2 FOMA’I FA’APITOA TOGAFITIGA MA TALAVAI -

Pago Pago - AMERIKA SAMOA

1 LE AGAVAA MO INISINIA FA’APITOA MISIONA EKALESIA LDS

Ua i o tatou laufanua ma ua amata fo’i talavai fa’apitoa e va’aia ai e le atunuu Foma’i fa’apitoa ua mae’a fa’auia mai e le Ekalesia a Iesu Keriso o le Au Pa’ia o Aso e Gata Ai, ma ua le fa’apito ni manu ia tasi, ae ua fa’asalafa fo’i talavai e fia fa’ao’o atu i le mamalu o le atunuu ua lagona ootia o le tino ma tigaina ai. 

O foma’i e lua ua i ai le Foma’i tama’ita’i mo gasegase tau tina o le atunuu. O so’o se ituaiga o gasegase tina, e mafai ona e va’aia le tamaitai foma’i Dr Tarr. 

Na saunoa Dr Tarr, “O la’u galuega e amata mai i le talavai e suesueina ai poo le a se afaina ua ia te oe le tina. O le tele o nei suiga i le soifua o le tina e mafua mai i le tatou tiute na toina mai e le Atua, o tatou tino e tauavea ai fanau mo le 9 masina, ma e fa’aolaola ai ona fanau mai lea ua tuueseeseina ma i tatou. O le tiute sili ona taua i le fa’auauina o le soifua o tagata i lenei paneta.”

Afai e mae’a ona suesueina gasegase o tina, ae mafai ona faia se taotoga ma togafitiga i ai, ua agava’a fo’i Dr.Tarr mo so’o se taotoga lava. O lona uiga, o lea ua aumaia le tali o le tele o a’afiaga o feagai ma tina i le atunuu. Ua tatou iloa, ua fa’ateleina tina o le atunuu e po’ia i le Kanesa o le Toala fanau, kanesa o le Uterus ma le Kanesa o le Susu. 

Ona o lo malaga uma mai Dr Tarr ae o lo’o mafuta lelei ma lona to’alua o Elder David Tarr, o le ali’i sili ona agava’a i le Inisinia. Peita’i o tatou masini uma lea e fia fa’aaogaina i suesuega o le Kanesa o le susu ma isi fa’ata tetele ia e su’ea ai le Kanesa o le Faiai ma isi totoga o le tino, lea ua maua se mapusaga aua o le ali’i lea ua leva ona galue mo le BOEING i Washington State.

“O le fa’afetai ona ua maua se avanoa ou te sau mamao ai i le motu ua mafai ona avea ma tertori o Amerika. Ua o mai lava e le’i lava se iloa ma se suesuega i le nofoaga ua fa’amautu e avea ai i ma’ua ma misiona. O le tala moni, sa leai se fuafuaga ole vaitau lenei o le olaga o le a oo mai ai i le Parataiso.” O se tala fiafia lea a le ali’i Inisinia. O se mea lelei, ona e matele lana taumafaiga i tulaga o fausaga o va’alele ma va’a o le vateatea. 

Sa tele fo’i taimi e malaga ese mai ai le tama inisinia lenei mai lona aiga, ae fa’amautu i Falani ma isi atunuu tetele o le lalolagi, ona o fefa’ataua’iga o va’alele ma va’a o le vateatea e malaga ai ma le inisinia. Peita’i ua suia le olaga ma ina ua litaea mai le tina i lana galuega fa’afoma’i, sa manatu i la’ua, o le taimi lelei lea mo le misiona i atunuu o lo’o tele le mana’omia o i ai. Lea ua mae’a ai ona faia le filifiliga ma fa’amautu, o le a la’ua tautua i Amerika Samoa mo le 23 masina.

Na to’ai taunuu mai nei foma’i fa’apitoa ma la’ua aiga ia Aperila 2022, ma ua mae’a fa’atulaga fo’i talavai mo le mamalu o le atunuu i le Potu o Talavai Primary i Faga’alu.

