‘Au fili baseball Amerika Samoa U18 - Oceania Guam 2019

Na asiasi le Au Fili Baseball U18 a Amerika Samoa i le Ofisa o le Kovana i le aso Lulu na te'a nei, mo le taua'aoina atu ia i latou o le $15,000 ua tapena e le Malo mo le latou 'au e malaga ai i Guam mo le Ta'amilosaga Baseball a le Oceania.

E tu'ua e i latou le territory ia Ianuari 17, 2019 mo Guam, e ui atu i Hawaii.

I le taimi na feiloa'i ai le Peresetene o le Asosi Baseball a Amerika Samoa Marcus Langkilde, le sui peresetene Victor Langkilde ma lea a'u fa'amoemoeina a le atunu'u, fa'apea fo'i ma nisi o matua sa molimauina lea fa'atasiga, na saunoa tima'i ai le afioga i le Kovana Lolo Moliga e tusa o le taumafaiga i lea fa'agatama, ae maise o le matu'u ese atu o nei alo talavou o le atunu'u mo lea tauvaga.

"Ia tautuana lava le saogalemu o fanau nei tou te malaga. Ia lelei nofoaga e nonofo ai ma ia tausia lelei fo'i le fanau i ma'i mai se tasi, pe fa'amanu'alia mai se tasi i tou feoaiga.”

Sa ia saunoa e tusa o le tupe ua taua'aoina. "O lenei seleni e $15,000 ua tapena i ai le malo, o fanau nei e le'i uma le pule a Matua, ae ia tou iloa lelei, e ui ua mae'a sainia e matua le maliliega, ae tatau ona tausia lelei fanau ma va'ava'aia lelei. Ia fa'atasi le Atua i le fa'amoemoe ua outou tu'ua ai aiga ma le li'o sili ona saogalemu ai outou, o lotoifale o tou aiga. Ia ta'alo ia mata'alia, aua e fia maua uma lava e 'au uma le sini ma le fa'amoemoe o le Manumalo!"

Na taua'aoina le siaki, ae toe fa'apea ane lava se tima'i a le afioga le Kovana i ta'ita'i o le Asosi Baseball, "Ua ou lagona e ao ina mataituina fo'i e le malo isi ta'aloga nei e fiafia i ai le isi vaega o le fanau talavou a le atunu'u. O le ta'aloga fo'i lea e matua sefe atu nai lo le Lakapi ma le Football lea ua matua tele i ai le fa'amuamua a aiga ma fanau talavou. O le ala fo'i lea o le naunau e foa'i le malo mo ona tupulaga faia'e nei e ta'a'alo ma tausinio fa'avaomalo i le Baseball."

E amatalia lea ta'amilosaga a le Oceania ia Ianuari 23 se'ia o'o i le 27, 2019 i Guam. E to'alima atunu'u ua aofia i le tatou sone a le Oceania, Niu SIla, Ausetalia, Palau, Saipan ma Amerika Samoa.

Ua fa'ailoa mai e le susuga Marcus Langkilde, "Matou te iloa ua matua lava tapena le tatou 'au fa'avaomalo ua mae'a filifilia mo lenei fa'amoemoe. Tatalo atu mo le taumafaiga ia i'u manuia mai."

O le 'au ta'alo e to'a 11 tama ta'a'alo ua mae'a pikia. O coach e malaga ma le au taalo e Brent Haring, o le Assistant Coach a BYU Hawaii fa'atasi, Dave Eldredge ma Victor Langkilde.

O le atunu’u e manumalo i le ta’amilosaga i Guam e avea ma sui o le Oceania i le World Baseball Championship i le 2020 i Korea.

I le fa'atausi'usi'uga o le tautalaga a le kovana, sa ia toe tima'i ai i le laulautofi a le Asosi Baseball, "Ia tautuana tufatufa fo'i sina seleni i le fanau mo nai a latou fa'atauga o ni nai suvania mo latou e fa'amau ai lenei malaga a'o talavou mai Guam. Ae maualuga lava i la outoiu silasila, ia lelei tausia le fanau."

Ona ia toe fa'aopoopo ane lea ma le isi meaalofa a le Malo, e 30 pusa wahoo mo le latou oso e masi'i ma i latou.

Na fa'ailoa e Victor Langkilde o le Faia'oga o lenei 'au mai le amataga, "Ua mae'a feso'ota'i i matou ma se tasi o alo o Amerika Samoa ua nofo mau nei i Guam, Carol Ma'afala Baqui, ma ua ia fa'ailoa mai, ua feso'ota'i uma i latou o tagata Samoa i Guam, mo lenei taligamalo. Ua fiafia i latou o lo'o pa'au atu lenei 'au ma o fanau fo'i a i latou mai le tatou motu. Peita'i, ua tapena uma lava faletalimalo e nonofo ai. Ua mae'a fa'amautu i matou e nonofo i le Best Western Hotel e latalata lava i le Malaeva'alele i Guam."

O le agaga o le fa'afetai sa latou talia ai le meaalofa ua taua'aoina mo i latou. Ua fa'ailoa fo'i lo latou agaga fa'afetai tele i kovana mo lona alofa faitama i le fanau, ma ua taua'aoina ai e Marcus Langkilde le Jersey o le au masi'i mo le afioga le Kovana. O latou toniga lea e malaga ai.

Na le muta ai iina le a'ao foa'i o le afioga le Kovana ma le faigamalo, peita'i sa saunia lelei fo'i se 'aiga matagofie mo le fanau e tausia lelei ai i latou i le aso ananafi.

O le ‘au a Amerika Samoa U18 mo Guam:

• to'alua o sui mai Tafuna High: Isley Samuelu Level 11 ma Aman Leutele Level 9;

• Nuuuli VocTech High ua tula'i mai ai Pa'i-Johnson Rovana Tufugafale Level 12;

• to'afitu mai le A'oga Maualuga Marist Fa'asao High, Taofinu'u Nikolao-Mutini Level 11, Ethan Langkilde Level 11; Aumaia Masunu Level 11; Marcus Langkilde Level 12; Joshua LamSam Level 10; Kelemete Etuale Level 12, ma

• Seugalupe Mika mai Leone High Level 12.

Peita'i e to'a sefulumale tasi le 'au masi'i mo lenei fa'amoemoe i le sui lava e to'atasi, e a'oga o ia i Lupelele Elementary School, le susuga Tyrese Leutele. O ia lea o lo'o malaga fa'atasi fo'i ma lona uso matua o Amaru Leutele mai Tafuna High.