatope mai i le fale.”

Ua lulu le ulu a Line ma savali ese atu.

Na pei e iai ni ato ma’a o nonoa i vae o Line ma lana savali i lena taeao.  Sa ia le amanaia le matagofie o le alu ifo o le la i luga, pe na ia lagonaina le tausagi mai o manu falelei i luga o la’au ma le agi malu o le savili i lena taeao.  Ana ea i luga ia Line, e na te iloa atu le matagofie o le lanumoana o le lagi.  Ae peitai, ua na o le punou o Line ma savalivali lemu atu lava agai i le fale a le aiga a Mataio.

Ua tatalo lemu ifo Line i lona loto ma ia faapea ifo, “Le Atua, faamolemole puipui mai a’u, aua ne’i latalata mai Spotty ia te a’u, pe ‘ai a’u, pe uou mai foi.”

E savali lava Line ma fail ana tatalo lea, ua pei o sana tauloto e fa’atatau ai lana savali.  

Ua latalata atu nei Line i le fale a Mataio ma na iloa mamao atu lava e Line ia le ta’ifau.   Na ona iloa mai lava e le ta’ifau ia le alu atu a Line, sau ma le atoa ma uou.  Ae ua atili ai le leo tele o le tatalo a Line ma savali lava.  Sa leai lava se manatu ia Line e liliu ma tamo’e pe tu.  E ui lava ua ia fa’alogo atu i le tata o lona fatu, pei o la e fai sana melefoni.

Ua o’o mai nei le ta’ifau a Mataio ia Line ma tamo’emo’e solo fa’ata’amilo ia Line ae o le taimi lena, ua tilotilo atu iai Line ua matua’i ma sona fefe.  Ae ua manatu Line i le laititi o lenei ta’ifau, ma pe faapefea ona fefe ai.  

Na fa’aauau pea ona savali Line agai i le fale a Mataio ae mulimuli atu le ta’ifau ia te ia.

Ina ua ia taunu’u i le fale ma tu’itu’i le faitoto’a, ma tatala mai e Mataio.  Ae ua fa’alogo Line i ona tua, ua atilii na leotele le uou a le ta’ifau ma maualuga lana osooso.  Ua oso mai i fafo ia Mataio ma tuli leotele le maile agai i tua o le fale.

“Na ou sau e aumai fuamoa ia mai lo’u tina e fai ai se tou mea’ai,” o le tala lea a Line ma tu’u atu le ato fua moa ia Mataio.  Ae fetaui loa ma le o’o mai o le tina a Mataio i le faitoto’a e pe isa pisi i le umukuka i le kukaina o le latou mea’ai o le taeao.

Ua tu’u atu e Mataio le ato fuamoa i lona tina.  “Oka fa’afetai lava Line.  Fai i nai ou matua, faafetai lava,” o le tala lea a le tina a Mataio.  “Mataio, alu e momoli Line i luma o le auala ma taofi le maile.” o le faatonuga lea a le tina a Mataio.

“Leai, aua le popole.  Ou te le fefe i le maile,” o le tali mai lea a Line ma le laumata fiafia.

Ua liliu nei Line ma savali ese atu, ae o le taimi lea ua toe tamo’e mai foi le ta’ifau sa i tua o le fale.  Ae o Line ua matua’i le kea lava i le maile, ae ua na o le savali lava ma osooso i luma o le alatele.

[IA MANUIA TOE FUAFUAGA O LENEI VAIASO]