Aso malolo i le Aso Gafua, Me aso 29, tapunia ofisa o le malo

Pago Pago - AMERIKA SAMOA

Ua fa’ailoa e le afioga i le kovana ia Lemanu P.S. Mauga e faapea o le aso Gafua, 29 o Me, o se aso malolo o le Memorial Day i Amerika Samoa, mo le Fa’amanatuga – o se aso malolo fo’i lea a le feterale, ma e tolu aso o le fa’aiuga o le vaiaso i le teritori.

“O le Aso Fa’amanatu Memorial Day ose taimi e fa’amanatu ai ali’i ma tama’ita’i toto’a na faia le osigataulaga tupito i le tautuaina o lo tatou atunu’u tele,” o le saunoaga lea a le ali’i kovana i le fa’alauiloaina o le aso malolo.

"Ou te faʻamalosia outou uma e faʻaalu se taimi i lenei faaiuga o le vaiaso e faʻamamaluina ai le manatuaina o a tatou toa ua paʻu'ū o ē na ofoina atu ma le le manatu faapito o latou ola e puipuia lo tatou saolotoga. Faafetai mo lo outou galulue malosi. Ia manuia ma fiafia i aso malolo o le vaiaso,” o le saunoaga lea a Lemanu.

I se fa’amatalaga na tu’uina atu i le Aso Lulu, e fa’amamaluina ai le Memorial Day, na ta’ua ai e le faipule i le konekeresi ia Uifa’atali Amata e fa’apea, “Ou te ‘auai uma i Amerika ma Amerika Samoa i le fa’amanatuina o tagata totoa uma o le tautua a le Iunaite Setete sa ofoina atu le taulaga silisili mo lo tatou atunu’u ma o tatou tulaga fa’atauaina.”

“Ua iloa lelei e tagata Amerika Samoa le mamafa o nei taulaga. Talu ona avea i tatou ma vaega o le Iunaite Setete, o lo tatou Toa o Samoa ua tau ma feoti faatasi ma o latou uso a Amerika e puipuia lo tatou olaga,” o lana faaaliga lea.

O le aso malolo lea ua faalauiloa, o le a tapunia uma ai ofisa o le malo i le Aso Gafua ma le tele o pisinisi i le teritori e aofia ai ma le kamupani tumaoti aupito tele i le teritori, le StarKist Samoa.

I le fa’amanatuina o le Memorial Day o le a leai se lomiga a le Samoa News i le Aso Gafua ae toe fo’i mai i le Aso Lua. Ia manuia le

faaiuga o le vaiaso e 3 aso, ma ia taitaiina i tatou uma e le Alii i

ona tulaga aao.