Aa'ao foa'i i le galuega toe fa'aleleia o le Malumalu - "Ua Taunu'u"

I le sauniga o le Fa'apaiaga o le malumalu tele "Ua Taunu'u" i le Lotoa a le Ekaelsia Fa'apotopotoga Kerisiano I Amerika Samoa i le aso Faraile ua te'a, Ianuari 18, 2019, na fa'amauina ai fo'i ma le tele o meaalofa tupito i le Malumalu ua tutula'i ma ua fa'apa'iaina i lea aso.

Mo le Malumalu i lona Tusi Pa'ia ma le Pese o Vi'iga o le Atua ua faimeaalofa atu ai le susuga le Taitaifono EFKAS Fa'aeteete Saifoloi FT.

O le Fata Faitaulaga po'o le Pulela'a mo le Malumalu tele ua foa'ia fa'apitoa mai e le susuga le Faife'au Toeaina Samoa Malolo - Eveni Mamoe.

O le Moli Tele mo le Pulela'a i totonu o le Malumalu, ua foa'ia mai e le susuga le Teutupe o le Ekalesia, Tiakono Fiasili Puni Haleck.

O le meaalofa tupe na taua'aoina e le UCC Pension Board a le Ekalesia ma le susuga le ali'i o lo'o tula'i e nafa ma lea fo'i aseta a le EFKAS Mr Brian Bodager, CEO e $10,000.

O le meaalofa tupe na taua'ao mai e le Nanakuli First Samoan Church i Hawaii [LMS] e $5,000.

O le meaalofa na taua'ao mai e le UCC Hawaii Conference lea e galulue ai Rev. Gabrielle Chavez ma Conference Minister e $1,000.

O le meaalofa tupe na taua'aoina mai e John ma Marlene Fotuaika e $1,000.

O le Meaaofa na taua'aoina mo le galuega o lenei malumalu e le Mafutaga Aoaoa Tiakono EFKAS ua toina mai ai le $150,000.

O le meaalofa tupe ua taua'aoina mai e le Mafutaga a Tina EFKAS e $50,000.

O meaalofa uma na taua'aoina i teutusi mai sui na auai mai mo le fa'aulufalega ua tu'ufa'atasia ma ua maua mai ai se aotelega le tumau, ona e le'i fa'amaonia mai e le Teutupe ua malaga i le taimi nei, ua latalata i le $50,000. Fa'afetai le foa'i ma le agaga fo'i i lea galuega tele.

Ua le gata i lea ae ua fa'ao'o mai le fa'afetai mai le Komiti o lenei galuega tele i le Matuaofaiva ma le Aufaigaluega a le Paramount Builders ma ona taiulu. Fa'apea fo'i le vasega o pisinisi sa maua ai se fesoasoani i le taimi a'o taumafai le galuega ina ia mae'a ma tula'i mai o se galuega matagofie e pei ona i ai nei: Kamupani Vali a le Quality Painting; Toolshop; K&K, All Star Signs; Asifoa & Sons; ASPA, Public Works; Aluminium Designs; Sauvarin Stained Glass; Imperial Woodworks ma le Craft Metal Products mai Indiapolis, IN.