Amata aloaia fa’amasinoga autu faiaoga tu’uaia ave aisa i fanau aoga

O le vaiaso nei na amata aloaia ai i luma o le Fa’amasinoga Maualuga le fa’amasinoga autu o se ali’i sa avea ma faiaoga, lea o loo tu’uaia i lona tu’uina atu lea o vaega o le pauta fa’asaina o le aisa i se tamaititi aoga.

O loo molia e le malo le susuga a Iosefa Alo i le moliaga mamafa e tasi o lona umia fa’asolitulafono o vaega o le pauta o le aisa ma le fa’amoemoe e tufatufa atu i isi tagata, o se solitulafono mamafa e mafai ona fa’asala ai se tasi i le toese mo le umi e oo atu i le 20 tausaga, pe fa’asala i le salatupe e mafai ona oo atu i le $20,000, poo le fa’asala fo’i i fa’asalaga uma ia e lua.

O le ali’i loia fautua lagolago ia Rob McNeill o loo tula’i mo Alo, ae o tama’ita’i loia sili lagolago e to’alua ia Christy Dunn ma Laura Garvey o loo fai ma sui o le malo i lenei mataupu.

O loo taofia pea Alo i le toese i Tafuna talu mai le aso na pu’e fa’apagota ai o ia e Leoleo i le tausaga na te’a nei, ina ua le mafai ona ia totogi le tupe e $20,000 sa fa’atulaga e le fa’amasinoga e tatala ai o ia i tua.

E ui na finau le loia a Alo i le taimi o lana ulua’i tula’i i luma o le Fa’amasinoga Fa’aitumalo i le tausaga na te’a nei, e fa’aitiitia le tupe e tatala ai o ia i tua i le $5,000, peita’i na teena e le afioga i le ali’i fa’amasino ia Fiti Sunia lea talosaga ae fa’atumau pea le tupe e pei ona fa’atulaga e le fa’amasinoga.

E to’a 6 sui o le vaega iloilo iuga, e aofia ai tama’ita’i e to’afa ma ali’i se to’alua na filifilia i le aso Gafua o le vaiaso nei latou te iloiloina mau fa’amaonia o lenei mataupu. Ua fa’amoemoe le malo latou te valaauina ni molimau e silia ma le to’alima, e aofia ai Leoleo Suesue e to’alua sa suesueina lenei mataupu, o le tamaitiiti na a’afia, o lona Tina, ma se sui mai le aoga maualuga a Tafuna sa aoga ai le tamaititi i le taimi na tula’i mai ai le fa’alavelave i le tausaga na te’a nei.

FA’AFINAUGA AMATA A LE MALO

E pei ona taua e le loia a le malo ia Garvey e fa’apea, i le aso 6 o Oketopa, 2017, na alu ai se tamaititi aoga ma ave se paipa tioata o loo i ai vaega o le pauta fa’asaina o le aisa i le aoga maualuga i Tafuna. Ina ua taunu’u lea tamaititi i le aoga, na alu i le isi itu o le malae ma ula ai le paipa sa ia te ia.

Sa fa’ailoa e le malo le igoa o le tamaitiiti aoga lea i totonu o le potu fa’amasino, peita’i i fa’amaumauga a le fa’amasinoga, o loo fa’aigoaina ai o ia o (C.K).

Na iloa atu e se Leoleo po a le aoga ia C.K ma le isi tamaititi aoga o loo la ulaina mai se mea e foliga o se sikaleti, o lea na aga’i atu ai loa le Leoleo po ma aumai i laua e to’alua i totonu o le Ofisa mo suesuega. O le isi tamaititi aoga sa to’alua ma C.K e pei ona taua i fa’amaumauga a le fa’amasinoga o (J.M).

Ina ua taunuu i totonu o le ofisa, sa saili ai loa e le Leoleo po le ato aoga a C.K, ma maua ai se paipa tioata o loo afifi i se mitiafu lanu mumu. I totonu o le paipa tioata o loo i ai vaega o le pauta fa’asaina o le aisa. O le taimi lea na fa’afeso’ota’i ai loa Leoleo, ma aga’i atu ai ma aveese mai C.K ma J.M ma avatu i le Ofisa o Leoleo i Tafuna mo suesuega.

