Apefa’i Taifane Jr ma Melody Nua - tama fanau a Amerika Samoa

APEFAI TAIFANE JR. - FILIFILIA SIKOLASIPI A LE CCCAA I LE FOOTBALL

Mai Sacramento, Kalefonia ua fa'alauiloa ai le ausia e se tasi o atali'i o Amerika Samoa mai Amanave, Apefai Taifane Jr, ona o le fa'aauau pea ona ausia e ia i le 4.0 GPA, ua mauaina ai le sikolasipi e totogia ai lana a'oga faatasi ma ta'alo i le Football i le Kolisi a Calefornia Polytechnique University i le amataga o le tausaga nei.

O se mea e mata'ina ai le taumafaiga a lenei alo o le atunu'u, ona e to'alua ia te ia i la'ua na ausia le 4.0GPA i le vasega o tamaiti ta'a'alo uma i le Calefornia Comunity College Athletic Association, ma ua atoatoa la'ua Sikolasipi ua taua'aoina nei mo le 4 tausaga.

O le isi sui agava’a o le tama'ita'i o Breanne Dubberke, lea sa a'oa'oina i le Kolisi a Fresno City, ae o Taifane Jr sa a'oga i le Kolisi a West Hills Coalinga. O le ta'aloga a Breanne o le Volley Ball, ma o nei sikolasipi, na fa'alauiloa ia Fepuari 20.

O Taifane Jr.,  o le alo o Apefa'i Taifane ma le tofa Taula Niualama Taifane o lo'o avea ma Fa'atonu o le Amerika Samoa Humanities Council.

Mo le taualoaina o nei avanoa fa'asikolasipi atoatoa a Apefai ma Breanne, o le a faia se tauaofiaga a le CCCAA i Concord ia Mati 2018 e fa'atasi atu ai ma le isi to'a 18 o fanau a'oga ua ausia fo'i avanoa fa'apenei mai isi Kolisi i Kalefonia, ma ua auai fa'atasi i latou i le Scholar -Athlete Honor Roll lea e amata mai i le 3.5GPA.

O Taifane Jr, sa amata na ta'alo Football i le tulaga o le “tight end” a le Kolisi o West Hills Coalinga, lea na maua le 2016 Goldern Coast League Championship ma sa tele fo'i lona sao i le toe fa'amautuina o le latou manumalo i le Northern Calefornia Football Conference American Division Title.

I lona tausaga lona lua sa ta’aalo i le “Offensive Line”. I le tausaga lena sa mauaina ai e ia le fa'ailoga All-Golden Coast, All-State Region ll First-Team na fa'atoa maua fo'i e lana 'au. E fa'aopoopo i ai i lena lava tausaga na maua ma le Ipu o le First-Team All America. Ma ua avea Taifane Jr., ma Kapeteni o le Falcons a lana kolisi, ma maua ai le fa'ailoga "WHCC's Commitment to Excellence Award," ina ua palota uma lana 'au ta'a'alo, e fa'ae'e ia te ia lena fa'ailoga taua.

I aoaoga i le potu a'oga, na mafai e ia ona maua le 54 units i le GPA 4.0 i ana semester e tolu o le amataga o lona olaga a'oga i West Hills. Na toe fa'aopoopo le isi 24 units a Taifane i le toe afa tausaga mulimuli i lana kolisi, ae le avea ai lava le ausia e ia o le 4.0 GPA. O le a taumafai e sailia lona fa'ailoga Associates of Arts i le Social & Behavioral Science. O ia o le totino o le Phi Pheta Kappa.

I le taimi nei ua mae'a ona ia taua'aoina lana talosaga - National Letter of Intent a Ianuari 2018, o le a amata ai ona ta'alo Football i Calefornia Polytechnc University ma a'oga ai fo'i.

MELODY NUA-TAMAITA’I TA’ALO “REBELS UNLV”, AVEA MA SUI FAIAOGA

Mai Las Vegas, ua lipotia ai se tama'ita'i e tupuga atu i Amerika Samoa, Melody Nua, ua toe fo’i i lana Iunivesite sa ta'alo Volley Ball ma a'oga ai, University of Las Vegas (UNLV).

Peita'i, ua mae'a lana a'oga, ae ua toe fa'afaigaluegaina e le UNLV, e avea ma Sui Faia'oga i le Ta'aloga Volley Ball a le UNLV.  O Nua o se alo e fa'asino ia Maligi ma Minnie Nua mai le Alataua fo'i. O i latou o lo'o alaala i Torrance ma fanau ai le tama'ita'i lenei ia Novema 27, 1987.

Na amata ona ta'alo i le Volley Ball a'o a'oga i le Lakewood High School i Kalefonia lava. Ma sa iloga ai fo'i lona ma'ema'ea o lana ta'alo i lea fa'agatama. I lona tausaga lona fa i lana Iunivesite i Las Vegas na toe avea ma Seti fa'amoemoeina, a le UNLV ‘Rebels’. O lana matati'a i le a'oga, na tulaga lua o ia i le tagata na sili ona ia sefea le polo i ana ta'aloga uma. E na'o le to'alua lava seti ua ausia lea ituaiga o matati'a, o  Nua le tasi o ia sui.

Na amata ona ta'alo i UNLV i le 2005 sei'a o'o i le 2008, ae o lea ua avea ma sui faiaoga o le volleball ia Dawn Sullivan lea e Coach i le tausaga nei.

A'o le'i maua e ia lea avanoa i Las Vegas sa avea o ia ma Fa'atonu o le Volley Ball i le Loyola Maramount i le tausaga na te'a.

I se toe tepa i le amataga o le soifua ta'alo o Nua i le UNLV na fa'ailoa mai ai, "O ia lenei na amata loa ona seti mo le Rebels, e le'i toe fa'ataututu mai se 'au i ai ma i'u ai ina mautu mai le Ipu o le siamupini 2007 Mountain West Conference Championship. E iloa lelei e Melody Nua le naunauta'iga i le malo e le faigofie, ae faigata le ala i le siamupini."

Ua iloga i a'oga sa faia'oga ai o ia, e le o misia lava ma le si'itia o le tulaga o le Volley Ball i na a'oga, e tofu maua lava siamupini a ana 'au sa faia'oga ai i Desert Elite ma Club Vegas i le 2010-12. Na soso'o lea ma le si'itia Los Alamitos High School ma faia'oga i le JV Volley Ball ma o'o fo'i ina avea e ana 'au le tulaga o 'au pitoaluga e lua o lea ta'amilosaga. Na avea lea o Nua ma Head Coach i Valley Christian High School i Cerritos ma na maua e lana 'au lea le siamupini 2016.

O pine fa'amau ia o lona iloa i le ta'aloga ua toe amia ai e lana Iunivesite e toe fo'i ane i Nevada e toe saili se manumalo a le Rebels e afua i lenei tausaga. E fa'afetaia fo'i le tele o alo o le tatou nei malo, ua fa'amau fa'ailoga ai le tatou igoa i fa'agatama ua iloga ona fiafia i ai tatou talavou iinei e ta'a'alo fa'atauva ai.