E FAI O LENEI AE O LENA

O LE FIAFIA PU’UPU’U

Ona o le aafia o si tina o Susi i le gasegase o le fatu, o lea sa faafaigata ai lava ona ta’u atu ia te ia, le tala faanoanoa e uiga i si ona toalua.

O lona uso o Ianeta sa tu’uina iai le tiute o le faamatala ia Susi e uiga i le faalavelave na tupu ma maliliu ai le toatele o tagata, e aofia ai ma le to’alua o Susi.

A’o tau faamatala atu e si teine o Ianeta ia le tala faanoanoa i si ona uso, ae o le taimi lea, o lo o nofo ai i ona tafatafa ia se tasi o uo mamae a si ona to’alua, le alii o Falani, ma u’u le lima o Susi.  O Falani lea sa tau mai iai le tala faanoanoa i totonu o le latou ofisa, e uiga i si tamaloa o Mareko, ma ia faatopetope mai loa i le fale o Susi ma Mareko, ina ia faamafanafana i le toalua o si ana uo pele ua maliu.

Ua tagi lotulotu le tina ia Susi ina ua mae’a le faamatalaga a Ianeta.  Ma ina ua mae’a masusu a’o opoina o ia e si ona uso, na tula’i Susi ma savali atu i lona potu ma faapea mai ia Ianeta ma Falani, ia aua ne’i mulimuli seisi ia te ia.  Ua ia manaomia se taimi se’i ona mafaufau ai.

Ua alu Susi i totonu o le la potu ma Mareko ma le mamafa o le lalolagi atoa, ua tu i le faamalama o le potu ma faataupupula atu i fafo.

A o tu Susi i le faamalama, sa ia faalogoina le totolo ifo o se lagona i totonu o lona loto, ma i le va o lana tagi ma lana mapuea, sa taumafai le tamaitai e tu’u se igoa i lea lagona.  Ma ina ua amata ona alu ifo le la i lona nofoaga tumau, sa amata ona faaleoina e Susi le lagona ua o’o mai ia te ia.  “Saoloto!”  “Ua maua lo’u sa’olotoga!” O upu ia ua faaleoina e Susi.

O le faanoanoa ua amata ona liua i le fiafia.  Ua amata ona ta ta vale lona fatu.  O lona tino atoa, ua amata ona lagona se faalogona e pei o se tagata ua tatala mai i tua mai i se falepuipui.

Ua tu Susi ma tatala ona lima e pei o lo o ia taumafai e opo mai se tagata.

Ua alu le mafaufau o Susi i lona olaga fou o le a feagai ai nei pe a mae’a ona tu’u ifo le tino maliu o Mareko i lona oliolisaga tumau.  Ua mafaufau o ia i lona nofo toatasi, o le a le toe iai seisi e taumafai e faamalosi o ia e faia mea e le mana’o o ia e fai.  O le a mou atu sauaga sa feagai ma lona tino aemaise o lona mafaufau.

“Sa’oloto! O le a sa’oloto lo’u tino ma lo’u loto!” o upu tau musumusu ia a Susi.

“Susi! Tatala mai le faitoto’a!” o le tauvalaau mai lea a Ianeta mai i leisi itu o le faitotoa, ona ua fai sina leva o nofonofo toatasi Susi i totonu o le potu.

Ae o le taimi lea ia Susi, e ui i le maligi o ona loimata, ona sa iai se taimi sa alofa faamaoni ai i le tamaloa o Mareko, ae sa vaaia le fiafia o foliga o Susi, e le o se tagata o mafatia tele lona loto i le tala faanoanoa ua ia maua.

O le soso’o mai o tu’itu’i faatauanau a Ianeta i le faitoto’a, sa tula’i ai loa Susi ua tapuni ona mata, ma toe manatu tasi i le lumana’i ma ia savali atu loa ua tatala le faitoto’a.

Ua ulufafo mai Susi ma u’u le lima o Ianeta ma faapea atu, ‘Aua e te popole mai ia te a’u,” ma o la savali mai loa i totonu o le potu malolo.

Ae e pei e oso Susi i se niu, ina ua savali mai i totonu o le potu malolo ae o lo o tu atu ai Mareko ma u’u lana atopa’u.  Fai mai, sa mamao o ia mai i le mea na tupu ai le faalavelave na maliliu ai tagata.

Na laulogo le fale atoa i le e’e a Susi ma palasi ifo ae lava i le mea sa tu ai ma maliu ai, ona o le fa’ate’ia tele o ia.

IA MANUIA LE FAAIUGA O LENEI VAIASO!