E pei ona taua e le malo i le latou tagi, e eseese potu sa fa’ataunu’uina ai le fa’atalatalanoaina o C.K ma J.M. Sa i ai le Tina o C.K i le taimi na fesiligia ai o ia e Leoleo, ae o J.M, o lona tuafafine matua sa i ai i le taimi o lana fa’atalatalanoaga.

E pei ona taua e le malo i le latou tagi, o le taimi o le fa’atalatalanoaga lea na fa’ailoa ai loa e C.K i Leoleo e fa’apea, i le aso 4 o Oketopa, sa la ulaulla ai ma Alo i fafo o le fale o Alo i Lauli’i. O le pauta o le aisa sa la ulaina.

I le taeao na sosoo ai, na taua e C.K lona alu atu i le aoga i le aso lea, ae tu’u atu e J.M sikaleti mariuana e 3 ia te ia. Ina ua tuua le aoga, sa ia vaelua afa le isi sikaleti mariuana, ona ia fa’atauina atu lea o le isi afa i le isi ana uo, ae o le isi afa sa latou ulaina ma isi ana uo. O sikaleti mariuana e 2 sa totoe sa ia tuuina atu ia Alo.

I le aso 6 o Oketopa, na taua e C.K le tuu atu e Alo o le paipa o loo i ai le aisa i totonu, ma fai atu ia te ia e alu e fa’atau i le $30, ae a maua mai ai fo’i ni sikaleti mariuana ua lelei fo’i.

Na taua e C.K i Leoleo e fa’apea, i le aso lava lea, sa la fetaui ai ma J.M i le aoga, ona la o lea i tua o le fale’ai a le aoga ma ula ai le paipa. Na maua i laua e le Leoleo po a le aoga ma ave ai loa i laua i totonu o le ofisa.

TALI A LE ITU TETE’E

Na amata lava le ulua’i folasaga a McNeill i lona fa’afetaia lea o le avanoa ua mafai ai ona avea o ia ma loia a Alo. Sa ia taua e fa’apea, e tasi lava le mataupu o loo finauina i le tagi a le malo fa’asaga ia Alo, o le fia maua lea o le tagata sa ia tuuina atu le aisa ia C.K.

“E le i tuuina e Alo se paipa ia C.K”, o le fa’afinauga lea a McNeill. “E leai ma se isi na vaai o tuu atu e Alo le paipa ia C.K. E leai fo’i ni molimau a le malo e fa’amaonia mai ai sa faia e Alo lea solitulafono.”

Na taua e McNeill i le vaega iloilo iuga e fa’apea, o mau faamaonia uma o le a tuuina atu e le malo i le taimi o lenei fa’amasinoga, e leai ma se mau e lagolagoina ai le latou tagi. Na pau le galuega a le malo o le a faia, o le fa’alagolago lea i le fa’amatalaga a le tamaititi aoga e to’atasi, o C.K lea e mafai ai ona faamaonia le latou tagi fa’asaga ia Alo.

Na finau McNeill e fa’apea, o Alo, o se ali’i e fa’amaoni toe loto alofa, na te le faia fo’i ni gaioiga e lamatia ai le saogalemu o fanau laiti. Sa ia talosagaina le vaega iloilo iuga ina ia fa’afofoga ma le toto’a i mau uma o le a folasia e le malo, ona latou iloilo fa’alelei lea ina ia mafai ai ona latou maua le fa’aiuga, e le nofosala Alo i le mataupu e pei ona tu’uaia ai o ia e le malo.

O le itula e 9:00 i le taeao nei lea ua fa’amoemoe e toe fa’aauau ai lenei mataupu.

O le afioga i le ali’i Fa’amasino sili ia Michael Kruse o loo fa’afofogaina lenei mataupu, fa’atasi ai ma le lagolagosua a afioga i Fa’amasino Lagolago ia Satele Lili’o Satele ma Muasau T. Tofili.