Alu se alii e ta’u i leoleo lona gaoia o se faleoloa ina ua fa’alogo o lo’o su’e o ia e le ‘aumaga

Pago Pago - AMERIKA SAMOA

O le aso 16 o Fepuari, 2025, na o’o atu ai le susuga ia Lipena Patoloaita, i le ofisa a leoleo i Tafuna ma fa’ailoa atu i leoleo, o ia lea na gaoia le faleoloa a le J&M i Iliili, i le aso 15 o Fepuari, e pei ona ta’ua i fa’amaumauga a le faamasinoga.

Sa mauaina le ata a Patoloaita i luga o le ata vitio a le faleoloa, ma e silia ma le $1,000 le tau o oloa na masalomia lona gaoia.

I su’esu’ega a leoleo na fa’ailoa ai le oso mai o Patoloaita mai i tua o le fale, i se faitoto’a sa i le itu tauagavale o le faitoto’a lea e masani ona fa’aaoga e le faleoloa.  O le faitotoa lea e mafai ona oso atu ai i le fale ta lavalava a lea pisinisi.

Ma o lo’o talitonuina le fa’aaogaina e Patoloaita o se samala, e tatala ai faitoto’a o le faleoloa.  Ma na fa’aalia foi le gaoia e le na molia ia se vaegatupe e $1,235 mai totonu o le masini teu tupe a le faleoloa, ma se katuni sikaleti.

Ina ua taunu’u leoleo sa fa’apea ona talatalanoa ma le faatauoloa lea sa ia faamatalaina e faapea, na usu atu e tatala le faleoloa i le 6:00 o lea taeao, ma ia va’aia ai le faaleagaina o le faitoto’a i autafa o le faleoloa.  Ma ina ua ulufale atu i totonu o le faleoloa, sa ia va’aia ai le matala mai o le masini teu tupe ae ua leai se tupe o i totonu.

O lea na ia vala’au ai i lona to’alua ma faailoa iaia le gaoia o le faleoloa.

Ae ina ua matamata le fa’atauoloa i ata vitio o le faleoloa, sa fa’aalia ai le osofaia o le latou faleoloa, i le 5:21 o lea taeao ma na aga’i sa’o lava le gaoi i le masini o lo’o teuina ai tupe ma ave le tupe, faapea ma se katuni sikareti sa i lalo o le laulau e iai le masini teu tupe.

Sa ta’ua foi e le fa’atauoloa, lo la o ma lona to’alua e siaki uma fafo o le faleoloa ma maua atu ai le faitoto’a o le fale ta lavalava, ua faaleagaina ma o iina na o la valaau ai loa i le ofisa a leoleo.

Na fiu leoleo e fa’afeso’ota’i ia Patoloaita ae e le’i maua.

Ae peitai, o le po o Fepuari 16 na alu atu ai Patoloaita i le ofisa a leoleo, ma fa’ailoa atu i sui malu o le malo, o ia lea na gaoia le faleoloa, o lo’o su’esu’eina.  Sa ta’ua e Patoloaita, ua mafua ona alu atu lava o ia i le ofisa a leoleo, ona ua fa’alogo, o lo’o saili o ia e le latou ‘aumaga.

Ina ua fa’atalanoaina e leoleo ia le na molia, sa ia faamatalaina e faapea, o le 5:00 i le taeao o le aso 15 o Fepuari, na alu ai i le nofonofo i autafa o ni koneteina i le faleoloa ma va’ava’ai po o iai ni tagata feoa’i, ae na te le’i osofa’ia le faleoloa.

Ma na ia talepeina muamua le faitoto’a i autafa o le fale ta lavalava, i se samala ona ia alu atu lea i le faitoto’a lea e i totonu o le fale ta lavalava, lea e tau atu i faleoloa, ma ia talepeina foi lena faitotoa.

Ma sa ia fa’asasa’o loa i le masini teu tupe ma la’u ia ta’aiga tupe, ta’i $20, $10 ma ta’i $5 faapea ma se katuni sikaleti sa i lalo o le laulau.

Sa ta’ua foi e le na molia i lana molimau, o lenei osofaiga sa fuafuaina e ia ma seisi tagata.  Ma ina ua ia tu’ua le faleoloa, sa ia alu loa i Vaitogi e faatalitali ai lana paga, lea sa ia ta’ua lona igoa, o Povi, faapea ma sona tei (nephew).  Ma na ia teuina mo ia le $300 ma pepa sikaleti e tolu, ae ona tu’uina ia Povi ia leisi vaega uma o le tupe ma isi pepa sikaleti.

O le afiafi lava lea na lokaina ai Patoloaita i le to’ese i Tafuna, e faatalitali ai lona faamasinoga.  Ae liliu sui malu o le malo, e tau saili Povi ma leisi alii o lo’o a’afia i lenei mataupu.  Ae sa le’i faamanuiaina a latou taumafaiga.

O moliaga na faia faasaga ia Patoloaita, na aofia ai le Faomea i lona tulaga e lua, o le solivale o fanua ma maota, o le taupulepule e faia le Gaoi, o le moliaga o le Gaoi faapea ma le moliaga o le Faaleagaina o ni meatotino, i lona tulaga e tolu.

O le moliaga o le Faomea, o se vaega ‘B’ i solitulafono mamafa, e mafai ona nofosala i le va o le lima ma le 15 tausaga, i le falepuipui.

O le moliaga o le solivale o fanua ma maota faapea ma le moliaga o le faaleagaina o meatotino, o ni vaega ‘B’ i solitulafono mama, e mafai ona nofosala ai i le falepuipui i le o’o atu i masina e ono, i le moliaga e tasi; po o se sala tupe e ta’i $500; po o faasalaga uma e lua.

O le moliaga o le taupulepule e gaoi, o se vaega ‘D’ i solitulafono mamafa, e mafai ona fa’afalepuipui ai i le le silia ma le lima tausaga, po o se sala tupe, e le silia ma le $5,000; po o faasalaga uma e lua.

O le moliaga o le Gaoi, o se vaega ‘C’ i solitulafono mamafa.  E mafai ona nofosala ai i le falepuipui i le le silia ma le fitu tausaga, po o se sala tupe i le va o le $7,000 ma le $20,000; po o faasalaga uma e lua.

Ae o le moliaga o le faaleagaina o mea totino, o se vaega ‘B’ i solitulafono mama, e mafai ona nofosala ai i le falepuipui, i le o’o atu i le ono masina, po o se sala tupe e $500; po o faasalaga uma e lua.

E $20,000 se vaegatupe na faatulagaina e mafai ona tatalaina ai le na molia, e faatalitali ai lona faamasinoga.