E FAI O LENEI AE O LENA

O ALEKI MA LANA VAILAAU

O se tasi taeao, na fiu ai le tina a Aleki e fafagu Aleki e nofo i luga e sauni mo le aoga.  Ae ua le nofo mai i luga Aleki.  Ua tagotago atu lona tina i lona muaulu, ua fai sina vevela o le ulu a le alii.

Ua faapea atu le tina ia Aleki, “Ta o e vaai le fomai pe maua mai sau vailaau.”

Ua mae’a ona vaai le fomai ona tago lea o le fomai ma tu’u mai le vailaau e inu e Aleki pe a fo’i i le fale.

Na fiu si tina o Aleki e faasufi Aleki e inu lana vailaau, ae lulu mai o le ulu a Aleki ma tapuni mau lona gutu.

Ua savali ese le tina, ae fetaui ma le uso laititi a Aleki o Ieti, ua savali atu e vaai Aleki.

Ua tago nei Aleki ma tu’u atu lana vailaau ia Ieti ma faapea atu, “A e tago e inu la’u vailaau, e mafai na e ta’alo i la’u ta’avale mumu.”

Ae musu mai i o ia Ieti.

Ua mafaufau nei le alii o Aleki pe mafai faapefea ona inu lana vailaau.

“E mafai ona ou tago e sasa’a i totonu o la’u sanuisi ma ai faatasi ai ma le sanuisi,” o le mafaufau lea a Aleki.

Oka, e tasi lava le u a Aleki i lana sanuini ae toe luai mai i fafo.

Ua toe mafaufau Aleki i seisi auala.  “Ae a pe a faapea e ave le fagu vailaau e nana i le togala’au a Mama?” O le mafaufauga lea a Aleki.

Ua alu Aleki eli le palapala i totonu o le togalaau a lona tina ma tanu ai le fagu vailaau.  Ae na te’i i le toe tamo’emo’e atu o lana taifau o Bongo, ma le fagu vailaau i lona gutu.  Na alu lelei lava Bongo eli i luga le palapala ma toe maua ai le fagu vailaau.

Ua toe mafaufau Aleki, “Oi, lea o le a ou alu e nana i totonu o le faamoega a manu i luga o le la’au.”

Ua alu nei Aleki i le pe’a i luga o le la’au ma tu’u le vailaau i totonu o le faamoega manu.  E le i taunuu lelei mai i lalo Aleki mai luga o le la’au, ae tau le fagu vailaau i lona ulu, ua kiki mai i lalo e le tina o manu.

Ua manatu nei Aleki i lona tigaina e tau nana le vailaau ma ia mafaufau ai e faapea, “E sili ai lava ona ou tago e inu.”

Ua inu loa le vailaau a le alii o Aleki ma taoto ifo i lona moega.  Ina ua toe ala ifo i luga, na ia faalogoina le lelei o lana faalogo i lona tino.  “Ana ou iloa lava e inu vave la’u vailaau,” o le tala lea a Aleki ma tu ifo i luga ma tamo’e i fafo e ta’a’alo ma ana uo.

IA MANUIA TOE FUAFUAGA O LENEI VAIASO.