O Elder Dr Gebhard ma lona faletua o Sister Gebhard, o lo’o ua latou fa’atulaga fo’i talavai fa’apitoa e tusa o agava’a o le susuga Dr Gebhard. O ia o le foma’i fa’apitoa o le Maea ario, poo lou tuasivi, lou tua ma le Ua. O le foma’i tonu lava lea mo tagata uma o atumotu. Aisea? Aua o i tatou na’o le sapelu ma le to’i poo le fa’alalo fanua, uma mea faigaluega i le lisi e fa’atino ai le gagauina o le vao. O moavao fo’i fa’ato’a maua nei lava, ae  o le sasau o le sapelu e sasa ai le mutia i malae ma togafa’i ma togakoko ma niu, o le mea e fai i aso ta’itasi.

“Peita’i, o le a se mea ua lagona i le taimi nei? Ua lagona le fa’agagau o le tino, ua tele mea tiga i le tua ma le maea ario ua amata ona vaivai. Lea ua tu’ulima mai le tatou to’omaga, fa’aaoga tatau le ali’i foma’i agava’a ua litaea mai fafo, ae ua toe fa’aauau tiute ma galuega e ala i le ma’ua misiona ma Sister Gebhard.” O sana fa’amatalaga lea ua fa’afesili mai ai i le to’atele o matua ua matutua nei, ae ua moomia sana suesuega ma talavai e fa’ato’afilemu ai i tatou.

Ona o lo ua mautu lava le Primary Care i Faga’alu mo a latou suesuega ma talavai, e mafai ona e vala’au i le LBJ Medical Center ma fa’atulaga ai sau talavai. O le taimi nei i le faletua Sister Gebhard ua i ai nei i le ASCC ma ua fa’aaogaina ai lona tusi pasi maualuga fa’afaufautua e avea ai ma faia’oga fo’i i le Adult Education, ae ua ia fa’ailoa mai, “O lou fatu atoa o le auai lea e a’oa’o ma fa’atonutonu fanau laiti a le ECE.” O lana galuega lea mai le tele tausaga o tautua ai i Amerika.

Ua i ai fo’i polokalama e aoga tele e amata ai ona suia la tatou tausami mai mea’ai e ono fa’apo’ia ai i gasegase i tatou, ae fa’apaleni ai tatou ‘aiga ta’itasi o le aso atoa. O lea ituaiga o polokalama e mafai ona e vala’au i ai, ma faia ai sau fa’atalanoaga i ala e mafai ona fesoasoani mai ai Sister Gebhard ia te oe ma lau sosaiete po se fa’alapotopotoga. O lo’o i ai pa’aga fa’amautu mai i Amerika mo lea fuafuaga, pe afai o le a maua le avanoa e te fa’afeso’ota’ia ai le tamaitai foma’i o a’oa’oga mo fanauiti. 

“Afai fo’i o i ai lava se tasi o fa’alapotopotoga e fia fesoota’i ma ina ia fesoasoani e aoao ni a outou fanauiti i se vasega, e maua fo’i se avanoa lelei e fefa’asoa’i ai ma le fanau, o e pele lava ia te a’u ma la’u tautua,” o se tala lea a Sister Gebhard.

O le fa’afetai ona o le sao o le LDS i le taumafaiga ona togafitia o gasegase ua iloga ona po’ia ai le to’atele o le atunuu. Ua iloga e matua aoga talavai ma suesuega a nei ituaiga o foma’i i o tatou gasegase ua faigata ona toe togafitia i o tatou olaga. Ua maua le avanoa, e le tootgia, ia o mai e fa’atulaga talavai ma va’aia i la’ua nei. Ua iloga lo latou fiafia e fia fa’ataunuu latou galuega fa’amisiona i so’o se taimi, ma ua naunau fo’i i latou e fa’aluaina le tautua ma asia fo’i le Manu’atele.