Apili e Vaanatiu Iafeta lana tagi faasaga i le LBJ

Pago Pago - AMERIKA SAMOA

O le uluai aso o lenei masina, na fa’ao’oina atu ai e le susuga ia Vaanatiu Tofala Iafeta, ia sana tusi i le faatonusili o le LBJ, le susuga ia Dr. Akapusi Ledua, e saili iai le tulaga ua o’o iai lana tagi sa faaulu e faasaga i le pulega a le falemai, faapea lana apili i le faamutaina faasolitulafono o lana konakarate faigaluega.

O le susuga ia Vaanatiu sa faauluulu iai le potu fa’ata (Radiology) a le LBJ ma sa faate’aina o ia i le masina o Aukuso o le tausaga nei.

Sa ta’ua e Vaanatiu i lana tusi ia Ledua, o le faateina o ia, sa faia ma le pogisa, e aunoa ma se iloiloga e faamanino ai le mafuaaga ua fa’ate’a ai o ia, e ui ina sa ia talosagaina le faia o se iloiloga e mafai ai ona nofo malamalama i le mafuaaga o le faate’aina o ia.

O lo o ua taofi Vaanatiu, ua solia e le LBJ tulafono faavae mo tagata faigaluega (Equal Employment Opportunity), o le faaalia o uiga faaituau, o le faia o uiga taufa’amata’u, taufaaleaga, ma le taui ma sui.

Sa maua e Vaanatiu le tusi e faate’a ai o ia, e aunoa ma se mafuaaga.  Ona sa taofi le pulesili a le LBJ, e pei ona sa saunoa mai ai i le Samoa News, e le o se matafaioi a le LBJ, ma e le o finagalo foi le LBJ, e tu’uina atu se mafuaaga, e pei ona ta’ua i totonu o lana konakarate.

Na saunoa Dr. Ledua, e mafai e le falemai ona faate’a Vaanatiu e aunoa ma se mafuaaga.  Ae na o le pau le tulaga e mafai ona o latou fa’ailoa mai, o le fa’ate’aina o Vaanatiu, e mo le lelei o le falemai faapea lona Visa (e ui ina e le i faamanino mai e Dr. Ledua le uiga o le ‘Visa’ lea na saunoa iai).

Sa ta’ua Vaanatiu i lana tusi ia Novema 1, 2023, sa ia faatinoina ma le faatuatua ma le ma’ema’ea ia lana konakarate, aua le lelei o le LBJ ma tagata o Amerika Samoa.  Sa ia ta’ua foi le ofoina atu o lenei galuega a’o galue o ia mo le setete o Arizona ia Ianuari 2003, ma o ia foi ua umia se laisene mai Amerika mo le ‘American Registry of Radiologic Technologist (ARRT)’, ma ua atoa le 20 tausaga o ona tautua ma le faamaoni ia tagata o Amerika Samoa.

Sa ia ta’ua foi, o ia o se fitafita litaea mai i vaega’au a Amerika ma sa soifua mai o ia i Manu’a.

O lo o taofi le susuga Vaanatiu, e le i faate’aina o ia mail ana galuega, i ala o le tulafono, ma ia fesiligia pe e mo le lelei o le falemai, le faate’aina o ia, ae toe ai na o se tagata faigaluega e toatasi o lo o umia se laisene ARRT, e na te tautuaina se falemai e 150 gasegase, atoa ai ma le le umia e le pule fou o iai nei, se laisene ARRT.

Na fa’alauiloa mai e Dr. Ledua i le taimi sa faate’aina ai le susuga ia Vaanatiu, o lea ua vaaia e le susuga ia Mapuitiga Talo ia le potu fa’ata a le falemai.

Na fa’aalia e le susuga ia Vaanatiu, na amata mai lava lenei faafitauli ia Ianuari 2023, ina ua fa’aalia e taitai o le komiti faafoe a le LBJ, sa iai i lena vaitaimi, ia ni faafitauli mai i le vaega o fa’ata (Radiology Dept), ma pasia ai se faaiuga e suesueina o ia ona o ni tagata maliliu se to’alima, e pei ona faia ai ni tuuaiga e Dr. Harold Walker.

