E FAI O LENEI AE O LENA

O PURINISESE TO’AFITU MA SE’EVAE AURO

Ua le maunofo le Tupu.  Ua savali atu i o, liliu toe savali mai i’i.  Ua tu ma valu le ulu.  Ua faapa’u ifo i luga o lona nofoalii, ma toe tu i luga, ma toe savali foi.  

Ua na o le fetilofa’i o ana auauna ua le mautonu, ma fefefe i le toatama’i o le Tupu.  Ua latou iloa lelei lava, le mafuaaga ua toatama’i ai le Tupu.

O le Tupu e iai ni ona afafine e to’afitu.  O ni tamaitai lalelei tele.

O aso uma lava, e fiu le Tupu e fafagu nei Purinisese, ae le feala, e na o le momoe lava.  Ma leisi mea o lo’o toatamai ai le Tupu ona o taeao uma lava e alu atu ai le Tupu e asi lana fanau teine, ia Purinisese nei e to’afitu, e vaaia lava e le Tupu ua leaga o latou seevae auro, ae o se’evae fou.  O aso uma lava la, e toe faatau ai isi se’evae fou, ae o’o atu i le aso e soso’o ai, ua leaga.

Ua fili i le mafaufau a le Tupu pe faapefea ona leaga vave seevae a Purinisese e toafitu ma aisea e fiu ai e fafagu ae pei o ni tagata ua feoti.

“Ave se fa’aaliga I le malo.  Saili mai seisi e mafai ona tali lenei tupua.  I le mafuaaga e momoe gapepe ai Purinisese nei I aso uma, ae aisea foi e leaga ai a latou se’evae auro I aso uma,” o le faatonuga lea a le Tupu I ana auauna. “O ai lava e na te maua le tali o fesili ia, e na te filifili le Purinisese e faaipoipo iai.”

Ua faia le finagalo o le Tupu ma ua salalau i itu uma o le malo le fanoga a le Tupu.  Ua lolofi uma mai alii o le malo atoa i le maota o le Tupu ona o le naunau i le fia faaipoipo atu i se Purinisese.  Ua o’o lava i aloalii o malo tuaoi, ua o mai foi ona o le aave o tala i le lalelei o Purinisese.

Ua amata le sailiga tali I fesili a le Tupu.  Ae paga lea, e ta’itasi ma toe tali atu nei alii ma aloalii i o latou aiga, ona ua fiu e tau saili le mafuaaga o le momoe gapepe o Purinisese ma le mafuaaga e leaga ai a latou seevae auro.  Na fiu nai alii e feala i le po ae o’o ifo lava i le taeao, ua leaga seevae auro a Purinisese ae o lo o fiu lava le Tupu ma le Masiofo e fafagu si a la fanau, e le feala i luga.

Ae o le taimi lea, o lo’o faia le galuega a le ali’i o Samuelu, o le ta la’au i le togavao.  I lona toe fo’i ifo i lona aiga ina ua mae’a lana galuega, sa ia faalogo atu ai o talanoa lona aiga e uiga i purinisese nei.  O le tama o Samuelu, e fiafia tele i paso, o se alii e sogasoga tele lona mafaufau.

Sa ia manatu ifo, o le alu e saili le mafuaaga o lenei mea o lo o tupu i purinisese o le atunuu.  Sa mamao lava mai i le mafaufau o Samuelu, le fia faaipoipo atu i se purinisese, ae o lona fia iloa pe aisea e momoe ai nei purinisese ma pe aisea e leaga ai o latou seevae auro i aso uma.

Na tauemu auauna a le Tupu ina ua ulufale atu Samuelu i totonu o le maota a le tupu, ona o le faatauvaa o si alii ma si ana tamai ato faafafa o alu atu ma ia.  Ae o le toatele na o atu, sa matuai tumu taavale na o latou o atu ai ma auupega, o mea eseese, e fai ai le latou sailiga.

O le taimi lea i le Tupu, ua tu’u lava po o ai e sau, ua le o toe kea le tupu ae u ana o le fia iloa le mea o tupu i lana fanau teine.

O le po lea sa nofonofo ma tautulemoe ai Samuelu i luma o le faitotoa o le potu a Purinisese.  O le ato faafafa a Samuelu na alu atu ma ia, e na o le tasi lava le mea o iai I totonu, o se pulupulu faataulaitu.  O lea pulupulu, a ofu e le tagata, e lilo atoa lona tino, o lona uiga, e le iloa mai e se tagata.

