E FAI O LENEI AE O LENA

O LE ULO MA LE FATU LA’AU

I aso a la ua leva, i le atunu’u o Saina, sa fa’asalalauina ai se tauvaga e saili ai le tupu o le atunu’u.  Ona ua matua le tupu ma e leai ni aloalii e mafai ona ui iai le ula a le tupu.  O aso na, sa na o aloalii e mafai ona pulea le atunu’u.

O lenei tupu, e fiafia tele i la’au.  O lenei tupu, e fiafia e fai fa’ato’aga, e toto la’au ma tausi ma faapelepele i la’au.  O lea na ia fa’asalalau ai, o ai lava e fia tauva i lenei tauvaga, e tatau ona o’o atu e aumai se fatu la’au, ma e ono masina e tuuina iai, e na te totoina ma fa’aolaina le la’au mai i le fatu la’au lea.  Ona filifili lea e le tupu le tagata e pito sili ona lelei ma matagofie lana la’au, e avea ma tupu fou.

Ua fiafia uma alii talavou o le atunu’u ona o le a o latou maua le avanoa e tausinio ai mo le nofoatupu a lea malo.  Ua le gata i alii talavou ae faapea foi matua, ua amata ona moemiti i le avea o a latou alo alii ma tupu o le malo.

Ae e iai se alii e igoa ia Milo, e nofo i se tasi o nu’u e mamao lava mai i le mea o iai le tupu.  O lenei alii e fiafia foi o ia e faifa’ato’aga ma o so’o se taimi lava e selesele ai le fa’ato’aga a le alii o Milo, e tauva lava tagata o lona nu’u e fa’atau mai fua o ana fa’ato’aga, ona e le gata i le lapopo’a ae o le suamalie foi.

O taimi uma lava, e va’aia ai lava Milo o lo o galue i lona fa’ato’aga, e faamama le vao, eli le palapala, fa’asuasua lana fa’atoaga.

Ua o’o i le aso tele e tufatufaina ai e le tupu ia fatu la’au mo so’o se alii talavou e fia tauva mo le nofoalii a le tupu.

Oka se umi o le laina a alii talavou mai le atunu’u atoa faapea foi nisi o malo lata mai, ua fia tausinio e avea ma tupu fou pe a maliu le tupu lea o lo o iai nei.  Sa tu ai foi i lea laina umi ia le alii o Milo.

Ina ua maua e Milo lana fatu la’au, na alu loa i le fale ma aumai se ulo e masani ona toto ai ana la’au ma tu’u ai ni ma’a tetele i totonu.  Ona ia tago lea ua tu’u ni ma’a laiti i luga o ma’a tetele ia.  Soso’o atu ai loa ma ni palapala.  Ona tago loa lea ua o’omi ai i totonu o le palapala lea ia le fatu la’au sa tu’uina atu e le tupu ia te ia.  

Ina ua mae’a lea, ona faia loa lea o le galuega a Milo, o le va’ava’ai, fa’asusu ma velevele totonu o le ulo lea o lo o iai le fatu la’au.  

E le’i umi ae maua mai se tala ua iai se alii talavou ua va’aia le ola o lana la’au ma ua amata ona iai lau.  Ma sa faapena ai lava, o le taimi lava e ola ai se la’au a se alii talavou, ua salalau solo le tala.

Ae peitai, na fiu si tama o Milo e fa’atalitali le ola ifo o lana fatu la’au, ae paga lea, e leai lava se lau la’au na te iloa atu.

Ua amata ona tutupu tetele la’au a isi alii talavou ma ua uma le tauvaga e va’ai po o ai e muamua ola lana fatu la’au, ae o lea ua fai le tauvaga e vaai po o ai e pito sili ona tele lana la’au.

Ae pgata lea, ua fiu si tama o Milo e fa’atali le ola o lana fatu la’au, ae leai lava se mea e iloa atu i totonu o lana ulo sa toto ai lana la’au.

Ua tago atu nei Milo, ma toe ave’ese mai lana fatu la’au ma toe sui le ulo e toto ai, ae peitai, e leai lava se suiga na vaaia.

Ua toe tago foi Milo toe sui le ulo e toto ai lana fatu la’au.  Ae ua iai sina suiga, ua ia tago nei Milo ma tuitui ia ni i’a mago ina ia liu pauta, ona ia tago lea mili faatasi ma le fetalaisa ma tu’u i le palapala sa toto ai lana fatu la’au, ae paga lea, e leai lava se la’au na ola mai.

Ua atoa le ono masina na tu’una mai e le tupu i alii talavou e fa’aola ai a latou la’au.

Ma ua agai atu nei solo tetele, o alii talavou ma a latou la’au, o matua, uo ma aiga, agai i le maota o le tupu.

“O le a nei la’u mea o le a fai?” o le fesili faanoanoa lea a Milo i ona matua.

“Ave lau ulo sa toto ai i totonu lau fatu la’au, ma fa’aali i le tupu,” o le tali lea a le tama.

“Ioe, si a’u tama,” o le soso atu lea a le tina, “E leai sau mea e mafai, ma te iloa lava lou galue malosi e tausi le fatu laau.”

E ui i le maasiasi o Milo, ae peitai, sa usiusitai pea i ona matua, ma agai atu loa i le maota o le tupu ma lana ulo.

Ua agai mai nei le tupu e asiasi i la’au a alii talavou ma sa va’aia le maofa o le tupu i le tetele o la’au a nisi o alii talavou.

Ae ina ua o’o mai i le mea o tu atu ai Milo ma lana ulo, na fesili le tupu, “”O le a le uiga o lenei mea? Aisea ua e sau ai ma lenei ulo e leai se mea o i totonu?”

Ua talie le toatele o tagata sa iai, ae ua na  o le punou o le ulu a Milo ma faapea atu, “Ou te fa’amalie atu i lau afioga a le tupu.  Sa ou fa’amaoni i le tausiga o le fatu la’au na e aumaia ia te a’u.  O le tolu ai lea o ulo ua ou fa’aaogaina e taumafai e fa’aola ai le fatu la’au, ae paga lea.  E leai lava se la’au na ola mai ai.”

Ua liliu atu nei le tupu i le motu o tagata ma alii talavou na iai i lena taimi ma faapea atu ma le leotele.

“Ou te leiloa po o fea na aumai ai e nei alii ia nei la’au.  Ona o fatu la’au ia na ou tufatufaina, ua uma ona fa’avelaina.  E le mafai ona toe ola mai ai se la’au.”

Ua liliu atu nei le tupu ma ata atu ia Milo ma ia faapea atu, “Sau ta o.”

IA MANUIA TOE FUAFUAGA O LENEI VAIASO.