O sui o le komiti faafoe na iai i na vaitaimi, na aofia le susuga Moefa’auo William T. Emmesley Jr., a’o avea ma pulesili o le falemai, o Dr. Ledua faapea ma ni fomai a le Ekalesia a Iesu Keriso, lea na malaga mai i atunu’u i fafo.

O lo o ta’ua e le susuga Vaanatiu, e o’o mai lava i le aso, e leai lava seisi na talanoa atu ia te ia, po o le susuga ia Dr. Gary Bernabe (Chief Radiologist), ina ia mafai ona soalaupuleina lenei mataupu.

Sa ta’ua foi e le susuga Vaanatiu, o le fono lea sa faia a taitai o le komiti faafoe, sa tuuaia ai o ia e Dr. Walker, o se fomai pasi mai Amerika (Inverventional Radiologist) ma ua toeititi atoa le 40 tausaga o galue i lenei matata, e 5 ni maliu na mafai ona foia, ina ua mae’a ona ia tagai i ni fa’ata a nei tagata.

Na saunoa le susuga Vaanatiu, e le i faia se suesuega a le komiti faafoe e tusa ai ma nei tuuaiga matautia ma ua fai mai i latou, e leai se mafuaaga e tatau ai, ae ua taofi Vaanatiu, ua sili ia i latou ona osofaia tagata faigaluega e le o iai ni a latou sese.

Na ta’ua foi e le susuga Vaanatiu i lana tusi e faapea, o le le faataunuuina e le komit faafoe a le falemai o se suesuega i nei tuuaiga e faapea, sa mafai ona foia le maliliu o ni tagata se to’alima, e fa’ailoa mai ai le leai o manatu alofa o taitai a le falemai i soifua o tagata, ma e latou te le tu malosi mo le saogalemu ma le tausiga o soifua o tagata o le atunu’u.

Ua ia taofi foi, e le i fia manao le komiti faafoe e fofoina faafitauli i totonu o le potu fa’ata pe saili le mafuaaga o nei maliu, po o tu’uaiga ina ia mafai ona taofia ai le toe tupu o nei faafitauli.

Na ta’ua foi e Vaanatiu, ina ua fa’asalalauina e le LBJ le faate’aina o ia, i le Samoa News ma isi vaega fa’asalalau ia Aukuso, o sa latou lea taumafaiga ina ia taufaaleaga lana galue ma e faatu’iese foi i faamatalaga sa faasalalauina i totonu o le Samoa News i le aso 21 o Aukuso, 2023, e faatatau i le faate’aina o ia.

E fia faamanino atu e le Samoa News, sa tali mai le LBJ po o le komiti faafoe i fesili na tu’uina atu ia i latou, ina ua mae’a ona salalau le tala e uiga i le faate’aina o le susuga ia Vaanatiu.  Ma i le tali mai a Dr. Ledua, sa ia ta’ua ai e faapea, o nisi o faamatalaga e patino i le tagata faigaluega, e le mafai ona faailoa mai, faapea ai ma le mafuaaga sa faate’aina ai o ia, seia vagana ai le faaupuga, ua faateaina o ia e aunoa ma se mafuaaga, e pei ona faatagaina mai i totonu o lana konakarate.

Ua taofi foi le susuga ia Vaanatiu, o le mataupu lea i tagata maliliu e to’alima, e tatau ona a’afia uma ai lava ma le faatonusili, CMO, CFO, MIS, QA, o fomai faapea isi o ofisa a le falemai, ae le tatau ona aafia ai tau lava o ia, ae peitai, ua talitonu le susuga ia Vaanatiu, ua le faataunuuina se suesuega o lenei mataupu, ae ua fa’ate’a ai o ia.