A’o tautulemoe Samuelu i luma tonu lava o le faitotoa o le potu moe a nei Purinisese, o lo o ofuina e ia le pulupulu lea, o lona uiga, e le o iloa e seisi o Samuelu lea e faamata tasi I Purinisese i luma o le latou potu moe.

O le leva o le po, ua momoe uma tagata i totonu o le maota o le tupu, na faate’ia ane ai Samuelu mai i lana taagulu, ina ua matala le faitotoa o le potu a Purinisese.  Ua laki o lea na moe faalagolago Samuelu I le faitotoa o le potu a Purinisese, semanu e na te leiloa le savali mai o Purinisese i fafo, ma a latou teuga e foliga mai e o i se pati.

Ua laki foi, o lea e fai le pulupulu a le alii o Samuelu, e le iloa mai ai o ia e Purinisese.  “Ua maua outou,” o le ataata lea a Samuelu, ma mulimuli atu i le mea o aga’i atu ai Purinisese nei.  Na maitauina e Samuelu, o lo o fai uma seevae auro fou a Purinisese.

Ua agai atu nei Purinisese i le mea o iai se vaitafe tele lava ma na matua’i faate’ia le loto o Samuelu, ina ua vaai atu, ua liu faafuasei Purinisese i ni manu papa’e sinasina.  Ma ua faaloloa o latou apa’au ma felelei ese atu ai.

O le vave o le mau o Samuelu i le vae o le manu mulimuli, o le afafine laititi lea a le Tupu, sa mafai ona lele atu ai le manu ma avatu ai ma Samuelu.  Na fai sina umi o felelei nei manu ma taunuu ai I se fale tioata I luga o se mauga maualuga.  Ma ina ua tuvae nei manu sinasina, sa toe liu i latou i o latou tino tagata ma o atu ai i totonu ole fale tioata lea.  Ae o le taimi lea, o lo o mulimuli atu ai lava Samuelu.

“Na ese lava la’u lele mai ananei, e foliga mai o iai se mea o mamafa i lo’u vae,” o le tala lea a le Purinisese laititi i nai ona uso.

Na vaaia e Samuelu le faatumulia o le fale tioata i tagata, e pei o ni aloalii ma purinisese mai malo eseese.  Sa o latou fiafia ma sisiva ma Purinisese e to’afitu i lena po atoa.  Ua amata ona alu ifo le masina i lona nofoaga tumau ma ua amata ona tatafa mai ata o le taeao.  Ua faamavae le au pati, ma ua toe savavali ifo Purinisese nei e to’afitu i tafatafa o le vaitafe ma toe liu i manu sinasina ma toe felelei atu aga’i i lo latou fale.

Ua maleifua mai le Tupu ma le Masiofo I le taeao na soso’o ai ma faatopetope atu i le potu o Purinisese.  E o’o atu, o la lava e momoe Purinisese ma ua fiu foi e fafagu e leai ma seisi e nofo i luga, ua matua’i moe gapepe lava le tagata i lona moega.  Ae o se’evae auro, ua toe leaga foi.

Ua valaau le Tupu i ana auauna e su’e mai Samuelu.  Ua ifo toele Samuelu i luma o le Tupu ma na fesiligia e le Tupu pe u ana iloa le mafuaaga e faapea ai ona afafine ma pe aisea e leaga ai o latou seevae i po uma.

Ua faamatala e Samuelu le mea atoa na va’ai ai.  Sa matua’i faate’ia le Tupu ma le Masiofo i faamatalaga a Samuelu.  Ae na fai si o la le talitonu i le tala a lenei alii.  O lea na faapea atu ai Samuelu, “A o’o i le po nanei, aua ne’i toe tu’u ni seevae fou i totonu o le poto ma ia loka mau le potu ma faamalama.”

Ua fai le tonu a Samuelu, ma o le taeao na soso’o ai, ina ua toe asiasi atu le Tupu ma le Masiofo i le potu moe a si a la fanau. Ua feala mai nei tamaitai ma faafeiloai mai i la’ua.  Ona o le fiafia tele o le Tupu na ia fesili atu ai ia Samuelu, po o ai o ona afafine e fia faaipoipo atu ai.  Sa vave le tali a Samuelu, o lona afafine laititi lava.

IA MANUIA LE FAAIUGA O LENEI VAIASO!