Auina mai tagata faigaluega Starkist i le va'alele togipau

O le taeao o le aso Toonai na te’a nei na tulaueleele mai ai i le tatou malaeva’alele se va’alele togipau o le Falcon 50 ina ia fa’aoo mai ai nisi o le aufaigaluega iloga a le StarKist na talosagaina e fia oo mai.

O i latou nei o ali’i Inisinia ma sa na’o le tuuina mai lava o nei ali’i inisinia ma toe tu’uva’a ese atu lea va’alele.

Ua fa’ailoa mai fo’i e le ta’ita’i o le Komiti Fa’afoe o le Coronavirus a le tatou Malo, Iulogologo Joseph Pereira, “O ali’i inisinia fa’apitoa nei e ao lava ina latou toe fa’aleleia nisi o vaega o masini a le StarKist ina ia mafai ona fa’aleleia atoatoa le latou tautua ma faafaigaluega atoatoa le latou aufaigaluega i lenei vaitaimi.”

Ua ia fa’ailoa mai o le talosaga na fa’aulu mai lava e le Ofisa autu o le Kamupani I’a i le tatou nei malo, ma ua latou fa’afetaia lava le talia o lenei talosaga. Ua iloga fo’i le mana’omia lava ona faia o nei galuega toe fa’aleleia mo le fa’agaoioiga o galuega uma i le Kamupani I’a.

Ua fa’ailoa fo’i e Iulogologo, ua mae’a ona faia ua suesuega i le va’alele ma sui ua auina mai mo lea galuega fa’ato’a fa’ataga ai le tulaueleele mai o lea va’alele ma lana pasese.

Ua fa’aaoga fo’i le fa’asa o lo’o faia nei ma le nofo va’ava’aia fo’i o nei inisinia mo le 14 aso e pei ona fa’atulagaina ai e le tamau mo e malaga mai i le atunuu. O lo ua fa’amalosia uma fo’i aiaiga o le tamau lenei mo nei ali’i faigaluega ma i latou e feso’ota’i ma i latou o le 2,500 o le aufaigaluega a le Kamupani I’a mo le isi 14 aso.

Ua faaalia toto’a e Iuloglogo, “O lo’o aofia lava le Star Kist i aiaiga uma o loo fa’amalosia mo le fa’asa ona o le pipsi mai o le Coronavirus i le lalolagi.”

Sa taofia i latou nei i le nofoaga i Fatuoaiga i le aoauli o le aso To’ana’i mo le 14-aso, ae o’o ane i le po o lea lava aso, ua ma’ea ona faia suesuega ma iloa ai e le maua i le coronavirus. Ua tuua e i latou nei le nofoaga i Fatuoaiga, ae nonofo e fale a le StarKist i Atu’u.  O lo’o va’avaia pea i latou nei e sui o le Matagaluega o le Soifua Maloloina ae maise i latou mai le StarKist.