E FAI O LENEI AE O LENA

“O LE FEA E SILI…?”

Sa nofonofo se fafine ma sana tama teine i lo la fale, ae afea loa le fale e ni toeaiina se toatolu.  Ua tuitui le faitotoa, ma ua sau le fafine i le tatala le faitoto’a.

“Faamolemole lava po o iai le tama o le aiga i le fale?”  O le fesili lea a le tasi o toeaina.

“E leai, o lo o alu e faigaluega i le taimi nei,” o le tali lea a le fafine.

“Ia ua lelei, o le a matou o atu i tua e nofonofo e faatali ai le manava mai o lou toalua,” o le tali atu a le toeaina.

“E iai se mea o manaomia?  E mafai ona malolo mai i totonu o le fale e taumafa se vaiinu e faatalitali ai le tama o le aiga,” o le tala mai lea a le fafine.

“Faafetai lava, ae o le a matou faatalitali, seia o’o mai le tama o le aiga,” o le toe fai atu lea a le toeaina lava lea e tasi.

Ua o atu nei toeaiina nei e toatolu ma nofonofo i lalo o se laau paolo i tua o le fale.

Ua o’o i le afiafi, ona manava mai lea o le tamaloa.  Ma ua feiloai fiafia ma si ona toalua ma lona afafine.

“O lo o iai ni toeaiina se toatolu o loo i lalo o le laau lea o lo o i tuafale, na o mai analela,” o le tala lea a le fafine i lona toalua.  Ua susu’e e le tamaloa le ie faamalama o le fale ma tilotilo atu i tua o le fale, i le mea o lo o nofonofo mai ai toeaiina e toatolu.

“O le a le mea o lo o mananao ai?” o le fesili lea a le tamaloa.

“Ou te le iloa, na fesili mai po o e i le fale, na ou fai atu iai, o la e te alu e faigaluega.  Na fai mai lea o le a faatali sei e manava mai.  Sa ou fai iai e o mai totonu o le fale, ae fai mai e leai, o le a faatalitali i fafo,” o le tala la a le fafine.

“Ia ua lelei, alu e fai iai e susu mai totonu o le fale, ae so’u alu e sui o’u ofu faigaluega,” o le faatonuga lea a le tama o le aiga.

Ua savali le tamaloa agai i le potu moe e sui ona laei, ae ua savali le fafine i fafo e valaau nai toeaiina, e o mai i totonu o le fale.

Ae peitai, na tali mai le toatasi o i latou e faapea, “E le mafai ona matou o atu uma i totonu o lou fale, i le taimi e tasi.  E na o le toatasi lava le tagata e mafai ona ulufale atu, i le taimi e tasi.  O a’u, o Mau’oa.  O le alii lea, o Manuia.  Ae o le tama lena e pito atu ia te oe, o Alofa.”

“Toe alu e talanoa i lou toalua, po o ai o i matou e tou te manana’o e alu atu i totonu o le fale,” o le tala lea a le toeaina.

Ua toe foi le fafine i totonu o le fale ma faamatala atu le tala a le toeaina, i lona toalua ma le la tama teine.  Ona fesili lea o le fafine, “O ai o nei toeaiina e tatau ona sau i totonu o le fale?”

“Aumai Mau’oa,” o le tali vave mai lea a le teineititi. “O lo o manaomia ni a tatou tupe.”

 “E leai, alu e fa’aafe mai ia Manuia,” o le tali atu lea a le tamaloa.  “Ua manaomia lava ni a tatou faamanuiaga.”

Na fai sina umi o tu le fafine ma mafaufau i tali a lona toalua ma lana tama teine, ona ia faapea atu lea, “E leai, e tatau ona sau Alofa.  O se aiga e iai le Alofa, o se aiga fiafia lea.”  Ua malilie uma le tamaloa ma le teineititi i le tali a le tina o le aiga ma ua toe foi atu nei o ia i fafo, e fa’aafe mai Alofa.

“O ai o outou e suafa ia Alofa, faamolemole?” o le fesili atu lea a le tina i nai toeaiina.

“O a’u lea,” o le tali mai lea a se tasi o toeaina ma tulai mai i luga.

“Ia, afio mai lau afioga, tatou te talisua faatasi,” o le fa’aafe atu lea a le fafine.

Ae na fa’ate’ia le fafine, ina ua u mai lona tua e agai atu i le fale, ae o lo o mulimuli atu le toeaina o Alofa, ae tutu ifo i luga ma leisi toalua, ma mulimuli atu ia Alofa.  Ua tu le fafine ma faapea mai, “Oi, faapea na tou saunoa mai, e na o le toatasi lava o outou e mafai ona ulufale mai.”

Na tali Alofa, “Ana e filifilia Mau’oa, e na o Mau’oa e ulufale atu i lou maota.  Ana e filifilia Manuia, e na o Manuia foi e te lua o.  Ae peitai, ua e filifilia lo’u nei tagata.  O so’o se mea lava e alu iai, pe iai foi le Alofa, e mulimuli atu iai ma Mau’oa ma Manuia.”

IA MANUIA TOE FUAFUAGA O LENEI VAIASO.