Amata i tauga’upu, soso’o ma le feavea’i o lima, ae fa’ai’u i le falepuipui

Pago Pago - AMERIKA SAMOA

O le aso 9 o Me, 2025, na vala’au atu ai se tina loto mafatia i le Ofisa a Leoleo i Tafuna, e ripotia le sauaina o ia ma sona alo tamaitai, e lana uo tama.

E pei ona ta’ua i fa’amaumauga a le faamasinoga, o le susuga ia Clarence Sefuiva sa molia i le aso 9 o Me, ona o lona fa’atupu vevesi i le fale a lana uo tamaitai.

Ma sa fa’aalia i se su’esu’ega na faia, le tupu o se tauga’upu, i le va o Clarence ma lana uo tamaitai, lea na vala’au i le ofisa a leoleo, ma sauaina ai e Clarence lana uo ma le tama teine a lana uo tamaitai. 

Sa agai atu leoleo i le nofoaga na tupu ai le faalavelave ma ina ua latalata atu i le auala e tau atu i le fale, sa faapea ona fa’atu mai le taavale a leoleo, e se tamaitai, i luma o se pamu kesi.  Ma sa fa’ailoa ifo iai e le tamaitai, o ia lea na a’afia i le fa’alavelave.

Na faamatalaina e le tamaitai po o le tina na a’afia, e fo’i mai o ia ma si ana fanau mai i se latou tapenaga falesa, ua iai Clarence (po o lana uo tama) i le latou fale.  

Ma na ta’ua e le tina na a’afia, lona ulufale atu i totonu o le fale, ae o lo’o ‘e’e ma lalau mai o ia e Clarence.  Na savali atu le tina na a’afia ma saofa’i i luma o le na molia, e la te talanoa, ae u’una’i ese atu e Clarence ia le nofoa.

Sa ta’ua foi e le tina na a’afia, lona saofa’i luga o le fola o le fale, ae tamo’e atu se tasi o ona alo teine, ma tu i le va o ia ma le na molia, ma ua fai le teine i le na molia, aua le tago atu ia te ia (lona tina).  

Ona faia ai loa lea o se tauga’upu i le va o le alo a le tina lea na tamo’e atu, ma le a molia ma i’u ai ina u’u mai e le na molia, ia se nofoa uga, ae ta ai le teine (le alo o le tina na a’afia).  Ma sa tali mai e le teine le nofoa, i lona lima.

Sa ta’ua e le tina na a’afia, le uma ona ta e le na molia, o lana tama teine i le nofoa, ae ua ia (le na molia) tatu’iina lana tama teine.

Na fa’aalia i su’esu’ega a leoleo, o le fale lea na tupu ai le fa’alavelave, o le fale a le to’alua a le tina sa a’afia.  Ae ina ua tu’ua e le tamaloa ia le tina na a’afia, sa nofo ai loa le na molia.

Sa ta’ua e le tina na a’afia, e faapea, e le o se ulua’i taimi lea ua o’o atu ai lima o Clarence (le na molia) ia te ia.  Ma e faia lava i luma o lana fanau, ma o le mafua’aga lea na oso mai ai lona alo lea na a’afia foi.

Na avefaapagotaina e leoleo ia Clarence ma momoli atu o ia i le ofisa a leoleo i Tafuna ma na sosogia e leoleo le malosi o le manogi ‘ava malosi, o le na molia.

Ina ua fa’atalanoaina e leoleo ia le alo teine lea na a’afia i le fa’alavelave, sa ia ta’ua lo latou fo’i mai i le fale, i se latou tapenaga falesa, ae ona fa’alogoina le ‘e’e o Clarence (le ua molia) i lona tina, ma lalau o ia (lona tina).

Ma sa ta’ua e le alo teine a le tina na a’afia, ia lona le alo atu lava i le vevesiga a lona tina ma le na molia.  Ae peitai, ina ua u’una’i ‘ese e le na molia, ia lona tina mai luga o le nofoa, o iina na ona lagona ai lona le fiafia ma oso atu loa ia Clarence (le na molia) ma ‘e’e iai ma faatonu e ‘aua le toe tago i lona tina.

Sa ta’ua e le alo teine a le tina na a’afia, lona tu i luma o lona tina a’o ia ‘e’e atu ia Sefuiva.  Ma sa faapea ona u’u mai e le na molia ia se nofoa uga, ma ta ai o ia (alo teine) ma amata ona tatu’i o ia, a’o taumafai le alo o le tina na a’afia, e tali mai sauaga a le na molia.

Ona oso atu lea o le ‘uncle’ a le teine, e tusa ai ma lana molimau, ma u’una’i ia le na molia i le pa sima, ma mafai ai loa ona o la sosola ese ma lona tina, mai i le fale.

Sa faamatalaina foi e le alo teine a le tina na a’afia, le tupu so’o o fa’alavelave faapenei, i le sauaina e le na molia, o lona tina, i luma o latou ma ona tei laiti.

Na fa’atalanoaina foi e leoleo se alo alii a le tina na a’afia, ma na ia ta’ua  le fesiligia o latou e Clarence (le na molia) ina ua fo’i atu le latou tapenaga falesa, po o fea na o iai.  Ma amata ona ‘e’e ia le na molia, i lona tina ma tu’ua’ia lona tina i le va’aia o nisi alii, ma ia (Clarence) tago se’i le ki o le taavale mai lona tina, ae u’una’i o ia, i lalo.

Sa ta’ua foi e le alii laititi lea le oso atu o lona tuafafina ia Clarence (le na molia) ae fasi mai ai o ia e le na molia, ma na oso atu lona ‘uncle’ lea e latou te nonofo faatasi ma fesoasoani i lona tina ma lona tuafafine.

Sa lokaina Clarence i le falepuipui, e faatalitali ai lona faamasinoga.

O ona moliaga na aofia ai le moliaga o le Faatupu Vevesi i totonu o le aiga faapea ma le Fa’ao’olima i lona tulaga e tolu.

O moliaga e lua, o le faatupu vevesi, o se vaega ‘C’ i solitulafono mama, e mafai ona nofosala ai i le falepuipui, e o’o atu i aso e 15, po o se sala tupe e i le va o le $150 ma le $300, po o faasalaga uma e lua.

O moliaga o le fa’ao’olima, o ni moliaga, i le vaega ‘A’ i solitulafono mama, e mafai ona nofosala ai i le falepuipui, i le ta’i tausaga, po o se sala tupe e i le va o le $150 ma le $1,000; po o faasalaga uma e lua.

E $3,000 se vaegatupe na fa’atulagaina e mafai ona tatalaina ai le na molia, mai i le falepuipui, e faatalitali ai lona faamasinoga.