$20,000 e tatala ai i tua se tamaloa ua molia i le fasi to’alua

Pago Pago - AMERIKA SAMOA

O le aso 10 o Oketopa, 2023, na sulufa’i atu ai se tina i le ofisa leoleo i Tafuna mo se fesoasoani, mo ia ma sona alo e 1 tausaga le matua, e mafai ai ona o la tu’ua le fale o le aiga o lona to’alua, ona o le saua o le tamaloa.

Sa faamatala e lenei tina loto mafatia i leoleo, i le aso 9 o Oketopa i le 4 i le afiafi, sa tafao ai i se volipolo a se aiga, ae po ai o ia e lona to’alua, le susuga ia Sisigafu’a Tuiuli.  Sa ta’ua e le tina, sa faafaigata ona tu mai i luga, ina ua pa’u i le po a lona to’alua, ona ua atoa le 7 masina o lona ma’itaga, i le la tama lona lua.

Sa ta’ua e le tina le taumafai o nisi o le aiga e fesoasoani atu ia te ia, ina ua fa’aauau ona fasi o ia e lona toalua, ae na avea lea ma mea na atili ai ona ita le ua molia, ma faliu mai i si a la tama e tasi le tausaga o lo o tu lata mai, ma po faalua.

Sa faamatala e lenei tina lona fefe e toe fo’i i lo la fale ina ua mae’a lenei faalavelave ona o lo o ia iloa, o lo o ita lava le tama o le aiga ia te ia.  O le mea lea na sulufa’i ai i le o le aiga a lona toalua e latalata ifo, ae peitai, a’o nofonofo i fafo o le fale o lea aiga, na alu atu lona to’alua ma faatonu o ia e la te o i le fale.

Ina ua le usitai le tina o le aiga i le ua molia, sa ia liliu ane loa ma se ma’a tu’i koko ua tau tu’i ai le ulu o le tina, ae peitai, sa vave ona poloka mai e le tina i lona lima.  O lea na tamo’e ai le tina i totonu o le fale e lafi mai i lona toalua.  Ae peitai, o le afiafi lava lea, na toe foi ai le tina i le latou fale, ona o lona mata’u ina ne’i toe fasi o ia e Tuiuli i le le usita’i.

O le taeao na soso’o ai, sa aioi ai lenei tina i matua o lona to’alua ina ia tu’u o ia ma lana tama e la te o, ae peitai, sa tete’e malosi le tamaloa o Tuiuli.  O le mea lea na o la tu’ua ai loa le la fale i Taputimu, ae sulufai atu i lona aiga i Amanave mo se fesoasoani.

Sa faamatala foi e lenei tina i leoleo, na amata fasi mai lava o ia e lona to’alua ina ua atoa le masina o le la tamaititi muamua ia Aperila 2022.  O iina na alu atu ai Tuiuli ma ave’ese mai i la’ua ma si ana tama mai i lona aiga.

Na ta’ua e lenei tina, o le taimi muamua lava na fasi ai o ia e lona to’alua, ona ua toatama’i i lona tina (tina o le fafine) i le oteina o ia ma o a’o tu ma si’i si a la pepe e tasi le masina, a po ma tu’i o ia e lona toalua, le tamaloa o Tuiuli.

Ma e amata mai lava la i lena masina, o’o mai ia Ianuari, seia o’o mai ia Setema, o lenei tausaga, o fasi lava lenei tina, e tusa ai ma lana molimau sa tu’uina atu i leoleo.

Na faapea loa ona agai atu leoleo e saili mai Tuiuli mai i lana fale faigaluega.  Sa mafai ona tu’uina atu se faamatalaga a le ua molia, i leoleo ma sa ta’ua e Tuiuli, i le aso 9 o Oketopa, sa ia faatonuina ai lona toalua e vaai le la atalii a’o alu e ta’alo volipolo, ae peitai, sa ia iloa mai lona atalii o lo o savalivali i tafatafa o le auala tele.

Sa faamatala e Tuiuli, sa ia alu atu ma sasa mai lona atalii ma faatonu e aua le toe alu i le auala.  Ona ia otegiaina lea o lona toalua, ae peitai, sa po o ia e le fafine.  Ma o lea na ia po ina ai le fafine, ae na te le’i fasiina.

Ina ua fesiligia o ia e tusa ai ma le faalavelave lea na tupu ia Aperila 2022, sa faamatala e Tuiuli i leoleo, sa ia faaoolima i lona toalua, ona sa faatonuina ai o ia e le tina o lona toalua.  Sa te’ena foi e Tuiuli le ripoti i lona faaoolima so’o i lona toalua.

E toalua ni molimau sa faatalanoaina e leoleo, ma sa o la faamaonia le faaoolima o Tuiuli i lona toalua, ma sa taumafai foi nei molimau e taofi Tuiuli, ina ua u’u e Tuiuli se laupapa e fasi ai lona toalua.  Sa faamaonia foi e nei molimau le fa’aaogaina e Tuiuli o se ma’a tu’i koko e fasi ai lona to’alua.

Sa valaauina loa le aufaigaluega a le malo (Social Services) ma sa o latou aveina loa le fafine ma lona alo i lona aiga i Amanave.

Ae o Tuiuli, lea e faigaluega i le falepuipui, sa lokaina ma molia i le faitauga e tasi o le faaoolima i lona tulaga muamua, ma faitauga e fa o le faaoolima i lona tulaga e tolu.

E $20,000 le tinoitupe faatulagaina e mafai ona tatala ai Tuiuli mai i le falepuipui.