11 fanau fa’au’u 2023 - Filifilia Uifa’atali mo aoga fa’amiliteri ese’ese

Pago Pago - AMERIKA SAMOA

Ua fa’alauiloa mai e le tatou Faipule i le Konekeresi, Uifa’atali Amata, ua ia mae’a filifili e fa’amaonia mo le ulufale atu i a’oga mo tomai eseese fa’amiliteri i le mae’a ai o latou fa’au’uga mai a’oga maualuluga i le teritori i lenei tausaga a’oga. 

I lenei tausaga ua to’atele ai lava i latou ua to’atele ai lava i latou o le a ulufale i le A’oga Fa’amiliteri a le Air Foce poo le Fuava’alele a le Vaega Au lea ua ausia nei e le to’a fitu o i latou ua filifilia. 

Pito atu i ai le to’atele o i latou e ulufale i le Aoga Fa’amiliteri a le Fuava’a poo le USNaval Academy lea e to’atolu i latou o le a ulufale i ai, ma le to’atasi lava o le a ulufale i le Merchant Marines Academy poo le A’oga Fa’amiliteri a le Maligi.

Mai le Pacific Horizon Schools: Angela Milford e ulufale i le Air Force Academy, Naval Academy, Military Academy ma le Merchant Marine Academy; ua agava’a uma lava i nei a’oga fa’amiliteri, peita’i o le a filifili o ia poo fea e fia a’otauina ai.

O Daniel Wang ua filifili e ulufale i le US Military Academy poo le Naval Academy.

Mai le Aoga Maualuga a Fagaitua: Dorrin Tuisamatatele ua filifili i le Military Academy; Leutta Isamaeli i le Air Force Academy; ma Tatiana Williams i le Air Force Academy.

Mai le Aoga Maualuga a Samoana: Arriana Taatasi i le Air Force Academy ma le Naval Academy; Iupelisiliva Kapesi i le Air Force Academy ma le Naval Academy; Prodeius Lutu Fuga i le Naval Academy.

O le to’atolu mulimuli e aofia ai Toafiaoalii Fruean mai Buena High School, Arizona ua filifili e ulufale i le Air Force Academy, Luma Va’ai mai le  US Airforce Prep School ua filifili fo’i e ulufale i le the Air Force Academy ma Alosina Seumanu o le  Navy Prep School ua filifili e ulufale i le Naval Academy.

Fa’ailoa e Uifa’atali lona agaga fa’afetai ma le fa’amalo i le fanau ua ausia nei agava’a e a’o’oga tapena ai mo tomai fa’amiliteri ma tofiga fa’ata’ita’i i nei vaega o le Vaega Au a le Malo Tele.

E sili fo’i le fa’amalo ma le agaga fa’afetai i le tima’i ma le fautua fa’apea le fa’amalosi a Matua ma Aiga, ae maise o le lagolagosua a le vasega o Faia’oga sa galulue punoua’i mo le taumafaiga o fanau ina ia i’u manuia aoaoga. 

“O lo ua fua mai a outou galuega i le ao ma le po, ua fa’aea le fanau a’oa’oina lelei i matua ma aiga ae maise le tatou malo. O lo latou sao i le taua o le sailiga o le atamai ma tomai fa’amiliteri, o se ‘ai maualuga fo’i lea ua gafatia ona fa’amautu mai e i latou mo le tatou Malo. Fa’afetai fa’aea aiga, fa’afetai le tausuai e saili mea lelei e fiafia ai matua, faia’oga ma laumua sa outou utuvai mo le atamai fa’aonaponei. Fa’afetai tele i le tapua’iga le mavae a le vasega o matua fa’aleagaga ma ekalesia o lo’o avea ai nei fanau uma ma totino. Ia fai outou ma sulu i le pogisa ma se fa’amoemoe i nofoaga e le o mautonu ai le saogalemu,” o se fa’afetai lea Uifa’atali.