Asia e Ta’ita’i o le malo pagota o loo taofia i le toese i Tafuna

O loimata o le fiafia ma upu o le fa’afetai na lofia ai lagona o pagota uma o loo taofia i le toese i Tafuna i le aso ananafi, ina ua asia i latou e ta’ita’i o le malo fa’apea ai sui o le Kapeneta, ma le mamalu o le atunu’u na maua le avanoa e fa’atasi atu ai i le asiasiga masani a le afioga i le ali’i Kovana ia Lolo Matalasi Moliga ma lana faigamalo, lea ua atoa nei le fa tausaga o lo’o fa’auaua mai pea.

E pei ona masani ai i asiga a le kovana i tausaga e 3 ua mavae, e foa’i e le malo taumafa ma upu fa’alaeiau mo ali’i ma tama’ita’i pagota, ae tali mai le nofoaga o le toese i fa’afiafiaga faa Samoa atoa ai ma pese Kerisimasi, faapea ai ma CD pese kerisimasi a pagota, mai le aufaipese a le Amazing Grace Vol. 2, lea na foa’i atu e le toese e fai meaalofa atu ai i le ta’ita’i o le malo.

Na matua fa’atumulia le nofoaga o le toese i Tafuna i sui o le malo, fa’apea ai le aufaipese mai le Matagaluega o Tautua ma Auaunaga Lautele a le atunu’u (DHSS), lea sa latou lagiina viiga o le Atua, ae o le isi itu o le malo sa fa’atumulia i ali’i ma tama’ita’i pagota.

O le mae’a ai o se sauniga lotu puupuu e amataina ai le polokalame, fa’apea ai ma viiga o le Atua na lagiina lea e le aufaipese a le DHSS, na sosoo ai loa lea ma le saunoaga fa’apitoa mai le afioga i le ali’i kovana.

Na taua e le ali’i kovana i lana saunoaga e fa’apea, o le asiasiga i le toese i Tafuna mo le 4 lenei o tausaga talu ona amata mai, e fa’ai’u ai lava asiasiga a le malo i le fa’aiuga o le tausaga i nofoaga pito sili ona faigata i totonu o le atunu’u e aofia ai le Hope House i le Fatuoaiga, Falema’i o le LBJ i Faga’alu, aemaise ai le toese i Tafuna.

“E mafua ona manatu le malo e fa’ai’u mai iinei la latou asiasiga i tausaga ta’itasi, ina ia silafia ai e outou uma o loo nonofo i le toese i Tafuna, e le o fa’agaloina mai lava outou i o matou loto i le ao ma le po, e le gata o loo nonofo tatalo mai aiga ma matua ina ia vave mai se aso tou te toe fo’i atu ai, ae o loo nonofo tatalo mai fo’i le aufaigaluega a le Atua fa’apea ai le atunu’u atoa”, o le saunoaga lea a le afioga i le ali’i Kovana.

O le fa’aauau ai pea i tausaga ta’itasi o le polokalame o pesepesega o le Kerisimasi a le malo mo le 39 lenei o tausaga e pei ona saunoa le ali’i kovana, na mafua lea ina ia mafai ai ona fa’asoa le agaga moni o le Kerisimasi e aufaipese eseese uma lava mai itu eseese o le atunu’u.

“E taua feau eseese o loo momoli mai e pesega, e fa’apena fo’i i lenei tauao (taeao ananafi), ua ou maitauina lo outou laufofoga fiafia, ua momoli mai ai se lagona ia maua ma le afioga i le Lutena Kovana ia Lemanu Peleti Mauga ma le malo, o loo i ai pea lo outou fa’amoemoe i le Alii i taimi uma ao outou aumau ai i le toese”, o le saunoaga lea a le ali’i kovana.

“E tofu tagata uma ma meaalofa na aumai e le Atua, e tofu fo’i tagata soifua uma ma fa’aletonu i o latou olaga, peita’i e le fa’atagaina e le Atua ia fa’aletonu e fa’aleagaina ai meaalofa ma taleni ua ia foa’i ia te i tatou, ae tatau ona tatou fa’agalogalo fa’aletonu ae saili se avanoa tatou te fa’aaogaina ai taleni na aumai e le Atua mo i tatou”.

“Ia avea lo outou aumau ai lenei nofoaga ma auala e fanau mai ai taleni eseese e fa’aaoga mo aiga, malo faapea ai le atunu’u atoa. Ia outou maua le onosa’i ma le fa’amoemoe i le Ali’i ao tuli ai a outou fa’asalaga”.

“O le lu’itau tele mo outou ao aumau ai i lenei nofoaga, ua lava le tasi o le taimi e sese ai, aua e aoga le sese e toe fa’atonu ai vaega o le olaga ua fa’aletonu, ma aumai ai e le Atua isi avanoa e tele e fa’atonu folau ai le lumana’i o le tagata soifua”.

“Avea lo matou malaga asiasi mai i tausaga ta’itasi o se avanoa e lu’i ai o outou lagona ma vave ai ona outou toe fo’i atu i tua i aiga, ina ia fa’aaoga tatau lo outou taimi ma lo outou soifua e tautua ai le Atua ma lana galuega. Ia manuia outou uma o loo aumau i le toese i Tafuna”, o le fa’aiuga lea o le saunoaga a le ali’i kovana.

O fa’afiafiaga i siva ma pese sa fa’atinoina e vaega e 2 a pagota, na matua fa’amalieina ai le maimoa ma le silasila a le to’atele na maua le avanoa e fa’atasi atu ai i lenei asiasiga, i le onomea ma le atamai o ali’i pagota i le fa’atinoina o latou fa’afiafiaga, lea fo’i na momoli fa’atasi mai ai ma lo latou agaga fa’afetai.