E FAI O LENEI AE O LENA

“O LE TUPUA A LE FAATAUOLOA”

E le tutupu lava nei mea pe ana ou nofo i le fale.

Sa ma nofonofo ma la’u uo o Elia i luga o le matafaga.  Ese ma le vevela o le la, a o ma matamata i le fati mai o galu, i luga o le oneone, ma faalogologo i le malu mai o le savili mai le moana.

Sa ou taoto ifo i luga o lo’u ie lea ou te nofonofo ai ma tapuni o’u mata, ma amata ona ou tautulemoa.

Ae na fa’ate’ia ma’ua i se e’e leotele mai i le fale.

Ua ma tamomo’e faatopetope atu ma Elia agai i le fale.

Ua lua aso talu ona leiloa si a ma uo o Fagalilo.  E le o iloa e seisi po o ua ave faapagota e seisi pe ua malemo i le tai moana.

O le mafuaaga lena sa ma nofonofo ai ma Elia i le matafaga, o le tau tilotilo pe iloa atu o ia.

E ma te taunu’u atu i le mea o sau ai le e’e a le tagata, ma ma iloa atu isi a ma uo, o Iosua ma Teuila, o lo o faataupupula i fafo o le faamalama, ae o lo o faasino le lima o Teuila i fafo.

E ma te auselasela atu ma Elia ma ma tilotilo atu i fafo i le mea o faasino iai le lima o Teuila i luga o le matafaga…ma ma iloa atu le taatia mai o si a ma uo o Fagalilo.  Na ma toe liliu ma Elia ma ma toe faga i fafo i le matafaga.  Oi aue, e moni lava.  O si a ma uo faapelepele o Fagalilo, ae paga lea, ua le manava o ia.

E ui ina ma taumafai ma Elia e aua le fetagisi, ona e le tagi se po’a, ae peitai, sa le mafai le maligi o ma loimata ma ua liliu lava le tagata ia i leisi itu ma solo ona mata.

Aisea?  O ai?

O fesili ua tulai mai.   O le loto fefe ua alu a’e foi, ae ona e le fefe ni po’a, sa taumafai ai lava le tagata e nana le pala’ai o le loto ua sosolo a’e.

Ua taunuu mai Iosua ma Teuila, ma vaaia le tino o Fagalilo, ua atili ai ona leotele le tagi a Teuila.

“Lava loa lena tagi ae mafaufau po o le a le tatou mea o le a fai,” o le tala lea a Elia.

“Ua ou fiu e valaau se tagata mo se fesoasoani, ae e le ola se telefoni,” o le tagi tautalatala lea a Teuila.

“E tatau na tatou o e saili se fesoasoani,” o le tala lea a Elia.  “Ae e le mafai ona tu’u le tino o Fogalilo.”

“E tatou o ma ave lona tino,” o la’u tali atu lea.

Ua tau fai ioe uma le matou vaega o le a matou o e su’e seisi e fesoasoani. 

Ua matou fau se moega la’au e mafai ona toso ai le tino o Fagalilo.  Ma ua tu’u iai o ia ma o mataou savavali agai i le vaomatua, pe ono tau i se nofoaga o iai ni tagata e fesoaoani mai ia matou.

E alu lava le savaliga, ae o lo o tagi lava le teine o Teuila.

Ua ou toe mafaufau ifo, ana ou iloa lava ou te le sau. 

E le i mamao tele le matou savaliga i totonu o le vaomatua, ae taofi loa le matou vaega e Elia ma faapea mai, “Aua le pisa seisi.” 

Ua matou sa o, ua  leai seisi e toe minoi.

“O le a?” o la’u musumusu atu lea ia Elia.

“Shhhhh, aua le pisa ae faalogo,” o le tali mai lea a Elia.

“Faalogo i le a?” o la’u toe fesili faatauanau atu lea, e kava ai lo’u pala’ai.

E le’i uma lelei atu la’u fesili ae matala le laueleele pei o se gutu o se manu fe’ai ua folo matou.

Ou te iloa na au i le lagi la’u e’e, a’o matou pau’u faatasi i totonu o le pogisa.

Ae ou te’i ane loa i luga o lo’u moega, ua ta’ai lo’u ie afu i lo’u ua, ua na o sa’u miti o lo o fai.

IA MANUIA TOE FUAFUAGA O LENEI VAIASO!