Aloaia malo tautua Fitafita tuai o le taua e ala i se sauniga lotu

O se sauniga lotu sa fa’ataunu’uina i le aso Faraile o le vaiaso na te’a nei, i le nofoaga autu o lo o i ai le ma’a fa’amanatu a Fitafita o le taua i Tafuna, na mafai ai ona fa’aleo e ta’ita’i o le malo ma le atunu’u le agaga o le fa’afetai, e tusa ai o le tautua sa mafai ona ofo atu e Fitafita uma o le atunu’u mo tagatanu’u uma o Amerika Samoa fa’apea le lalolagi atoa.

Na fa’atumulia lea nofoaga i ta’ita’i o le malo, ta’ita’i o le atunu’u, aemaise ai le to’atele o Fitafita tuai ma o latou aiga na maua le avanoa e lolofi atu ai e molimauina lenei sauniga taua, e fa’amanatuina ai le tautua sa mafai ona ofoina atu e Fitafita tuai i le taimi a o tautua i vaega ‘au a le malo tele o Amerika.

O le afioga i le ali’i kovana ia Lolo Matalasi Moliga ma le faletua ia Cynthia, fa’apea ai fo’i le lutena kovana ia Lemanu Peleti Mauga ma sui o le Kapeneta, o i latou ia sa fai ma sui o le malo i lenei sauniga fa’apitoa.

Sa fa’apea fo’i ona auai le Failautusi o le Ofisa o Mataupu Tau Samoa, afioga i le Maoputasi ia Mauga Tasi Asuega e fai ma sui o le faigamalo fa’alotoifale, aemaise ai le faipule toe filifilia mo le laumua i Uosigitone, tofa Aumua Amata, atoa ai ma sui o le Fono Faitulafono a le atunu’u, e pei ona auai le sui peresetene o le Senate, afioga i le ali’i senatoa ia Nuanuaolefeaiga S. Nua.

O le susuga Rev. Liu Tofili mai le Ekalesia EFKAS i Fagamalo, o ia fo’i o se totino o le vaega o Fitafita tuai na ta’ita’ia le sauniga lotu e amata ai le polokalame a le malo, ma viiga o le Atua na lagiina lea e le aufai pese mai le Ekalesia EFKAS mai le afioaga i Leone.

Na fa’amamafa e le susuga Rev. Tofili le taua o le tautua ma le taulaga na mafai ona ofo atu e fitafita o le taua, lea ua mafua ai ona maua e le lalolagi atoa ai ma Amerika Samoa le saolotoga e fa’atinoina ai soo se mea.

E pei ona ia taua i se tasi o vaega o lana folasaga e fa’apea, e le o le Tusitala na mafua ai ona maua le saolotoga e fa’aleo ai manatu, ae o le tautua a le fitafita o le taua, e le o le Loia na mafua ai ona maua le aia tatau mo le fa’atinoina o le fa’amasinoga amiotonu, ae o le tautua a le fitafita o le taua, e fa’apena fo’i i le saolotoga e tapuaiga, na mafua ona maua e tagata uma ona o le tautua a le fitafita o le taua.

O le mae’a ai o le sauniga lotu puupuu, na sosoo ai loa ma le sisiina a’e o le tagavai a le malo tele o Amerrika, fa’apea ai le tagavai a le malo o Amerika Samoa, aemaise ai tagavai o Vaega ‘au ta’itasi a le malo tele, lea sa fa’atinoina uma e sui o le JROTC a le Kolisi Tu’ufa’atasi a Amerika Samoa.

O le saunoaga autu o le aso na saunoa i ai le afioga i le ali’i kovana ia Lolo, lea na ia saunoa ai e fa’ataua le tautua sa mafai ona ofoina mai e Fitafita tuai o le taua, atoa ai ma i latou o lo o tautua pea e o o mai i le taimi nei.

Na taua e le ali’i kovana le taua o le tautua sa ofoina atu e Fitafita o le taua, i latou sa asaina mai le fita o le fa’amoemoe, e ala i le ofoina atu o latou soifua ina ia maua ai e le lalolagi atoa fa’apea ai Amerika Samoa le saolotoga fiafia, lea ua mafua ai ona ola fiafia ma saoloto le atunu’u i le taimi nei.

“O se aso taua lenei ma tulaga ese i le tala fa’asolopito o le lalolagi ma Amerika Samoa, ina ua mafai e Tama, Tina fa’apea ai alo ma fanau a le atunu’u ona sopo mai lo latou soifua ma tatou mafuta ai i lenei aso, i le tuana’i ai lea o aso ma tausaga e tele sa tautua ai i le tafa o taua, i nofoaga e le maua ai le ola saogalemu”, o se vaega lea o le saunoaga a le afioga i le ali’i kovana.

Na taua e Lolo le fai o ia ma sui o le atunu’u atoa fa’apea le malo e fa’afetaia ai le sao taua a Fitafita tuai o le taua ua mafai ona malolo mai aiga, faapea ai Fitafita o lo o fa’aauau pea la latou tautua i soo se tafa o taua i le taimi nei, ona o le tautua toto ma le taulaga o lo o latou ofoina atu pea e fai ai i latou ma sui o Amerika Samoa i totonu o vaega ‘au a le malo tele o Amerika.

“E to o matou pulou ma latou fa’alo atu i le maualuga o la outou fa’aeaea, aemaise ai o la outou fa’asoa i le soifua ma le ola, lea ua mafai ai ona maua e Amerika Samoa i matua ma fanau, fa’apea ai ta’ita’i ma le atunu’u atoa le saolotoga ona o la outou tautua matavela, matou te fa’apea atu, fa’afetai, fa’afetai tele lava”, o le saunoaga lea a le ali’i kovana.

E le gata i le fa’afetaia e le atunu’u atoa o le tautua toto sa mafai ona ofoina atu e Tama, Tina fa’apea ai fanau sa tautua i vaega ‘au a le malo tele, ae na taua fo’i e le ali’i kovana ia Lolo i lana saunoaga le fa’afetaia e le atunu’u o mea lelei ua mafai ona maua mai ai e ala i le latou tautua, e pei o le tamaoaiga aemaise ai o le tomai ua mafai ona latou fa’asoa mai.

“Fa’afetai i le tautua a Fitafita tuai o le taua, lea ua mafai ona toe fo’i mai i le atunu’u ma tatou galulue fa’atasi i soo se auala, ua afai ai ona fa’asoa mai lo latou tomai sa maua i le taimi o le latou tautua, lea ua fa’amanuiaina ai le atunu’u atoa”, o se vaega lea o le saunoaga a le ali’i kovana.

A o le i fa’ai’uina le sauniga lotu, na valaauina e le susuga Rev. Tofili le aofia ina ia auai i le tula’i fa’aaloalo, e manatua ai soifua o fitafita uma sa tautua i le taua ua le mafai ona latou aulia mai lenei aso taua.