Amata faamasinoga a se alii na tuuaia i le 2022 i le gaoi ma le talepe fale

Pago Pago - AMERIKA SAMOA

O le aso ananafi na fa’ato’a tulai ai i luma o le faamasinoga se alii e suafa ia Luvaiva Perevita, talu ona lokaina i le tausaga ua mavae, ina ua ulufale faalesolitulafono i totonu o se fale i Pago Pago.

MATAUPU

Ia Novema 11, 2022, na valaau ai se tina i le ofisa a leoleo i Fagatogo, mo se fesoasoani, ina ua la toe fo’i mai ma si ona to’alua mai atunu’u i fafo, ae ua nofo se tagata i totonu o lo la fale i Pago Pago, e aunoa ma se faatanaga.

Ina ua taunuu leoleo, sa o latou talanoa ma le toalua a le tina na valaau i le ofisa a leoleo, ma sa ta’ua ai e faapea, ina ua o la toe fo’i mai mai atunu’u i fafo i le aso 3 o Novema, 2022, sa o la molimauina se mea uiga ese i lo la fale.

Sa faamatala e le fafine e ana le fale, sa tu’ufua lo la fale, ma lo la talitonuga, e leai seisi o le a alu iai i totonu.  Ae peitai, ina ua o la taunu’u mai i le la malaga mai fafo, na o la iloa ai o lo o matala le faitoto’a o le la fale.  Ma ina ua o la tatalaina le faitoto’a, sa o la vaaia ai ni mea faigaluega i luga o se laulau, ae ua leiloloa isi mea faigaluega ma nisi o meatotino mai totonu o le fale.

O mea faigaluega sa leiloloa na aofia ai se iliafi fou, o se mea pu’eata vaalele, o se moa vao, o ni lavalava, o ni se’evae ma se sefe tupe sa iai totonu se tinoitupe e $200 ma sene Amerika taua.  Ina ua o la o’o atu i totonu o le la potu moe, sa o la va’aia le paepae solo o lavalava i totonu o le potu ma le manogi leaga, e le gata i lea o le tele o le lapisi i totonu o le la potu ma le potu moe a le la tama teine.

Sa faamatala e se ‘nephew’ a le ulugalii e faapea, na o’o atu le alii o Peverita i le latou fale ma se ato ami e tumu i mea totino a le tamaloa e ana le fale.  Sa mafai ona toe faafoi e le ‘nephew’ i le ulugalii ia le ato sa iai ni mea faigaluega, lavalava ma seevae.

E tusa ai ma se faamatalaga a le ‘nephew’ sa latou nonofo faatasi ma Peverita ma sa va’aia e le ‘nephew’ le suia o le amio a lenei alii, ma ia faamaonia ai ua tagofia e Peverita ia vaega o fualaau faasaina.  O le mea lea na tulieseina ai Peverita mai le latou fale.  

Sa ta’ua foi e le ‘nephew’, o le aso lea na alu atu ai Peverita ma le ato, o le aso mulimuli foi lea na va’ai iai.

Na fa’aulu e le ulugalii se tagi e faasaga ia Peverita mo a la mea totino sa gaoia faapea ma le ulufale o lenei alii i totonu o le la fale e aunoa ma se faatanaga.

Ua molia nei Luaiva i le faomea i lona tulaga e lua, ma le gaoi, faatasi ai ma le solifanua faalesolitulafono.

Ina ua lokaina Peverita, sa maua ai foi le le toe aoga o lona ID talu mai le tausaga e 2016.  O lona to’alua lea sa fai ma ana ‘sponsor’, ua leva ona tu’ua Amerika Samoa ma e le i toe fo’i mai.

E le i ta’ua i totonu o faamaumauga a le faamasinoga le mafuaaga na umi ai ona faatali le aso o le faamasinoga a le ua molia.