117 Au Fa'au'u Kolisi Tu'ufa'atasi a Amerika Samoa - Fa'aiuga 2018

I le fa'aiuga o lenei tausaga 2018 e to'a 117 i latou na taua'aoina o latou fa'ailoga maualuluga e aotelega ai AA, ASc, BA in Elementary Education na tausailia i le fa’auuga a e Kolisi Tu’ufa’atasi a Amerika Samoa (ASCC) i le Aso Faraile ua te’a.

Sa fa'aaogaina fo'i lea sauniga e taua'ao aloaia ai fa'ailoga maualuluga o nisi o alo o Amerika Samoa i le Masters in Education e to'afa mai le Iunivesite Concordia. O i latou nei o Theresa Rose Kiliona; Salani Julia Leota-Maiava; Sopo Lolomatauama ma Paul Ryan Manuma. E to'atasi lava le ua fa'au'u ma le Masters of Public Administration mai DeVRY University, le tama'ita'i o Antonina Florita Paselio.

A'o le na tomuli i ai le laina o le tama'ita'i Faia'oga, lea ua umia nei lona fa'ailoga Doctor of Philosophy in Couselor Education & Supervision, Mrs Senovefa TalainaLeota-Gogo Mana'o.

Saunoa le tama'ita'i peresetene o le Kolisi Dr Rosevonne Makaiwi-Pato, "Le vasega fa'au'u, e tolu lava fesili ua tatau ona e maua le tali i le taeao nei. Muamua, o le a la'u mea o fai i'i? Na fa'apefea ona ou to'ai taunu'u mai i le aso lenei? O fea o le a fa'atutu i ai la'u malaga e afua i le aso?"

"O le fesili muamua ua e iloa ai, ua fa'ai'uina lau taumafaiga ma ua e manumalo, ua e fa'au'u, o se la'asaga lelei ua e ausia. O lona lua e te iloa ai, ona e mua'i fa'afetaia le Atua i lona alofa ma lana puipuiga, o ou matua ma tou aiga uma ae maise o faia'oga uma na a'oa'oina outou, ma e na fai tatalo mo outou, ua e manuia ai."

"Peita'i o le lona tolu, e ao ina e matua fa'amalosi ma e tutumau i lau sini na e mana'o ai, aua le lumana'i o au taumafaiga. Pe faigaluega pe fa'aauau a outou galuega, ia e to'aga e fa'aaoga lou agava'a ua i ai, e tausaili ai le lumana'i, ia e toe fa'afo'i le manuia i nai ou aiga ma matua, le galuega a le Atua, ia matua fa'ai'uina o outou faiva. Ina o atu ia, ia outou manuia,” o lana toe saunoaga lea na fa'ai'u i ai lana folasaga.

Sa tutulai le Lutena Kovana Lemanu Peleti Mauga, ma saunoa e fa'amalosi i le au fa’auu.

"O la'u mau e faao'o atu mo outou uma, e le o se mau umi, Sela! Na ona e mapu ane teisi ona o le mamao fo'i o lea ala ma ona fita sa outou uia, ona e toe oso fo'i lea i luga o le fua, toe alo atu aga'i i le lumana'i, ia maua lava lau sini na e mua'i fa'atu. Aua lava ne'i e mapu matua malolo ai i lau sela lena, ae ia vave ona e toe fa'aauau."

Na saunoa fo'i e fa'amanuia le taumafaiga ua tini i lenei aso, ae sa le galo ia te ia le fa'afetai, lea sa ia fa'atutuina ai le vasega fa'aiuaso ma ia toina le latou pese fa'afetai i le vasega o matua uma ma aiga.

“Aua ne'i galo ia te outou, le tapuaiga, ae o le fa'amalosi ma le tu'ualalo a i latou uma sa faia mo outou a'o tou taumafai i le ala fita lea ua tini nei. Afai e toe soso'o le taumafaiga, o i latou lava lea e te toe tua lava i ai, ae afai o le a taumafai i galuega, ia mautinoa, e le'i ta'ita'i le tatou aitalafu ia i latou nei. Fa'amalo le tauata'i, ma ia outou manuia!"

O le fofoga fa’apitoa o le aso, le tofa Malopa'o Dr. Akenese Epi Nikolao, sa ia fa'ailoa i le vasega fa'ai'uaso, "O le aso lenei, o le a ou avatua ai le 'Aisa lelei mo outou. Ia outou iloa lelei, o le Aisa lea e lelei ona tatou ola a'oa'oina ai!"

Ua a'o se upu ICE e tu'ufa'atasia ai lana lauga, i le gagana peretania, ma e tolu lava ona vaega sa ia talanoa ai.

"Lou Tagata, O ai lou tagata, aua ne'i e fa'ato'ilaloina lou tagata i ni mea leaga, ae ia e fa'aea i lou tagata na e soifua mai ai, o se tasi e taualoa i ou uiga fa'atamali'i ma lou olaga tauivi ma le filiga i mea lelei, ia maua fo'i lou olaga a'oa'oina, ia e agava'a ai e fa'atino galuega lelei mo oe lava ma lou aiga atoa ma nisi e to'atele. E taua tele lou tagata, e le tatau ona e va'ai maulalo i lena tulaga taualoa o ia te oe."