Ua tu’uaia e le susuga ia Vaanatiu ia le LBJ e faapea, o le mataupu lenei i maliu, o ni tuuaiga matuia i le le faataunuuina lelei o tiute a le falemai ma sa tatau i le LBJ ona fa’ailoa atu i aiga o i latou ua maliliu, sa mafai ona faasaoina soifua o a latou tagata.

Ua talitonu foi le susuga ia Dr. Vaanatiu, e manaomia ona tu’uina mai e Dr. Walker ia ni faamaoniga o nei tu’uaiga.  Afai e le mafai, e tatau ona ia faatoese i tagata faigaluega uma a le LBJ.

Ua ia talosagaina le taliaina o lana tusi ia Novema 1, 2023, o se ripoti i se faalavelave na tupu (Incident Report), o se faasea, o sana tagi, e faatatau i nei maliu e 5 na mafai ona foia, ma ia faia iai se suesuega.

O lo o aofia foi i totonu o le tusi a le susuga ia Vaanatiu ia ni tuuaiga faasaga i le faatonusili o le falemai, le susuga ia Dr. Ledua faapea ma le CFO ia Sefanaia Kaumaitotoya.

Sa faaiuina le tusi a le susuga ia Vaanatiu i lona faanumeraina lea o auala e mafai ona fofoina ai lana tagi.

1. Fai se suesuega auiliili i le LBJ e faasaga i maliu e 5 ia na ta’ua e Dr. Walker, ma e na te talosagaina le auai o sana sui e mafai ona iloiloina lenei mataupu i luma o le Komiti o le Soifua Maloloina i le Maota Fono.
2. Fa’ata’ape vave le komiti faafoe ae sui tulaga iai ni tagata e alolofa ma le faamaoni i le faatinoga o a latou tiute, o i latou e malamalama i o latou tiute ma tofiga, i le avea ai ma totino o le komiti faafoe a le falemai.
3. Ia faatulaga ni auala e uia e fofoina ai faafitauli o le a maua mai i lenei suesuega, ma ia faatulagaina ni faatinoga e mafai ai ona faaleleia atili le tausiga o soifua maloloina ma le saogalemu o gasegase.
4. Ia u’unaia le komiti faafoe ina ia faatulagaina tulafono e fofoina ai faafitauli e tulai mai i totonu o falemai ma le tali atu i faasea e ono tulai mai, ae le o le faalavelave i le faatinoina o tiute a le aufaigaluega a le falemai.
5. Toe ave’ese uma faaiuga sese ma le solitulafono a le komiti faafoe ma le pulega o iai.
6. Toe faafo’i o ia i lana galuega pe totogi atu le 10 masina o lo o totoe i totonu o lana konakarate.

O kopi o le tusi a le susuga ia Vaanatiu ua faaooina atu nei i le kovana, lutena kovana, le peresetene o le senate, le Fofoga Fetalai, o le maota fono faapea le CMS-Region 9.

O se tali mai i le Taitaifono a le Komiti Faafoe a le LBJ, ia Dr. Malouamaua Tuiolosega, e tusa ai ma le tusi a le susuga ia Vaanatiu, na ia fa’ailoa mai ai le nofo malamalama o le komiti faafoe i le tusi a le susuga ia Vaanatiu Toafala Iafeta.  Ma o se mataupu mamafa i le komiti faafoe, ma ua amataina nei se suesuega i mataupu e pei ona faatulai mai e Vaanatiu.

Na ta’ua foi e Dr. Tuiolosega, e fia faamanino mai e le komiti faafoe, e le moni tuuaiga ua faia e faasaga i le CFO ia Sefanaia Kaumaitotoya ma e le o auai le CFO i iloiloga o nei mataupu, e aofia ai ma le filifiliga o le kamupani mo le toe faaleleia o le ofisa o tupe a le falemai.

O isi tuuaiga o lo o ua faia ai nei suesuega, ma e le mafai ona faia mai se faamatalaga mai i le komiti faafoe, seia mae’a nei suesuega.