Aloaia Peresetene Amerika fesoasoani tetele mo Amerika Samoa

O le vaiaso na te’a nei na fa’alauiloa aloaia mai ai e le Peresetene o Amerika ia Donald Trump, le talia aloaia lea o le talosaga a Amerika Samoa i tulaga sa fa’aleagaina i le ‘afa o Gita, ma aloaia ai loa fesoasoani tetele e tatau ma onomea mo le teritori ma ona tagata.

I se pepa o fa’amatalaga sa tuuina mai e le Ofisa o Fesoasoani a le Feterale (FEMA), fa’apea ma le Fale Pa’epa’e (White House), ua faalauiloa aloaia mai ai le fa’aiuga ua sainia e le ali’i Peresetene o Amerika, e tusa ai o tulaga pagatia na aafia ona tagata ma ana meatotino i le ‘afa o Gita na afaina ai le teritori mai le aso 7 - 12 o Fepuari 2018.

I le talia aloaia ai e Trump o le ripoti sa tuuina atu e le afioga i le ali’i Kovana ia Lolo Matalasi Moliga mo faamaumauga o meatotino sa faaleagaina, atoa ai ma tagata ta’ito’atasai ua leai ni fale e nonofo ai, ua faalauiloa mai ai loa e le ali’i Peresetene le sauni o le FEMA e tuuina mai fesoasoani talafeagai mo Amerika Samoa.

O ia fesoasoani talafeagai e aofia ai vaega tupe mo tagata ua pagatia atoa ai ma le toe fa’aleleia o a latou meatotino e aofia ai maota ma laoa, atoa ai fo’i ma isi polokalame e pei o nonogatupe laiti e fesoasoani ai i le toe fausia o meatotino e le o inisiua.

O nei fesoasoani uma o le a agava’a ai tagata ta’ito’atasi, o faalapotopotoga tumaoti, faapea ai pisinisi na aafia i lenei fa’alavelave.

O le ali’i ofisa sinia ia Benigno Bern Ruiz lea ua fa’alauiloa mai, o ia lea o le sui a le Feterale e fesootai ma Amerika Samoa i tulaga uma e pei ona moomia le toe faaleleia, atoa ai ma fesoasoani talafeagai.

Na taua e Ruiz le i ai lea o isi asiasiga mulimuli nei e moomia le toe fa’atinoina i nofoaga uma sa pagatia ma afaina, ina ia fesoasoani ai i faamaumauga mo mea sa faaleagaina.

O se aso o i luma e fa’alauiloa ai e le FEMA nofoaga e lesitala ai tagata ma pisinisi mo feasoasoani a le fetarale.

E pei ona fa’alauiloa e le afioga i le Lutena Kovana ia Lemanu Sialega Palepoi Mauga i le vaiaso na te’a nei, o le a fa’agasolo le asiasiga lona lua i afioaga uma ma aiga sa pagatia i le ‘afa o  Gita, ina ia mautinoa e aofia uma aiga na pagatia i le lisi o i latou e talafeagai i ai fesoasoani.

Ua fautuaina fo’i e Lemanu afioaga uma o lo o pagatia ina ia galulue fa’atasi ma ali’i mautofi atoa ai ma Pulenu’u, mo le faia o fa’amaumauga i meatotino sa fa’aleagaina.

O aiga uma na fa’amanuiaina i fesoasoani a le Koluse Mumu i le vaiaso na te’a nei, o i latou ia sa ave i ai le fa’amuamua i fesoasoani e pei o faleie mai le FEMA, atoa ai ma isi fesoasoani e oo foi i fesoasoani tau tupe, ina ua faamaonia le faaleagaina o latou maota ma laoa.

O le asiasiga lona lua e pei ona amata i le vaiaso na te’a nei, o le a aofia uma ai lava aiga o le atunu’u sa a’afia i lenei fa’alavelave.