Aafia se Tama i tu’uaiga o le faaoolima ma le umia o fualaau faasaina

Pago Pago, AMERIKA SAMOA

E lua ni moliaga ua faaulu e le malo e faasaga I se alii mai Vaitogi, ina ua maua e Leoleo I lona tino ni vaega o fualaau faasaina o le Aisa ma le Mariuana.  O le masina ua tuana’I na loka ai e leoleo lenei alii, I tuuaiga I lona faaoolima I lona to’alua ma seisi alii na masalomia o lo’o faia se la faigauo faalilolilo ma lona to’alua. 

O le masina lava foi na tea nei na tula’i ai le ua molia i luma o le Faamasinoga Faaitumalo mo lana ulua’i iloiloga. 

Ua molia nei o ia i le faaoolima i le tulaga lua, faapea ai ma le moliaga mama e tasi o le faaoolima i le tulaga tolu e aofia ai sauaga i totonu o aiga.

I le tagi lona 2, ua tu’uaia ai lenei alii i le moliaga e tasi o lona umia faasolitulafono o vaega o le pauta faasaina o le aisa, tasi le moliaga o lona umia faasolitulafono o vaega o le laau faasaina o le mariuana, o ni solitulafono mamafa e mafai ona faasala ai se tasi i le toese mo le umi e oo atu i le 10 tausaga, pe faasala foi i le sallatupe e le silia i le $20,000, poo le faasala foi i faasalaga uma ia e 2.

E $15,000 lea faatulaga e le Faamasinoga e tatala ai le ua molia i tua. Afai ae tatala o iai tua, e le mafai ona ia toe faafesootaia le alii na aafia, poo lona to’alua fo’i, a ia saili se isi nofoaga e faamautu ai a o faagasolo ai taualumaga o lana mataupu.

TU’UAIGA I LE SAUAINA O LONA TO’ALUA

E pei ona taua e le malo i le latou tagi e fa’apea, i le masina na te’a nei, na agai atu ai se alii e 40 tausaga le matua i le Ofisa o Leoleo i Tafuna ma faila sana tagi faasaga i le ua molia.

Na taua e le alii na aafia i Leoleo e fa’apea, A o la momoe ma le to’alua o le ua molia, i totonu o lona fale, na faateia o ia ina ua talepe e se tagata le faitoto’a o lona fale, ma ulufale faamalosi atu le ua molia,  ma titina le ua o le fafine o lo o moe i ona tafatafa (o le to’alua lea o le alii ua molia).

Na taua e le alii na aafia lona oso faafuase’i i luga i lona te’i tele, ae fetaui lava ma le pasasa o le tu’i a le ua molia i lona auvae ma palasi ai i lalo. Na tago atu le ua molia i le fasi paipa u’amea sa uu i lona lima ma sasa ai lona ulu, toe sasa ai lona papatua ma lona tauau. 

O le malolosi o ta a le ua molia na mafua ai ona manu’a tuga le ulu o le alii na aafia, atoa ai ma lona tuli lima na gau le ponaivi, ma mana’omia ai le auina atu o le alii na aafia i le falema’i mo togafitiga.

Ina ua maea ona talanoa Leoleo ma le alii na aafia i le Ofisa o Leoleo i Tafuna, na aga’I atu ai loa Leoleo i le fale a le ua molia, ma lona to’alua, mo le faatalatalanoaina o lenei mataupu. 

A o talanoa Leoleo ma le alii na aafia, i luma o lona fale, na faafuasei ona maua e Leoleo se uaealesi mai le leitio a le Taavale Leoleo, e faatatau i se tamaloa o lo o fasi lona toalua i se vaega o le nu’u lava lea e tasi.

Na agai atu Leoleo i le isi pito nuu ma iloa ai, o le fale o le alii ua molia lea na alu atu ai le telefoni, ona o le taimi na fasi ai e le ua molia lona to’alua. Na fesili Leoleo i le alii ua molia pe na te iloa le faalavelave lea na tula’i mai i le taeao po o le aso lava lea, ina ua ia faaoolima i le alii na momoe ma lona to’alua, na tali le ua molia, o lea lava.

A o talanoa Leoleo ma le ua molia, na vaaia e Leoleo manu’a i foliga o lona to’alua. O le taimi lea na loka ai loa e Leoleo lima o le ua molia ae auina atu i le Ofisa o Leoleo i Tafuna mo isi suesuega, ae auina atu le fafine i le falema’i mo togafitiga i ona manu’a.

