Amata fa’aitiitia itula faigaluega a le Kolisi Tu’ufa’atasi vaiaso fou

O le piriota totogi a le Kolisi Tu’ufa’atasi a Amerika Samoa o le a sosoo nei, ua fa’amoemoe e amata fa’aitiitia ai loa totogi o ana tagata faigaluega, i lalo o se fa’aiuga na pasia i le fonotaga fa’apitoa a le Komiti Fa’afoe o Aoga Maualuluga sa usuia i le vaiaso nei.

I se pepa o fa’amatalaga a le Peresetene o le Kolisi Tu’ufa’atasi ia Dr. Rosevonne M. Pato, o lo o fa’amanino mai ai aiaiga uma o le fa’aiuga e pei ona aloaia e le Komiti Fa’afoe i lana fonotaga mulimuli sa usuia i le aso 19 Aperila, e fa’atatau i sitepu o le a la’asia mo le fa’aitiitia o itula mai totogi o tagata faigaluega.

E pei ona manino i le fa’aiuga a le Komiti Fa’afoe a le Kolisi Tu’ufa’atasi, e eseese uma lava le aofa’i o itula o le a fa’aitiitia mai totogi o ana tagata faigaluega e to’a 212, fuafua lava i le maualuga o le totogi o loo maua e le tagata faigaluega.

Mo se fa’ata’ita’iga, o tagata faigaluega e to’a 49 o loo latou maua le totogi e amata atu i le $11,000 e oo atu i le $15,073 i le tausaga, e ta’i 2 itula o le a fa’aitiitia mai o latou totogi i soo se piriota totogi a le kolisi.

O tagata faigaluega e to’a 55 o loo latou maua le totogi e i le va o le $15,119 e oo atu i le $19,900 i le tausaga, o le a fa’aitiitia le ta’i 4 itula mai a latou totogi.

O tagata faigaluega e to’a 54 o loo latou maua le totogi e amata atu i le $20,167 e oo atu i le $28,995 i le tausaga, o le a fa’aitiitia le ta’i 6 itula mai a latou totogi.

O tagata faigaluega e to’a 16 o loo latou maua le totogi e amata atu i le $30,487 e oo atu i le $37,767 i le tausaga, o le a fa’aitiitia le ta’i 8 itula mai a latou totogi, ma tagata faigaluega e to’a 38 o loo latou maua le totogi e $40,000 ma luga atu i le tausaga, o le a fa’aitiitia itula tai 10 mai o latou totogi.

O lo o taua fo’i e le Kolisi Tu’ufa’atasi, e to’a 63 tagata faigaluega e le o aofia ai i latou i le suiga e pei ona fa’alauiloa.

“E ui i le a’afia ai o tagata faigaluega uma a le Kolisi Tuufaatasi i lenei suiga, o le a le avea lea ma auala e a’afia ai polokalame mo fanau aoga, e le tatau fo’i ona fa’aitiitia itula e fa’atinoina ai polokalame mo fanau aoga”, o se vaega lea o le saunoaga a le tama’ita’i peresetene.

“E talosagaina tagata faigaluega a le Kolisi Tuufaatasi ina ia tatou galulue fa’atasi mo le fa’amautuina o lenei suiga, ina ia mafai ai ona fa’aauau pea la tatou tautua mo fanau aoga a le atunu’u”.

E pei ona fa’amanino e le tama’ita’i foma’i ia Pato, o le suiga e pei ona faia na afua mai lea i le fonotaga faapitoa a le afioga i le ali’i kovana ia Lolo Matalasi Moliga ma le Kapeneta i le amataga o le masina nei, lea na fa’alauiloa ai i Faatonusili ma Fa’auluuluga o Matagaluega ma Ofisa eseese a le malo le fuafuaga ina ia fa’aitiitia itula o tagata faigaluega uma a le malo, amata mai i le aso 10 Aperila, ona o le tulaga fa’aletonu e pei ona molimauina i le tamaoaiga o le malo.

Ina ua fa’atoa fa’alauiloa e le malo lana fa’aiuga e fa’aitiitia ai itula o tagata faigaluega, sa na o Foma’i ma Faiaoga e le i aofia ai, peita’i o suiga e pei ona tu’uina mai e le malo i le amataga lava o le masina lenei, ua fa’ailoa ai le aofia ai ma i latou uma o loo galulue fa’akonekarate mo le malo, ina ia le aofia i latou i le fuafuaga e fa’aitiitia ai itula faigaluega.