Amata ia Aukuso 28 iloiloga tu’ufa’atasi a le Fono, tupe fa’asoasoa tausaga tupe 2024

Pago Pago - AMERIKA SAMOA

O le iloiloga a le Fono Faitulafono o le paketi fuafuaina a le malo e silia i le $664 miliona mo le tausaga tupe fou 2024 - lea e amata ia Oketopa 01, 2023 - ua faatulaga i le faaiuga o le masina nei ma o le a avea ma se iloiloga soofaatasi a komiti o le Paketi a le Fono, ua faamoemoe e 8 aso. 

I tusi i le aso 07 o Aukuso, na fa’ailoa ai e ta’ita’i o le Fono fa’atasi ai ma ta’ita’ifono o komiti o le paketi a le Fono ia Kovana, Lemanu P.S Mauga e fa’apea, o le iloiloga o le paketi mo le tausaga fa’aletupe 2024 ua fa’atulaga mo Aukuso 28 e o’o atu ia Setema 07.

“Ona o le utiuti o le taimi” ua fai ai le faaiuga a komiti o paketi a le Senate ma le Maota o Sui e faia le iloiloga o le paketi i se Fono Soofaatasi ina ia faatelevave ai le iloiloga, e pei ona taua i le tusi a le Fono, lea e aofia ai le faasologa o aso mo molimau mai fa'auluuluga o matagaluega/ofisa a le ASG.

O molimau masani e muamua i iloiloga, o le Teutupe a le Malo, ia Malemo Tausaga ma le Fa’atonusili o le Ofisa o le Paketi ma Fuafuaga, Catherine D. Saelua i le paketi ua fuafuaina, o le a amatalia ai iloiloga o le paketi. O nisi o mataupu o le a aofia ai le fuafuaina o tupe maua ma le aoina o tupe ma ua faamoemoe le Fono e talosagaina nisi o lipoti tau tupe e tatau ona maua ao lei amataina le iloiloga o le paketi.

E pei ona faia i iloiloga o le paketi i tausaga ua mavae atu, o le a umi fo’i ona fesiligia le Teutupe ma le Fa’atonusili o le Ofisa o le Paketi e sui o le Fono Faitulafono, aemaise ai o tupe maua lotoifale o lo o fuafua e le malo mo le tausaga tupe fou, atoa ai ma le tulaga o lo o aoina ai tupe a le atunu’u mo le tausaga fa’aletupe 2023.

O lo'o fuafua le Faigamalo o tupe maua lotoifale e $143 miliona i le tausaga fou 2024, lea e maualuga atu nai lo le tausaga fa'aletupe 2023 e silia ma le $77.50 miliona. E tusa ma le $103.2 miliona tala o le a maua mai lafoga mo le tausaga tupe fou.

O le mae’a ai o le aotelega o molimau, o le a fesiligia ai loa Malemo ma Saelua e le komiti soofaatasi e uiga i paketi a le Matagaluega o Tupe ma le Ofisa o le Paketi.

Ua fa’atulaga fo’i i le aso 28 o Aukuso - o le aso muamua lea o le iloiloga o le paketi - o le Ofisa o le Kovana, le Ofisa o Fa’amasinoga ma le Ofisa o Mataupu Tau Samoa. Ma o iloiloga o le paketi e amata i le itula e 10 i le taeao.

Ua fa’ailoa e le Fono i le ali’i kovana, ia fa’aavanoa uma Fa’atonusili i le taimi o iloiloga o le paketi, e fesoasoani ai i le iloiloga, ma o le a le talia e le komiti soofaatasi se molimau mai se isi tagata se’i vagana ai le Fa’atonusili.

E le gata i lea, ua talosagaina e le Fono ia faatonu/CEO o le Enterprise Funds ma vaega tumaoti o le malo e saunia muamua le Faamatalaga o Tupe Maua ma Tupe Faaalu, a o lei faia le iloiloga o le paketi, ona o “o nei faamatalaga e taua tele i le faagasologa o iloiloga” o le fuafuaga tau tupe o le FY 2024. mo le tausaga fa'aletupe 2024.

E pei ona masani ai, ua talosagaina e le Fono ia molimau uma e tuuina atu molimau ina ia talafeagai ona laei e tusa ai ma laei faatulaga a le Fono Faitulafono. E tatau ona ofuina e alii se ofutino ma se fusiua ma e tatau i tamaitai ona fai se puletasi poo se ofu pisinisi talafeagai.

O lo o i ai nei le Fono Faitulafono i se malologa ma e toe tauaofia ia Aukuso 21.