Amatalia polokalama fou a le LBJ mo tina ma’itaga ma tina fou

Pago Pago - AMERIKA SAMOA

I le aso Faraile, Me 17, 2024, sa faaleoina ai e le fa’auluuluga o le Iunite mo Tina Ma’itaga (OBGYN) i le falema’i autu a le malo (LBJ), o Dr. Efren N. Yuchongco, le taua o polokalama tau a’oa’oga mo tina ma’itaga, aua le tapenapena ma le fa’aau’upegaina o tina, i le tomai ma taleni, e mafai ona talifuaitau atu ai i taimi o faigata a’o ma’itaga, fanauina ma le faafaileleina o pepe.

Ma o lea, ua fa’alauiloa mai ai e le LBJ ia se polokalama, e faapitoa mo tina ma’itaga.  O lenei polokalama, o lo’o fa’atinoina e fomai, tausimai, kuka po o latou e fuafuaina taumafa maloloina, o i latou ua iai le tomai faapitoa gaioiga e faamalosi ai tino o tina, o sui mai i le polokalama o le WIC faapea ma i latou e a’oa’oina tina i le faasusuina o a latou pepe.

Sa ta’ua e Dr. Yuchongco, o lenei polokalama fou, e faapitoa lava mo tina i le OB a le LBJ.  Ma o i latou ia o le faafoeina lenei polokalama, o le a tu’uto mo le fesoasoani ma le lagolagoina o tina, e le gata i le tausiga o le pepe fou, ae faapea foi i latou lava.

O aso Gafua ta’itasi o le a faapea ona maua ai se avanoa e asiasi atu ai i potu fanau, potu mo pepe ma potu failele.

Ma o lenei polokalama e faapitoa mo tina ma’itaga e le masani i nei tautua a le falemai.  O le a faapea ona o latou tagai ma a’oa’oina foi, i la’asaga uma, i le fanauina o pepe fou ma tautua o le a avanoa mo i latou, se’ia o’o mai lava i le taimi e tete’a ai i tua mai i le falemai.

O seisi vaega o lenei polokalama fou, e aofia ai le faapa’i atu o le tino o le pepe fou, i lona tina, i le fa’ato’a mae’a ona fanauina mai, ina ia faamalosia ai le mafana o le sootaga a le pepe ma lona tina.

O le a faapea foi ona faasusuina ai foi ma le pepe, i lona fa’ato’a fanau mai, pe afai sa fanau sa’o o ia.

O aso Lua, ua fuafuaina ai a’oa’oga mo le fa’asusuina o pepe fou.  Ma o le taua o lenei a’oa’oga, e mafai ona faamanino ai i tina le taua o le faasusuina o pepe i suasusu o le tina, aua le atina’eina o le soifua maloloina ma le saogalemu, o le pepe.

Ua nofo sauni foi le aufaigaluega a le ofisa o le WIC e galulue so’otau’au ma le vaega a le OBGYN, ina ia a’oa’oina ma u’unaia tina o le atunuu, i le taua o le fa’asusuina o le pepe i lona tina, ae le gata i lea, e fa’ailoa atu i le tina ia tautua a le WIC o lo’o avanoa mo i latou.

O le aso Tofi, o le a faia a’oa’oga mo taumafa lelei mo le tino o le tina, aua le tausiga o le pepe fou.

O lenei vaega o le polokalama fou, e taua tele mo tagata uma o le atunu’u, aua e faamamafaina ai le taua o le taumafaina o tausami e maua ai le soifua maloloina.  O le a faapea ona faamamafaina ai foi le taua o le faasusuina o pepe e o latu tina faapea ma le taua o taumafa e tausami ai le tina.

O le a faapea foi ona faia ni gaioiga faamalosi tino ma aoaoga faamalosi tino a le OBGYN, i aso Faraile mo tina ma’itaga.  O lo’o talosagaina ai foi le aua o tama i lea a’oa’oga.

O le a faapea ona faatautaia nei vasega e i latou ua mae’a a’oa’oga ma ua iai le tomai faapitoa, i gaioiga e aoga mo tina ma’itaga, ina ia mafai ona maua ai e le tina ma’itaga ia le tino malosi se’ia o’o atu lava i le taimi e tu’u’ese’esea ai ma le pepe fou.