6 DUI, leai ni esikegi & laveaga o ta'avale i le Vaitau Fiafia

O lenei vaitau fiafia o le tausaga i Amerika Samoa, ua matua fa'ailoa ai le agaga fa'afetai o le afioga le Komesina o Leoleo Le'i Sonny Thompson ma lana taupulega ae maise o le aufaigaluega a le Matagaluega o Puipuiga o le Saogalemu Lautele, aua o se galuega ua galulue fa'atasi ai le aotelega o le atunu'u ma lea matagaluega, ua to'afilemu lava le teritori, se'i vagana ai nai ave ta'avale ma le fa'asua'ava e ono, ma nisi sa fa'asoesa i o latou tua'oi na lipotia mai, ma fa'avave atu i ai vasega i leoleo tiute.

"O lenei tausaga, ua ese fua ua va'aia i feoa'iga a le mamalu o le atunu'u i ta'avale i luga o alatele, ua iloga mai ua aoga le feso'ota'i ma fetufa'i ma le mamalu o e fa'afoea ta'avale, ua aoga fo'i tima'iga ua talia fo'i nai fautuaga aua le saogalemu o feoa'iga ma le soifua o e pele ia i tatou, lea ua fua mai ai nei fua lelei, e matua leai se fa'alavelave tau ta'avale na lipotia mai a'o nisi fo'i ua maumau le soifua ona o ni fa'alavelave fa'afuase'i i alatele i le lua vaiaso atoatoa o le poloka na faia nei"

O se tala fiafia lea ma le agaga fa'afetai o le ali'i Komesina ina ua fesiligi mo se lipoti fa'amaumau o le latou poloka na faia i lumafale o le CBT i Nuuuli.

O le agaga o le fa'afetai na ia fa'ailoa mai, aua e tele le alofagia o i latou i lea vaitau o le poloka na fa'atautaia. E na'o le ono lava i latou na taofia ma maua ane ua fa'afoea le ta'avale ma le fa'asua'ava, ma nisi na lipotia mai i le fa'asoesa i o latou tuaoi, ma sa o'o atu i ai le auaunaga a leoleo.

"O lo ua iloga mai, ua talia le fautuaga ma nai tima'iga faifai pea a lenei matagaluega ina ia tausisia lava le saogalemu a'o faia fiafia fa'aleaiga i lenei vaitausaga fiafia o le tausaga. O le saogalemu fo'i o pelega ia fa'amuamua i mea uma e finagalo i ai, ona leai lava lea o ni mea se tele e popole ai fua le tagata soifua i lona va ma le au fa'amalosi tulafono. O se fiafiaga o le loto ua saogalemu tagata feoa'i uma, ua saogalemu meatotino taugata, ua saogalemu foi soifua ua leai se ua maumau i ni fa'alavelave fa'afuase'i tau ta'avale, o se suiga tele ua tula'i mai i lenei tausaga i fa'amaumauga o fa'alavelave ma mea tutupu mai ona o soligatulafono i feoa'iga i alatele,” o tala lea a le Sui Komesina, Falanaipupu Ta'ase Sagapolutele.

Na fa'ailoa mai e Le'i, "E i ai pisinisi o lo'o fia fa'ailoa atu i ai le agaga fa'afetai ona o le sapaia o le galuega i lenei lua vaiaso talu ai. CBT i Nuuuli, sa faaaogaina le latou pakaga o ta'avale ma lumafale o le latou fo'i pisinisi mo le galuega fa'afetai tele, fa'atasi ai ma le afio'aga i Nuuuli i le Nofoa Ma'opu ma le Taupulega a le Afio'aga sa fa'aaogaina ai le Matoa o le Aumaga i le CBT lava mo le galuega.”

I kamupani fo'i sa latou fesoasoani mai i moli ma mea faigaluega na fa'aaogaina mo le galuega fa'afetai tele. Paramount Buiders, Nana's ma le McConnell Dowell, Ta'ita'i o le Faigamalo ma o laua faletua; e le'i misia fa'ainu ma le fa'amalo mai le mamalu fegasoloa'i o le atunu'u, fa'afetai tele.

Ua fa'ailoa mai o le a fa'amauina fa'amaumauga mo lenei tausaga, ma toe fa'ailoa mai i se tusitusiga ina ia toe tepa fo'i i tausaga ua tuana'i, ma fa'atusalia i ai lenei tausaga, po'o aga'i i luga le galuega pe leai.

Saunoa fo'i Le’i, "O le isi lava itu tele o le galuega, e fa'amoemoe lava i le aotelega o le atunu'u, i lo latou amana'ia o fautuaga ina ia fiafia ma le saogalemu, ia seu le manu ae tagai i le galu, aua ne'i maumau ai ola ona o le fa'afoea o ta'avale ma le fa'asua'ava, ma tutupu ai mea e fa'anoanoa ai, a'o vaitau fiafia nei i le lalolagi atoa o tagata Kerisiano. O le amana'ia o se fa'atala'u'ula atu i le a'ai o finagalo o le mamalu lautele, o se fa'aea lea ua sili nai le matou vaega o le taumafai atu e puipui ma tautua ma lave'ai le soifua o le atunu'u."