E FAI O LENEI AE O LENA

“O LE MANU TAGI MA LE ROSA MUMU”

A o nofonofo se Manutagi i lona faamoega i luga o se la’au i se tasi o aso, na ia faalogoina se tagi a se alii ua pei ua leai sona faamoemoe.

“Oi aue ita nei, na ia fai mai o le a ma sisiva pe afai ae o’u alu atu ma se Rosa Mumu, ae paga lea, ua uma itu o la’u togala’au o o’u saili ai, e leai ma se Rosa Mumu,” o le tagi tautalatala lea a si alii, i lalo ifo tonu lava o le la’au o lo o tilotilo mai ai le Manutagi.

Ua faapea ifo le Manutagi, “Oi Talofae i sia alii.  O po uma ou te pese atu ai ia te ia, ae na te le lagonaina mai a’u.  O po uma ou te faamatalaina atu ia te ia, tala o fetu, ae paga lea, ua na o le faanoanoa o lo o vaaia i ona foliga.”

Na toe alu a’e i luga le tagi tautalatala a lenei alii ma ia faapea mai, “O le po a taeao, e fai ai le pati a le Perenise o lenei nu’u.  Ma o le a auai mai iai la’u manamea.  Ma afai ou te alu atu ma se Rosa Mumu, o le a ma sisiva ma ou opoina o ia i o’u lima seia o’o i le taimi e oso ifo ane ai le la.  Ae paga lea, ua leai se Rosa Mumu i totonu o la’u faatoaga, o le mea lea, o le a ou nofonofo toatasi ai na o a’u, ma o le a ia le iloa mai a’u.  Oi, lo’u fatu e, o le a nuti momoia.”

Ua lagona e le Manutagi le matuitui o le tiga o lo o feagai ma si nei taulealea.  “Oi Talofa e ia te ia,” o le manatu lea a le Manutagi.  O a’u pese logoleleia, ua na o se tui i lona fatu.  E moni o le Alofa e sili atu i lo Penina ma ma’a taua o lenei lalolagi.  E le mafai ona faatauina atu pe faatau mai.  Ma e le mafai ona faatusaina i auro.”

Ua toe faalogoina e le Manutagi le tagi lotulotu a lenei alii, ua faapea mai, “O le au fai musika, o le a nonofo i lo latou tulimanu ma ta ta a latou faaili leo malie, ma o le a siva la’u manamea i la latou musika, ma o le a siomia o ia e alii ua fia faauo atu ia te ia.  Ae peitai, o le a ma le sisiva, ona o le a leai se Rosa Mumu e mafai ona ou tuuina atu ia te ia.”

“Aisea ua tagi ai le alii le la?” o le fesili a le Pili lanu meamata.

“Matua’i tagivale tele,” o le tala le leoa a le Pepe a o felelelelea’i solo.

“Aisea o tagi ai o ia?” o le fesili atu lea a le fugalaau o le makerita, i isi fugalaau o lo o latou tutu faatasi.

“O lo o tagi mo se Rosa Mumu,” o le tali mai lea a le Manutagi.

“Oka Oka e, matuai malie le mea o tagi ai,” o le talie lea a manu ma fugalaau uma i totonu o le togalaau.

 Ae peitai, sa le i ata le Manutagi, ona sa ia malamalama lelei i le mafuaaga o le faanoanoaga a lenei alii.

Sa faafuasei ona faaloloa apa’au o le Manutagi ma lele ese atu ma faataamilomilo i luga o le vateatea ma vaavaai mai i lalo, i le togalaau o lo o tagi ai lenei alii.

O le ogatotonugalemu o le togalaau, na iloa mai a e le Manutagi le laau lea o le Rosa ma na lele loa ma tu ai i luga.  

“Aumai ma a’u sau Rosa se tasi, ae o le a ou pese atu mo oe,” o le augani atu lea a le Manutagi i le Rosa.

Ae na lulu mai le ulu o le Rosa, e leai.

“E te tauaso,” o le tali atu lea a le Rosa i le Manutagi.  “O e vaai mai i o’u fua lanu papa’e, e pei o le paepae o le kiona i le tau malulu.  Ae sau ina alu e vaai lo’u uso o lo o nofo tu lata i le la, atonu e mafai ona fesoasoani atu ia te oe.”

Ona toe lele lea o le Manutagi ma toe tau atu i leisi Rosa ma ua tu ai foi ma tagi atu, “Faamolemole aumai ma a’u sau Fuarosa Mumu.”

Ae tali mai le la’au, “O a’u rosa e lanu samasama.  Ae alu i lo’u uso lea e tu tonu lava i lalo o le faamalama o le alii aoga, atonu e te maua ai se Rosa Mumu.”

Ona toe lele lea o le Manutagi i le rosa o lo o ola i lalo ifo o le faamalama a le alii aoga ma faapea atu, “Aumai ma a’u au Rosa Mumu.”

Ae peitai, ua tagi le la’au ma faapea mai, “Ua le mafai ona fua mai sa’u Fuarosa Mumu i lenei tausaga ona ua afaina o’u lala i le kiona na sei mavae atu.”

“E na o le tasi lava se Rosa Mumu,” o le augani atu lea a le Manutagi.

“E iai le auala e mafai ai ona e maua se Rosa Mumu e tasi.  Ae paga lea, e faigata ma tiga le auala e maua ai,” o le tali mai lea a le Rosa.

“Ta’u mai,” o le tali a le Manutagi.  Ona ta’u lea iai e le Rosa.

IA MANUIA TOE FUAFUAGA O LENEI VAIASO!