Na taua e le fafine na aafia i Leoleo e fa’apea, i le afiafi na sosoo ma le taeao na tula’i mai ai le faalavelave, na alu ai e piki mai lona ofu sa galo i le fale a le na aafia. Na umi se taimi o talanoa ma le na aafia ma i’u ai lava i lona moe ai i le fale o le alii na aafia. Na ta’utino atili le fafine na aafia, e ui o le alii ua molia o lona to’alua faaipoipo lea, peita’i ua 4 masina talu ona amata le la faigauo ma le alii na aafia.

A o la momoe i luga o le moega i totonu o le fale a le ua molia, na faateia le fafine ina ua ulufale faamalosi atu lona to’alua i totonu o le fale ma titina lona ua ma toso mai o ia i fafo ma le fale. Na sosoo ma le aapa atu o lona to’alua ma faaoolima i le alii na aafia e ala i lona sasa o lona ulu ma lona tino i le u’amea na alu atu ma ia.

Na taua atili e le fafine na aafia i Leoleo, e le o se taimi muamua lea ua fasi ai e lona to’alua o ia, ma ua amata fo’i ona fefe i lona saogalemu, ona o le tele o taimi e fasi ai o ia, e matua tigaina lava manu’a i lona tino, peita’i, na te le i failaina lava se ripoti i Leoleo i le tele o faalavelave ua tuana’i atu, ona o lona fefe ina ne’i fasioti e lona to’alua o ia.

Sa i ai se tamatiiti e talavou i lalo o le tulafono na o ma le ua molia i le sailiga o lona to’alua. Na taua e le alii talavou lea i Leoleo lona vaaia o le ua molia ua tago i le fasi u’amea ma sasa ai le ulu ma le tino o le alii na aafia, atoa ai ma lona vaaia o le taimi na ula ai e le ua molia le paipa o lo o i ai pauta o le aisa i tua o lona fale, ao lei oo i le taimi na la o ai e saili mai lona to’alua.

TAGI FAASAGA I FUALAAU FAASAINA

A o le i auina atu le ua molia i le Ofisa o Leoleo i Tafuna mo suesuega, na saili e Leoleo lona tino mo ni fualaau faasaina ma a’upega mata’utia, ma maua ai se paipa tioata o lo o i ai vaega o le pauta faasaina o le aisa. Na toe saili e Leoleo le taga taumatau ma maua ai se pepa iila o lo o i ai sikaleti mariuana e 3 ua uma ona taai. 

Ina ua fesiligia e Leoleo le ua molia i fualaau faasaina sa maua ia te ia, na ia taua ai e fa’apea, o fualaau faasaina sa ia faatauina mai i lana uo mai Iliili, ona o lona manatu e ula muamua fualaau faasaina ona alu ai loa lea e saili mai lona to’alua.

Na taua atili e le ua molia e faapea, sa i ai lava lona manatu maualuga, a alu atu lava ua oti ai lona to’alua ma lana ta’a i se faalavelave e tula’i mai ai, o le taunuuga lava lea o lona mafaufau. 

Ae ina ua taunuu i totonu o le fale ma ia faaoolima i lona to’alua ma le alii na la momoe, sa toe suia atoa ona mafaufauga ma ia manatu ai, e le tatau ona ia faia lea ituaiga solitulafono mamafa.

Na faatoese le alii ua molia i Leoleo e tusa ai o lana solitulafono ma mea leaga uma ua tutupu talu ai lona faatamala. O lana faamatalaga i Leoleo, ua mafua ona ia faia nei solitulafono o lona le fiafia lea i uiga o loo fa’aali atu e lona to’alua ia te ia.

SOLITULAFONO MUAMUA

I le 2015 ma le 2017, na ta’usala ai e le Fa’amasinoga Faaitumalo le ali’i ua molia i moliaga mama o le faaoolima i le tulaga tolu atoa ai ma le tu fua i le fanua ma le fale o le isi tagata. O le mataupu muamua i le 2015, na nofovaavaaia ai le ua molia mo le 6 masina, ae o le mataupu lona 2 i le 2017, na nofovaavaaia ai le ua molia mo le 12 masina.