"O lau amio ma ou uiga, ia tausa'afia ma e amio lelei e pei o le tagata ua a'oa'oina lelei e nai ou matua, ou faia'oga, o ou Matua Fa'aleagaga, ae maise lava o lou olaga na e soifua a'e ai a'o fa'asoa atu lou aiga ma lou nu'u ia te oe. O uiga nei e te iloa ai ona tautua e fa'aaoga lou tagata agava'a e te fesoasoani ai i nisi. E te iloa ai soifua ma le iloa lelei, e te toe fo'i mai e te fa'afetai i ou matua, i lou aiga, i lau ekalesia ma lou nu'u, i latou sa tapua'ia ou faiva i so'o se mea, ia le galo ia te oe le alolofa o i latou na sapaia au a'oga ma finau mo oe i le tele o taimi."

"Ia fa'asilisilia lava oe i so'o se mea e te faia. Ia e finau ia e ausia au sini uma na fa'atutu mo lou lumana'i. Ina ua e iloa e te gafatia ma lavatia ona tausaili, aua e te fa'avaivai. O lo'o ia te oe le malosi fa'aletino ma le agaga, aua o lo'o talosia au taumafaiga uma e ou matua ma lou aiga, ua latou tausoa fa'atasi ma oe. Taumafai i le mea e gata ai lou mafai, ona e ausia lea o lea fo'i la'asaga mulimuli o lou soifua taumafai. E foa'i mai lava le Atua i so'o se tasi e taumafai ma le agaga mama, ma le fa'amalosi lava."

"O le tele o au mea sese, o lou atamai fo'i lea. Aua e te manatu e leai ni ou sasi, e tofusia i tatou ma vaivaiga, ae le tu'u ai e vaivai so'o, ae toe tu mai i luga ma toe una'i malosi lau taumafaiga. Talitonu i lou malosi ua toina mai e le Atua e te gafatia ai mea uma i lau sailiga. Ia manuia outou, ma ia mautu lou fa'amoemoe. Manatua ua e maua lou tusi pasi i le aso, ona ua e agava'a i ou faiva uma!"

Mai le vasega fa'ai'uaso e to'a tolu fanau a'oga na ausia togi GPA 3.9 - 4.0 poo Summa Cum Laude: Melesuati Lualua; Elysha Lalau Samatua ma Vaipuna Vivi'i Tunoa. O Elysha ma Vaipuna fo'i e ta'ilua a la'ua tusi pasi - o le Suetusi ma Tausi Tusi ma Fa'ailoga ASc Business Management.

O le Magna Cum Laude Magalita Johnson, le tausala lalelei o Amerika Samoa ma o le sui fo'i o le fanau a'oga i le Kolisi atoa i le Komiti Fa'afoe a le ASCC; Theresa Lafaele; Afimuao Nimoai; Loreta Liu; Lomialagi Tauiliili; Theresa Lafaele; Osana Naomi Esekia; Jessie Verolene Faleafine; Joshua Talalemotu Samuel Fruean; Jing Jing Jiang; Quendolynn G. Eseroma ma Fuianiga Tupua - lea e tula'i mai o latou togi i le GPA 3.75 - 3.89. E to'a 15 i latou ua lisia mai o latou suafa ua ausia togi mai le 3.50 - 3.74 Cum Laude i lea lava fa'au'uga.

O i latou e to'a sefulu tasi ua maua fa'ailoga Bachelor of Education - Elementary Education ua mae'a taua'aoina fo'i latoui fa'ailoga na i lenei fa'ai'uga: Adeline Ah-Sue; Sinasaua Salumalo Tuitasi Faleafaga; Fili Auomanu Fauolo; Christina Finau; Pasami Lago; Chelei Jasmine Pato-McCoy; Valelia T. Sefo; Dolly Sailiai Sikoloni; Ilena Annastas Talataina; Karen Naomi Tiitii ma Ianeta Sailauama Tuia.

E to'alua lava i la'ua na fa'au'u ma tusi pasi ASc i le Marine Science, Faith Latu ma Raijeli Marama Toanivere.  E to'alima i latou ua maua fa'ailoga ASc i le Health Science; ae to'atasi lava le sui na maua lona fa'ailoga i le ASc i le Automotive Technology, o ia lea o Fa'asaoina Mathew Atulu.

E to'a sefulu lima i latou ua maua fa'ailoga o le Associate of Science i le Criminal Justice, ae to'a sefulu i latou ua maua fa'ailoga ASc i le Business Management. E to'a 18 i latou ua taua'aoina i ai o latou fa'ailoga ASc - Accounting, ae na'o o isi uma o le au fa'au'u sa mauaina fa'ailoga o le Associate of Arts i kosi eseese sa tauavea i lenei fo'i lua tausaga i le a'oa'oga i le tatou Kolisi Tu'ufa'atasi.