Amata le fa’amasinoga autu o Elijah Leasau

O le vaiaso nei lea na amata aloaia ai le fa’amasinoga autu o se ali’i o lo o tu’uaia e le malo i lona umia fa’asolitulafono o vaega o le laau fa’asaina o le mariuana, e mafua mai i se fa’alavelave na tula’i mai i le 2 tausaga talu ai.

O lo o tu’uaia e le malo le ali’i o Elijah Leasau i le moliaga mamafa e tasi o lona umia fa’asolitulafono o vaega o le laau fa’asaina o le mariuana. O lea solitulafono e mafai ona fa’asalaina ai se tasi i le toese pe afai ae fa’amaonia i le umi e le itiiti ifo i le 5 tausaga ae le sili atu i le 10 tausaga i le falepuipui, poo le fa’asala i le salatupe e le silia i le $10,000.

O le tama’ita’i loia ia Christy Dunn mai le Ofisa o le Loia Sili o loo tula’i mo le malo, ae o le ali’i loia ia Marcellus T. Uiagalelei o loo tula’i mo le ua molia, ae lagolagosua i ai le ali’i loia ia David Vargas.

E pei ona taua e le malo i le latou tagi e fa’apea, o le po o le aso 31 Tesema 2015 i Tafuna na tula’i mai ai le fa’alavelave e pei ona molia ai Leasau, i le taimi ao fa’atino ai tiute masani a Leoleo mo le vaavaaia lea o ave ta’avale e feoa’i onana i luga o le alatele i taimi o aso fiafia.

Ao faagasolo ai tiute masani a le tama’ita’i leoleo ia Latara Ah See i luga o le alatele i Iliili, sa ia molimauina ai se Suzuki lanu mumu i luma o le Cost-U-Less, o loo aga’i i le itu i sisifo o le auala ae leai ma ni moli pito i luma o ola.

O tua o le ta’avale Suzuki lanu mumu e le o ola moli o loo mulimuli atu ai se ta’avale Leoleo. O le tama’ita’i Leoleo ia Ah See o loo i totonu o ia o le isi ta’avale Leoleo o loo aga’i i le itu i sasa’e o le auala.

Na fa’aaoga e Ah See le masini fa’aleo tele leo ma valaau ai i le ta’avale Leoleo o loo mulimuli atu i tua o le Suzuki lanu mumu, e taofi le Suzuki lea ona e le o ola moli pito i luma. Na tu le ta’avale Suzuki ma iloa ai o Leasau o loo fa’afoeina le ta’avale.

O le taimi na afe ai le ta’avale a le ua molia i le vaega e paka ai ta’avale i luma o se tasi o Faleoloa i Iliili, o iina lea o loo masalomia ai e Leoleo sa ia togiina ai i fafo se afi penisini. I totonu o lea afi penisini sa mafai ona maua e Leoleo, sa maua ai i totonu se paipa, ae i totonu o le paipa o loo i ai vaega o le laau fa’asaina o le mariuana.

O ata sa mafai ona pu’eina mai le masini pu’e ata a le Faleoloa o loo faapipi’i i le pito i fafo, o loo taua ai e le malo le maua uma ai o gaioiga sa tutupu i lea po, e aofia ai ma le taimi o loo tuuaia na togi ai e Leasau le afi penisini i fafo mai le fa’amalama o lana ta’avale.

I le ulua’i folasaga a le ali’i loia ia Uiagalelei o loo tula’i mo Leasau, sa ia faailoa ai i le vaega iloilo iuga e fa’apea, tusa lava poo a ituaiga molimau e tuuina atu e le malo ina ia lagolago ai le latou tagi fa’asaga ia Leasau, o le itu taua e tatau ona matua manino, e le mafai e le malo ona tuuina atu ni mau e fa’amaonia ai le latou moliaga, sa umia fa’asolitulafono e le ua molia vaega o le laau fa’asaina o le mariuana.

O ni isi o molimau ua fuafua le malo e valaauina mo le lagolagoina o le latou tagi fa’asaga ia Leasau e aofia ai leoleo sa auai i le taimi o le fa’alavelave, faapea ai se sui mai le Ofisa e Suesueina Fualaau Faasaina a le Feterale (DEA), o ia lea sa faia le suega i mariuana na maua ma faamaonia ai, o vaega ia o le laau fa’asaina o le mariuana.

O le afioga i le Faamasino sili ia Michael Kruse o loo faafoeina taualumaga o lenei mataupu, faatasi ai ma le lagolagosua a afioga i ali’i Fa’amasino Lagolago ia Faamausili Pomele ma Tunupopo Faleafaga.