AMATA FAAMANATU LE 35 TAUSAGA O LE NEIL’S ACE HOME CENTER

Ua fa’ailogaina nei le 35 tausaga o le tautua a le Neil’s Ace Home Center. O le vaitaimi tonu lenei na amatalia ai le faleoloa o totoga ma meafaigaluega e fa’aaogaina i galuega tau le eletise ma soso’o mai ai ma oloa tau palama, lea sa matua agavaa ai le ali’i Patiriaka o Neil Scratch.

I le tausaga 1984, ae ua tu’ua fo’i e le tama lana galuega sa galue mai ai i le Matagaluega o Galuega Lautele a le Malo, sa ia amata ona tautuaina so’o se tasi o aiga ma ana uo mamae ma so’o se tasi lava e sulufai atu ina ia fa’auaea o latou fale, siaki a latou mita ua fa’aletonu so’otaga o le eletise ina ne’i mu, galuega uma fa’apena, e fiafia tele o ia e alu e faia, i lona agaga alofa lava i so’o se tagata e mana’omia le fesoasoani.

Lea ua tula’i mai pea lenei Kamupani tele ma le aoga, e foa’i fo’i i so’o se mea e fa’ato’ai atu e sailia mo se leleiga o nisi o le mamalu lautele o le atunu’u, ua i ai le mana’omia.

O molimau ola lea o le soifua auauna o lenei faipisinisi lauiloa i Amerika Samoa. E ui ina e to’afitu o la’ua alo a’o se tasi e faigaluega malosi e tausi lo la’ua aiga ma si ma le tina pele ma le fanau, ae na ea lava ona o le soifua fa’amaoni i tiute ma fiafia e fa’atino ona agava’a ua fa’atamaoaigaina ai e le Atua soifua, e tausaili ai manuia mo si ona aiga.

I lenei la tausaga, ua tapena ma saunia e le ‘Neil’s Ace Home Center’ ni pa’u fa’apitoa, mo le mamalu lautele o le a fa’atau i le latou faleoloa tele o oloa eseese uma, saunia fa’apitoa mo i tatou uma se pa’u tele o tau o oloa masani.

Ua saunoa fo’i le tamaita’i o Ngaire Ho Ching, “O le Faleoloa na amata mai le fale ta’avale o le tama o Neil Scratch i Tafeta, lea ua tupu ma ua lauuluola, ua fua mai ua tele, ma ua fa’aaogaina e le to’atele e sailia ai mea uma e fa’aaoga i o latou lotoifale, ma galuega eseese e fia fa’atuina. E le mafai ona le fa’amanuia le Atua i so’o se taumafaiga e amata mai le agaga e fia tautua i le lautele, e maulalo le amataga ae maualuga le fa’amoemoe i le Atua e fa’atupu ma fa’aolaola.”