E FAI O LENEI AE O LENA

“O LE MILIGA TELE ”

Sa faia se miliga tele lava i se tasi o nu’u.  Ma e lua ni fa’ailoga ua saunia mo lenei miliga, aua e le na o se tasi se miliga, ae o le miliga i le tausaga atoa.

Na vaaia le ataata taufa’alili a le lapiti ma faapea mai, “O a’u lea ua maua le faailoga muamua. Ae sa le tatau lava ona maua e le Sisi ia le fa’ailoga lona lua.

“E leai,” o le tali mai lea a le pa lea e ta’amilo i tafatafa o le auala, ma sa molimauina le tufatufaina o fa’ailoga o lenei miliga.  “O lo o sa’o ma onomea ona maua e Sisi ia le fa’ailoga lona lua, aua sa le gata i lona tauivi i lau tausaga atoa, e ui i le lemu o lana alu, ae sa alu ma amo lona atigi.”

“E! Sa tatau lava ona maua sa’u a’u foi fa’ailoga,” o le tomumu mai lea a le ti’otala.  “Sa le gata i le saoasaoa o la’u lele, ae sa mamao toe maualuga le mea na ou lele ai.”

“E! A fai atu le fiu e su’e oe i le taimi o le miliga, ae ese isi atunu’u ua lelelele atu iai, ae e fai mai e maua sau faailoga,” o le ote mai lea a le pa.

“E faapefea na e iloa na ou lele mamao atu i isi atunu’u?” o le finau mai lea a tiotala.  “Afai la na ou fai atu sa ou moe lelei i luga o se tasi o la’au, e a la? E maua sa’u faailoga.”

“Alu e fai ia matua moa e aumai se faamaumauga e faamaonia ai lau faamatalaga,” o le tali mai lea a le pa. 

Na fa’ate’ia le lapiti, le pa ma le tiotala ina ua faapea mai le Sisi, “Sa tatau ona ou maua le tulaga muamua ae le o le tulaga lua.”

Ua tau fai tilotilo atu nei iai le toatolu lea i le Sisi ma na oso atu Lapiti ma faapea atu, “E a alii Sisi, se’i toe fai mai lau tala.”

“Na pau lava le mafuaaga na e saoasaoa ai, o lou palaai.  Na masau lau alu ona sa e faapea o lo o lamatia lou ola.  Ae o a’u, ua outou vaai mai, ua leaga lo’u tino ona o lo’u tausinio ma le faamaoni i lenei tu’uga.  Ou te le malamalama pe aisea e tou te finau ai, ae sa tatau lava ona ou mauaina le fa’ailoga muamua,” o le tala lea a le Sisi.

Ua oso mai nei le la’au o le Gatae, lea sa tu i leisi itu auala, ma o ia foi sa avea ma faamasino i le miliga lea o lo o finau ai le vaega lea, ma faapea mai, “O l o o tonu ma sa’o le faia o le faamasinoga ma le tufatufaina o fa’ailoga o le miliga.  O la’u faaiuga na faia e faatatau i le manu e muamua lona igoa i totonu o le Faitau Pi.  Vaai foi outou, e muamua le L i totonu o le Faitau Pi, ae mulimuli mai i tua ia le S.  O le mea lena ua maua ai e Lapiti le fa’ailoga muamua, ae maua e Sisi ia le fa’ailoga lona lua.”

E tuai mai le tali a Sisi, ae oso mai le Asini ua faapea mai, “Ana e le o a’u sa faamasino, semanu ou te aveina le tulaga muamua.  Ae peitai, na ou filifilia Lapiti e manumalo i le miliga, ona o le manaia m ale u’umi o ona taliga.”

“E sese uma outou!” o le valaau mai lea a le Lago ma lele mai tu i luga o le isu a le Lapiti.  “Sa ou muamua lava i luma o Lapiti.   Na ou vaai foi o lavea ona vae ma le mafai ona faauma le miliga.  Ou te iloa le mea lea, aua sa fai sina umi o o’u tu i luga o lona manu’a.  Ae na ou toe lele ese ma ou taunuu muamua ai i le tigi.  Ae ou te le manao i se fa’ailoga.”

“I so’u manatu,” o le oso atu lea a Fuarosa.  “E tatau ona ave le faailoga muamua i le La.  Aua e masau tele lona susulu i nofoaga uma o le lalolagi ma o lona a’asa e mafai ai ona fafagu uma ai vaega uma o le fogaeleele.  Ae e foliga mai e le amanaia o ia e a tatou faamasino.”

A o faia pea le finauga a le vaega lea, ae ala ane loa i luga ia le alii o Anufe.  Ua mavava ma tolotolo atu i tafatafa o le mea o fai ai le fefinauaiga ma fesili atu.  “Ae o le a le fa’ailoga muamua?”

“O le fa’ailoga muamua, o le ulu fua i se faatoaga kapisi,” o le tali mai lea a le Asini.

IA MANUIA TOE FUAFUAGA O LENEI VAIASO.