ALOAIA TAUTUA A SE FITAFITA SA TAUTUA I KOREA I SAUTE

Ua aloaia nei e le fa’auluuluga a le US Army le tautua a se tasi o Toa o Samoa ia SPC Bishop, Tony mo le 9 masina sa tautua ai i totonu o Camp Casey i Korea i Saute, e pei ona ia fa’ailoa i se fa’atalatalanoaga ma le Samoa News a o feagai ai ma malologa i le taimi nei.

Sa ia taua atili i le Samoa News le taua tele o le taimi sa ia tautua ai i totonu o lea nofoaga. “E le faigofie tulaga o le saogalemu i soifua o fitafita Amerika o lo o tautua ai i lea itu o le lalolagi. E tusa ma le to’a 30 alo o Samoa o lo o i ai i lea nofoaga, lea e aofia ai fitafita ta’ito’atasi ma fitafita ua fai aiga ma fanau. E leai se taimi e tatau ai ona e fa’amatala i le fa’atinoina o ou tiute, e ui fo’i i le tulaga faigata o koleniga, ae sa maua pea le fa’amalosi e finau mo le galuega”.

O lenei ali’i fitafita sa galuega i le vaega latou te sapalaiina vaega eseese e moomia e le Army. O le aso 20 Ianuari 2015 na ulufale ai lenei alo o le atunu’u i le Army, ina ua mae’a ona fa’au’u mai i le aoga maualuga a Fagaitua i le 2012, sosoo ai ma tausaga e 2 na aoga ma fa’au’u mai ai i le Kolisi Tuufaatasi i le 2014, ma ulufale atu ai i Korea i Saute ia Oketope 2, 2016, ma fa’amae’aina ai ona tiute i le aso 23 Iuni 2017.

"I lenei olaga pisi ma le faigata ona mautinoa o lou saogalemu mai le isi itu taua, ma mea fo'i e ono tutupu mai, a maua loa se avanoa, sau loa e toe mafutaga ma nai matua ma aiga.O se fa'anauauga sili, o le aoga mo i la'ua a'o maua le malosi ma le taimi e fa'atino ai se tausiga."

Ua ia talosagaina le atunu’u ina ia nonofo tatalo mo Toa o Samoa uma o lo o tautua ai i le tafa o taua. O SPC Bishop o se alo e fa'asino ia Fulu Bishop o Aunuu ma Fasitoouta, ma le tina o Vi'iga Lemafa Bishop o Aunuu ma Alofau.