Amata tufatufaina i le vaiaso fou Pepa Taumafa mo fanau a’oga (S-EBT)

Press Release (Malo o Amerika Samoa)--E pei ona fa’ailoa mai e le Afioga i le Kovana ia Pulaali’i Nikolao Pula ia Aperila 7, 2025, ua talia e le Ofisa o Fa’ato’aga a le Malo Tele (USDA) le Food and Nutrition Service (FNS) le talosaga a Amerika Samoa mo le fa’afoeina o le Polokalama a le S-EBT mo le 2025 ma ua fa’amanuiaina ai le tatou atunu’u i le $2.5 miliona mo taumafa paleni mo le soifua maloloina a le fanau mo le tu’uaga o le tau mafanafana i le 2025 mo fanau a’oga e 14,464 i Amerika Samoa. 

O le Polokalama o le S-EBT mo le 2025 o lo’o fa’atinoina e le ofisa o le ASNAP, ma le pa’aga a le Matagaluega o Tautua mo tagata lautele (DHSS) ma le ASDOE. 

E agava’a uma fanau a’oga mo le S-EBT ua fa’amaonia e le ASDOE, sa a’o’oga i a’oga a le Mālō po o se a’oga e lē o fa’afoeina e le Mālō (non-public/ private schools) i le tausaga a’oga 2024-2025. 

E le gata i lea ua toe fa’ataga e le USDA penefiti fa’aopoopo mo Amerika Samoa e $59 i le masina (Iuni, Iulai, Aukuso) mo le aofa’iga e $177 mo le tamaitiiti a’oga to’atasi, ma e maualuga atu i lo’o le tupe mo Sitete. 

O pepa taumafa o le S-EBT e $177 lona a’ofa’iga e tufa atu i le taimi e tasi mo fanau a’oga ta’ito’atasi ua fa’amaonia e le ASDOE. ‘Ae ua na o le mātua po o ē ua fa’atagaina e fai ma sui o le mātua (legal guardian) o lo’o tusia mai i le lisi mai i le ASDOE e mafai ona o mai e piki pepa taumafa mo le 2025 S-EBT. 

Afai e lē o fa’amaonia mai e le ASDOE o ‘oe o le primary, e tatau ona e o’o atu i le ofisa o le Student Records a le ASDOE pe e te susū atu i le a’oga a lou alo e fa’asa’o ma lolomi mai ai se pepa e fa’amaonia ai lenā fa’asa’oga ina ia mafai ona tu’uina atu pepa taumafa o le S-EBT mo lou alo ia te ‘oe. 

E fa’amanatu atu i mātua po o ē ua fa’atagaina e fai ma sui o le mātua (legal guardian), e ui ina agava’a uma fanau a’oga ua fa’amaonia mai e le ASDOE mo penefiti o le S-EBT 2025, afai e te le mana’omia e mafai ona e vala’au mai i le ofisa o le ASNAP ina ia fa’amau o le a lē pikia pepa taumafa a lou alo. 

A’o e o le a foufou mai e piki pepa taumafa mo le S-EBT 2025, fa’amolemole susū mai i le ofisa o le ASNAP i le aso ma itulā ua fa’atulagaina e tusa ma le mata’itusi muamua o le fa’ai’u o le primary po o le mātua po o ē ua fa’atagaina e fai ma sui o le mātua (legal guardian) mo le tausaga a’oga 2024-2025.  

E talosaga atu le Fa’atonu Sili ia Panisia Neueli i mātua ma e ua fa’atagaina e fai ma sui o le mātua (legal guardian), fa’amolemole fa’autagia mai le fa’asologa o mata’itusi mo le tufaina o pepa taumafa o le S-EBT ina ia fa’aitiitia ai se taimi fa’atali ma e fesoasoani mai ai i le tautua ale ‘aufaigaluega. 

E lē gata i lea, ‘ae fa’amanatu atu ina ia fa’aaogā pepa taumafa e fa’atau ai mea’ai tatau ma paleni mo le soifua maloloina ma le ola tuputupu’ae a le fanau. 

Ma e amata atu i le Aso Gafua, Iuni 16, 2025, o le a tufaina pepa taumafa a le fanau mo le S-EBT mo a’oga uma a le Mālō ma a’oga e valu (8) e lē o fa’atautaia e le Mālō (non-public/ private schools), o lo’o aofia ai:

• Fa'asao-Marist High School
• Fatuoaiga Montessori
• Iakina Adventist Academy
• Kanana Fou High School
• Marist Saint Francis
• Pacific Horizons School
• South Pacific International Christian Center School
• St. Theresa Elementary School.

E toe ono (6) a’oga e lē o fa’atautaia e le Mālō (non-public/ private schools) o lo’o galulue pea ma le ASDOE e fa’amāonia a latou fa’amaumauga. 

Ma e sau se taimi ona fa’ailoa atu I mātua o nei a’oga e ono (6) le aso e mafai ona piki ai S-EBT a latou fanau. E vave fa’ailoa atu e ala i fa’asalalauga ese’ese pe a maua mai fa’amāoniga mai i le ASDOE mo a’oga nei ona fa’amautinoa ai lea o aso e mafai ai ona piki ai pepa taumafa o le S-EBT a le fanau.

O nei a’oga o lo’o aofia ai: 

• Kanana Fou Elementary School 
• Manumalo Academy School 
• Mary the Mother Montessori 
• Peteli Academy
• Samoa Baptist Academy
• South Pacific Academy

A’oga uma a le Mālō ma a’oga e valu (8) e lē o Fa’atautaia e le Mālō (non-public/ private schools) e pei ona tusia i luga

Aso Gafua, Iuni 16, 2025 - A (11 i le taeao aga’i i le itulā e 6 i le afiafi)

Aso Lua, Iuni 17, 2025-  B, C, D, E (11 i le taeao aga’i i le itulā e 6 i le afiafi)

Aso Lulu, Iuni 18, 2025 - F (11 i le taeao aga’i i le itulā e 6 i le afiafi)

Aso Tofi, Iuni 19, 2025 Tāpunia mo le Aso Mālōlō

Aso Faraile, Iuni 20, 2025 - G, H, I, J, K (11 i le taeao aga’i i le itulā e 6 i le afiafi)

Aso Gafua, Iuni 23, 2025 - L (11 i le taeao aga’i i le itulā e 6 i le afiafi)

Aso Lua, Iuni 24, 2025 - M (11 i le taeao aga’i i le itulā e 6 i le afiafi)

Aso Lulu, Iuni 25, 2025 - N, O, P, Q, R (11 i le taeao aga’i i le itulā e 6 i le afiafi)

Aso Tofi, Iuni 26, 2025 - S (11 i le taeao aga’i i le itulā e 6 i le afiafi)

Aso Faraile, Iuni 27, 2025 - T (11 i le taeao aga’i i le itulā e 6 i le afiafi)

Aso Gafua, Iuni 30, 2025 - U, V, W, X, Y, Z (11 i le taeao aga’i i le itulā e 6 i le afiafi)

E toe fa’aaoga le fa’asologa o mata’itusi nei ia Iulai 1, 2025 seia o’o i le aso 29 o Aukuso, vaganā le fa’amamaluina o aso mālōlō.

Ua faapea ona momoli mai le agaga fa’afetai a le DHSS i e o lo’o fa’aauau ona lagolagoina la latou auaunaga.

Mo nisi fa’amatalaga, e mafai ona vala’au ia le ofisa a le ASNAP i le 633-7720, 633-7451, 633-7851, or 633-7591 mo nisi fa’amatalaga.