E FAI O LENEI AE O LENA

“O FAIGAMALAGA LE FAATAPASAINA”

O lo’u tina e maua i le Ma’i Suka ma o le mafuaaga lea na le mafai ai ona maliu ai lana ulua’i pepe i lona manava, i le lua o masina o lona maitaga.  Ae ona o vaitaimi na, sa le tele se atamai faaonaponei ma masini i falemai, o lea na tigaina ai lo’u tina e tauave le pepe i totonu o lona manava, e ui ua maliu, se’ia o’o ina mafai ona tu’ueseeseina i la’ua.

O se tulaga sa le gata ina faatigaina ai lo’u tina, ae na avea ma tulaga na musu ai o ia e toe tauave seisi pepe i lona manava.

Ma e ui lava sa fiafia le la ulugalii ma si o’u tama, ae peitai, sa a’e se manatu lo’u tama ina ia saili se la pepe e vaetamaina, atonu o le a mafai ona toe maua ai e lo’u tina le fiafia.  Na mana’o lo’u tama e saili se pepe tama e la te vaetamaina.  Ae fa’aigoa ia Solomona, o le igoa lea na tu’u e fa’aigoa ai si a la pepe lea na maliu.

Ua amata ona faatumu pepa e saili ai se pepe fou e vaetamaina e o’u matua.  Oka se kele o le gasu ona e le gata i pepa faatumu, ae na iai vasega sa auai atu iai o’u matua, e aoaoina ai le avea o i la’ua ma ni matua lelei.  Sa faapea foi ona asia lo la fale e tagata mai ofisa o le malo ina ia faamautuina le lelei o le nofoaga o le a tausi ai le tamaititi po o le teineititi o le a vaetamaina e o’u matua.

O le aso na atofaina mo le filifilia e o’u matua o se la tamaititi fou, sa o la ta’uina mai ia te a’u, sa ou filifilia i la’ua.  O le lata i le tolu o o’u tausaga ae o lo o faatuai lava ona ou savali lelei.  Sa ou manatuaina le manaia o lo’u ofu paepae sa ofu i lea aso, ae na ou iloa tolotolo e aunoa ma le palapala o lo’u ofu.  O vaitaimi lea, ou te fa’aaogaina uma o’u lima ma vae, ou te tolotolo ai.  Sa ou ta’ua lea ituaiga savali o le savali a le kamela, ina ua fai la’u fanau ma sa o latou savavali foi faapea a’o laiti i latou.

Sa ou tolotolo faatopetope atu lava i le potu na iai tamaiti pepe seia o’o i le fa tausaga.  O leisi potu na iai tamaiti e 5 i le 12 tausaga ma leisi potu, o tamaiti 13 tausaga agai i luga.  A o faatalitali o’u matua i totonu o le matou potu, sa ou tolotolo atu ma toso le vae o le ofuvae a lo’u tama ma tagotago i ona foliga.  Na vaaia le suia o foliga o lo’u tina i lene taimi, mai i le faanoanoa, i se ata tele i ona foliga.  Ua suia nei mafaufau a o’u matua, o le a le vaetamaina se tamaititi, ae ua gagau mai o la loto ia te a’u.  O le aso lea na filifili ai a’u e o’u matua, lua aso ae e le i aulia lo’u aso fanau e tolu ai o’u tausaga.

O ni matua agaalofa ma o se fiafiaga sili i lo’u olaga, lo’u tuputupu a’e o se la afafine po o se la tama teine.

O leisi aso na faatau ai e lo’u tama ma sana uo lelei lava ia se taavale (van) ma o la toe inisinia faalelei.  O le vaiaso lava na lelei ai le taavale, sa le’i toe tu’ua le alu o a matou tietiega i faaiuga o vaiaso uma.  O le matou tietiega muamua lava, na faia i le Aso Toanai ae le’i aulia lo’u 10 tausaga.

Sa e alu i se malaga e leai se tapasa? Na o le tietie lava ae le iloa po o fea a taunuu iai?  Sa faapena a matou tietiega i Aso Toonai po o Aso Sa, i le tausaga atoa.  Ua le toe iai se manaia o le o i faleaiga po o le o e matamata tifaga po o le tutu i laina uumi i se mataaga, ae tele tupe e alu ai.

Sa iai se aiga tuaoi, e toatolu ni tamaiti.  E toalua tama ae tasi le teine, e tali tutusa o ma tausaga.  Na sili atu lo’u fiafia e ta’alo i tamaiti e toalua nai lo le la tuafafine.Sa sili atu ia te a’u le alu e fagota nai lo le nofo i le fale e kuka.  Na sili atu ia te a’u le ta’alo pasiketipolo po o le pesipolo nai lo le ta’alo i pepe meata’alo.

Ua amata ona valaaulia e o’u matua ia le aiga tuaoi i a matou tietiega.  Ma o taimi uma lava e alu ai le matou tietiega, e o’o loa le matou taavale i le magatolu lea e i luma atu o le matou fale, fesili loa lo’u tama, “Taumatau pe Agavale?”  Ona o matou tali atu lea i le itu matou te fia o iai i lena aso.  Ua avea ma mea fiafia ia i matou le filifili pe o i le itu taumatau po o le itu tauagavale o le auala.

O leisi Aso Sa, na matou tali atu ai “Itu Tauagavale!” na o’o ai le matou tietiega i se ana tele lava sa masani ona eli auro ai le malo.  Sa malie foi tala a o matou matua sa faamatala mai ia i matou e uiga i lea ana.  O vaitaimi na, i lo matou laiti tele, na o matou talitonu ai lava i so o se faamatalaga a o matou matua.  E pei o le faamatalaina mai ia i matou, o ma’a ia na foliga mai o ni falai fuamoa, o le meaai ai a se aiga ua leva na nonofo i totonu o le ana.

O isi taimi, e sau faatasi lava tala malie ma aoaoga, i tala mai o matou matua.  O isi taimi sa o’o ai a matou tietiega i le nofoaga e nonofo ai manu eseese ma o se aoaoga tele foi lea mo i matou le fanau.  O leisi aso, e aunoa ma le fuafuaina o le mea e alu ai le matou tietiega, na matou tietie ai i se taavale afi sa fausia ma fa’aaogaina e le malo o Amerika i tausaga ua leva, e la’u ai le meli.

O leisi aso, na matou filifili ai e aga’i i le itu taumatau le matou tietiega, na matou asia ai se nuu e foliga mai na nonofo ai kaupoe i aso anamua.  

IA MANUIA LE FAAIUGA O LENEI VAIASO!